న్యూఢిల్లీ: ఉత్తరప్రదేశ్‌లోని రాయ్‌బరేలిలో రూ.1,000 కోట్లతో ఏటా ఒక లక్ష చక్రాల తయారీ సామర్థ్యం గల ఫోర్జ్‌డ్ వీల్ ఫ్యాక్టరీని ఏర్పాటు చేసేందుకు ఉక్కు మంత్రిత్వశాఖకు చెందిన ప్రభుత్వరంగ సంస్ధ అయినటువంటి రాష్ట్రీయ ఇస్పాత్ నిగమ్ (ఆర్‌ఐఎన్‌ఎల్‌)తో ఇండియన్ రైల్వేస్‌తో ఒప్పందం కుదుర్చుకుంది. దీనితో పాటు మరో ప్రభుత్వ రంగ సంస్ధ నేషనల్‌ మినరల్‌ డెవలప్‌మెంట్‌ కార్పొరేషన్‌ (ఎన్‌ఎండిసి) కూడా ఇండియన్ రైల్వేస్‌తో ఒక ఒప్పందాన్ని కుదుర్చుకుంది. ఉత్తరప్రదేశ్‌లోని రాయ్‌బరేలిలో ఉన్న లాల్‌గంగ్ వద్ద ఉన్న రైల్ కోచ్ ఫ్యాక్టరీకి సమీపంలో ఫోర్జ్‌డ్ వీల్ ఫ్యాక్టరీని నెలకొల్పనున్నారు. చక్రాల తయారీలో భారతదేశంలో ఇదే అతి పెద్ద ఫ్యాక్టరీ అవుతుండడం విశేషం.

ప్రస్తుతం రైల్వే శాఖ చక్రాల కోసం అధికంగా దిగుమతులపై ఆధారపడింది. కాగా, మూడేళ్లలో ఈ ప్లాంటు ఏర్పాటు కానుంది. హైస్పీడ్ రైళ్లకు కావాల్సిన చక్రాలను సైతం ఇక్కడ ఉత్పత్తి చేస్తారు. చక్రాల తయారీకి కావాల్సిన ముడి సరుకును వైజాగ్ స్టీల్ ప్లాంట్ నుండి సరఫరా చేస్తారు. ప్రతి సంవత్సరం రైల్వేలకు 70 వేల చక్రాలు అవసరమవుతున్నాయి. కొత్త వ్యాగన్లు, కోచ్‌లు పట్టాలెక్కనుండడంతో 2016-17 నాటికి డిమాండ్ ఒక లక్ష చక్రాలకు చేరుకుంటుందని అంచనా. అలాగే ఈ ఒప్పందం కింద తూర్పు రైల్వే విభాగానికి చెందిన జగదల్‌ పూర్‌-కిరండల్‌ విభాగంలోని 150 కిలోమీటర్ల కొత్తవలస-కిరండల లైన్‌ డబ్లింగ్‌ పనులను ఎన్‌ఎండిసి చేపడుతుంది.

కేంద్ర ఉక్కు శాఖ మంత్రి వేణీప్రసాద్‌ వర్మ, రైల్వే శాఖ మంత్రి పవన్‌కుమార్‌ భన్సాల్‌ సమక్షంలో ఈ రెండు ఒప్పందాలపై సంతకాలు జరిగాయి. ఈ సందర్భంగా ఉక్కు శాఖ మంత్రి వేణీప్రసాద్‌ వర్మ మాట్లాడుతూ ఉక్కు పరిశ్రమకు ఇనుప ఖనిజం డిమాండ్ పెరుగుతున్న దృష్ట్యా ఈ విస్తరణ చేపట్టామన్నారు. కొత్తవలస-కిరండల్ రైల్వే లైను డబ్లింగ్ పనుల మూలంగా ఉక్కు రంగానికి ప్రయోజనం చేకూరడమే కాకుండా ఒడిశా- ఆంధ్రప్రదేశ్‌లతో పాటు ఛత్తీస్‌గఢ్‌లోని గిరిజనుల రాకపోకలకు ఎంతగానో దోహదపడుతుందని అన్నారు.

తెలుగు వన్ఇండియా