న్యూఢిల్లీ: వచ్చే ఆర్దిక సంవత్సరంలో భారత్ వృద్ది రేటు 6.7 శాతం సాధిస్తుందని ఫిక్కి ఎకనామిక్ అవుట్‌లుక్ నిర్వహించిన ఓ సర్వే తెలిపింది. రిజర్వ్ బ్యాంక్ ఆఫ్ ఇండియా (ఆర్‌బీఐ) కీలక వడ్డీ రేట్లు తగ్గిస్తుందని, దీని ఫలితంగా పారిశ్రామిక వృద్ధి, వినియోగం తదితర అంశాలపై సానుకూల ప్రభావం పడుతుందని ఈ సర్వేలో తేలిందని ఫిక్కి ప్రెసిడెంట్ నైనాలాల్ కిద్వాయ్ చెప్పారు. అంతక ముందు రాబోయే 2013-14 ఆర్థిక సంవత్సరానికిగానూ 6.5 శాతం వృద్ధిరేటు ఉంటుందని ఫిక్కీ అంచనా వేయగా, మంగళవారం ఆర్‌బీఐ రెపో రేటును పావుశాతం తగ్గిస్తుందనే అభిప్రాయాలు సర్వత్రా వ్యక్తమవుతుండటంతో ఇప్పుడు ఫిక్కి ఎకానామిక్ ఔట్‌లుక్ సర్వే 6.7 శాతానికి పెంచింది.

సంస్కరణలకు ప్రభుత్వం సానుకూలంగా ఉం దన్న సంకేతాల కారణంగా సెంటిమెంట్ మెరుగుపడిందన్నారు. ద్రవ్యోల్బణం తగ్గుముఖం పడుతుండటంతో ఆర్‌బీఐ రేట్లను తగ్గించే అవకాశాలున్నాయని చెప్పారు. భారతీయ పారిశ్రామిక రంగం మంగళవారం నాటి సమీక్షలో రెపో రేటు, సిఆర్‌ఆర్‌ను 25-50 బేసిస్ పాయింట్ల మేర తగ్గిస్తుందనే ఆశాభావాన్ని వ్యక్తం చేస్తోందన్నారు. అలాగే వచ్చే ఆర్థిక సంవత్సరంలో 0.75 శాతం నుంచి 1 శాతం మేర రెపో రేటు తగ్గుతుందనే నమ్మకం వ్యక్తమైందని సర్వే తెలిపింది. వృద్ధిరేటు తిరిగి పుంజుకునేందుకు ఇది కీలక తరుణమని పేర్కొంది. కాగా, ఆర్థిక ఇబ్బందుల నుంచి అమెరికా కోలుకుంటుందనే అంచనాలు ఎక్కువగా ఉన్న క్రమంలో ఆర్‌బిఐ వడ్డీరేట్లను తగ్గించడం పారిశ్రామిక రంగానికి ప్రాణవాయువును అందిచినట్లే అవుతుందని కిద్వాయ్ తన ప్రకటనలో అభిప్రాయపడ్డారు.

తెలుగు వన్ఇండియా