అమెరికా దెబ్బ: చైనా నుంచి భారత్‌కు 12 పెద్ద సంస్థలు!

ఢిల్లీ: పన్నెండు విదేశీ కంపెనీలు తమ కార్యకలాపాల కేంద్రాన్ని డ్రాగన్ కంట్రీ చైనా నుంచి భారత్‌కు మార్చేందుకు ఆసక్తి కనబరుస్తున్నాయని కేంద్ర ఆర్థికమంత్రి నిర్మలా సీతారామన్ అన్నారు. అమెరికా - చైనా వాణిజ్య యుద్ధం నేపథ్యంలో వివిధ కంపెనీలు చైనా నుంచి తరలి వెళ్లేందుకు సిద్ధమౌతున్నాయి. మరోవైపు, ఇటీవల నరేంద్ర మోడీ ప్రభుత్వం కార్పోరేట్ ట్యాక్స్ రేటును తగ్గించింది. దీంతో ఈ అవకాశాన్ని ఉపయోగించుకోవాలని వివిధ కంపెనీలు భావిస్తున్నాయి.

దాదాపు 12 సంస్థలు చైనాలో ఉన్న తమ వ్యాపా ర, వాణిజ్య కార్యకలాపాలను భారత్‌కు మార్చుకోవాలని చూస్తున్నాయని ఆమె అన్నారు. ఇటీవల తగ్గించిన కార్పొరేట్ పన్ను ప్రయోజనాన్ని పొందాలని భావిస్తున్నాయన్నారు. చైనా నుంచి భారత్‌కు రావాలనుకుంటున్న విదేశీ సంస్థల కోసం ఓ టాస్క్ గ్రూప్‌ను ఏర్పాటు చేస్తున్నట్లు తెలిపారు.

ఈ కంపెనీలు భారత్‌కు వచ్చే ప్రక్రియకు సంబంధించిన పురోగతిని త్వరలో వెల్లడిస్తామన్నారు. డిసెంబర్ 15 వరకు కనీసం పది పెద్ద ప్రాజెక్టులకు సంబంధించిన ప్రకటనను ప్రభుత్వం చేస్తుందన్నారు. జీడీపీ వృద్ధి ఆరేళ్ల కనిష్టానికి పడిపోవడంపై ఆమె స్పందించారు. తదుపరి క్వార్టర్ ఫలితాలు మెరుగ్గా ఉంటాయన్నారు.

మందగమనంలో సాగుతున్న ఆర్థిక వ్యవస్థకు ఊతమిచ్చే ఉద్దేశ్యంతో గత 28 ఏళ్లలోనే ఎన్నడూ లేని విధంగా సెప్టెంబర్‌లో కార్పోరేట్ పన్ను రేటును ప్రభుత్వం దాదాపు 10 శాతం మేర తగ్గించింది.