10ఏళ్లలో వచ్చిన ఉద్యోగాలన్నీ హుష్‌కాకీ, అమెరికా ఆర్థిక పరిస్థితి ఎంత దారుణమంటే?

కరోనా ప్రభావం అమెరికాపై భారీగా పడింది. ఏ దేశంలో లేనన్ని కేసులు, మరణాలు అగ్రరాజ్యంలో ఉన్నాయి. ఈ రోజు వరకు అమెరికాలో 50వేల మందికి పైగా మృతి చెందగా, దాదాపు 9 లక్షల కేసులు ఉన్నాయి. కరోనా కారణంగా ప్రతి దేశ ఆర్థిక వ్యవస్థపై భారీగా పడుతోంది. అమెరికా ఆర్థికవ్యవస్థ కూడా చిన్నాభిన్నమవుతోంది. లక్షలాది మంది ఉద్యోగాలు కోల్పోతున్నారు.

ప్రతి 6గురిలో ఒకరికి ఉపాధి కరువు

అమెరికాలో ఉపాధి సూచీలు చూస్తే కరోనా ప్రభావం ఎంత ఎక్కువగా ఉందో కనిపిస్తుంది. దాదాపు ప్రతి ఆరుగురు వర్కర్స్‌లో ఒకరు ఉపాధి కోల్పోయారు. గత కొద్ది వారాల్లోనే లక్షలు, కోట్లాది మంది కరోనా నిరుద్యోగ ప్రయోజనాల కింద దరఖాస్తు చేసుకున్నారు. 1930లో వచ్చిన మహామాంద్యం తర్వాత అతిపెద్ద ఉద్యోగాల కోత మళ్లీ ఇప్పుడే చోటు చేసుకుంది. బిజినెస్, హాస్పిటల్స్‌కు సహకరించేందుకు యూఎస్ ప్రతినిధుల సభ 500 బిలియన్ డాలర్ల ప్యాకేజీకి ఆమోదం తెలిపింది.

15 శాతం నుండి 20 శాతం

నిరుద్యోగ భృతి ప్రయోజనాల కోసం దరఖాస్తు చేసుకుంటున్న వారి సంఖ్య రోజు రోజుకు పెరుగుతోంది. ఇటీవల మరో 4.4 మిలియన్ల మంది దరఖాస్తు చేసుకున్నారు. అమెరికాలో కరోనా కారణంగానే ఉద్యోగాలు కోల్పోయిన వారు 26 మిలియన్ల మంది (2.6 కోట్లు) ఉన్నారు. రోజురోజుకు ఉద్యోగాలు కోల్పోతున్న వారి సంఖ్య పెరుగుతూనే ఉంది. ప్రస్తుతం నిరుద్యోగ రేటు 15 శాతం నుండి 20 శాతం మధ్య ఉందని అంచనా.

పదేళ్లలో వచ్చిన ఉద్యోగాలన్నీ హుష్ కాకి

అమెరికాలో పరిస్థితి ఎంత దారుణంగా ఉందంటే 2007-09 మధ్య వచ్చిన ఆర్థిక సంక్షోభం అనంతరం 23 మిలియన్ల ఉద్యోగాలు వచ్చాయి. కరోనా కారణంగా ఈ రెండు నెలల్లోనే ఆ ఉద్యోగాలు అన్నీ ఊడిపోయాయి. ఉద్యోగ నష్టాలు ప్రస్తుతానికి కాస్త తగ్గుముఖం పట్టినప్పటికీ మున్ముందు ఈ ప్రభావం ఎక్కువగా ఉంటాయని చెబుతున్నారు.

1.7 మిలియన్ల నుండి..

1930లో నిరుద్యోగ రేటు తర్వాత మళ్లీ ఎక్కువగా చూస్తోంది అమెరికా. రెండు నెలల క్రితం నిరుద్యోగుల సంఖ్య 2 లక్షలు ఉండగా, 1.7 మిలియన్ల మంది ప్రయోజనాలు పొందారు. గత వారం కాలిఫోర్నియా, ఫ్లోరిడా, టెక్సాస్, న్యూయార్క్‌లలో పెద్ద ఎత్తున కేసులు, మరణాలు చోటు చేసుకోవడంతో ఉపాధి కూడా అలాగే కోల్పోతున్నారు. ఏప్రిల్ నెల రెండో వారానికి ప్రయోజనాలు పొందుతున్న వారి సంఖ్య ఏకంగా 16 మిలియన్లకు చేరుకుంది. గత రెండు వారాల్లోను అది పెరుగుతూ వచ్చింది.

కోలుకోవడానికి ఏళ్లు పట్టవచ్చు

నిరుద్యోగ ప్రయోజనాలకు సంబంధించిన దరఖాస్తులను ప్రాసెస్ చేయడంలో చాలా రాష్ట్రాలు ఇంకా వెనుకబడి ఉన్నాయని చెబుతున్నారు. ఇప్పటికే 24 మిలియన్ల నుండి 26 మిలియన్ల మంది నిరుద్యోగ ప్రయోజనాల కోసం దరఖాస్తు చేసుకున్నారని, పూర్తి లెక్కలు వచ్చాక ఇంకా పెరుగుతాయని చెబుతున్నారు. అమెరికా ఆర్థిక వ్యవస్థ దారుణంగా దెబ్బతిన్నది. కోలుకోవడానికి కొన్నేళ్లు పట్టువచ్చునని భావిస్తున్నారు. అంతకుముందు నిరుద్యోగిత రేటు 3.5 శాతంతో 50 ఏళ్ల కనిష్టానికి చేరుకుంది. తిరిగి ఆ స్థాయికి రావడానికి ఏళ్లు పట్టవచ్చునని చెబుతున్నారు.