న్యూఢిల్లీ: పన్ను రిటర్నులను దాఖలు చేయని మరో 35,000 మందికి పైగా ఆదాయపు పన్ను శాఖ నోటీసులు జారీ చేసింది. ఐతే వీరంతా బకాయిలను చెల్లిస్తే జరిమానాలు మాఫీ చేస్తామని ఆర్దిక మంత్రి పి. చిదంబరం పేర్కొన్నారు. ప్రభుత్వ ప్రోత్సాహం వల్ల 10,000 మంది వారి బకాయిలను చెల్లించి, పన్ను రిటర్నులను సమర్పించారని కూడా తెలిపారు. ప్రస్తుత ఆర్దిక సంవత్సరం బడ్జెట్ అంచనాల కన్నా తక్కువగా అదాయం నమోదు అవుతుందన్న సందేహాంతో ఆర్దిక మంత్రిత్వ శాఖ వర్గాలు నోటీసులు జారీ చేశాయి. మార్చి 31తో ముగిసే ప్రస్తుత ఆర్థిక సంవత్సరంలో ప్రత్యక్ష పన్నుల విభాగం కింద రూ.5.65 లక్షల కోట్ల ఆదాయ లక్ష్యాన్ని సాధించాలని రెవెన్యూ శాఖ యోచిస్తుంది.

ఆదాయ పన్ను అధికారులు చేపట్టిన చర్యలు మంచి ఫలితాలు ఇస్తున్నాయని ఆర్దిక మంత్రి పి. చిదంబరం తెలిపారు. 70 వేల మందికి నోటీసులు జారీ చేయగా 10 వేల మంది వెంటనే స్పందించారు. నోటీసులు అందిన వెంటనే వారి ఆదాయాలను వెల్లడించడంతో పాటు పన్నులు చెల్లించారు. బకాయిలు కట్టేస్తే జరిమానాలు విధించకూడదన్న అభిప్రాయంలో పన్ను అధికారులు ఉన్నారని, ఈ అవకాశాన్ని అసెసీలు సద్వినియోగం చేసుకోవాల్సి ఉంటుందని సూచించారు. ఫిబ్రవరి 10 నుంచి మార్చి 10 వరకు సుమారు 13.5 లక్షల రిటర్న్ దాఖలయ్యాయని, గత సంవత్సరం 10.81 లక్షలు రిటర్న్ దాఖలయ్యాయని కనుక అదనంగా 15 శాతం దాఖలయ్యాయని ఆయన స్పష్టం చేశారు.

వన్ఇండియా తెలుగు మనీ