TCS ని కుదిపేస్తున్న AI భయం.. కుప్పకూలిన మార్కెట్ క్యాపిటలైజేషన్.. ఏకంగా రూ. 10 లక్షల కోట్లకు దిగువకు..

భారతదేశంలోనే అతిపెద్ద ఐటీ సేవల సంస్థ టాటా కన్సల్టెన్సీ సర్వీసెస్ (TCS) మార్కెట్ క్యాపిటలైజేషన్ రూ. 10 లక్షల కోట్లకు దిగువన పడిపోయింది. బీఎస్‌ఈలో కంపెనీ షేర్ ధర 4.5% క్షీణించి రూ. 2,776 వద్ద 52 వారాల కనిష్ట స్థాయిని నమోదు చేసింది. ఏఐ-ఆధారిత అంతరాయంపై కొనసాగుతున్న భయాలు, ఊహించిన దానికంటే బలమైన యూఎస్ ఉద్యోగ గణాంకాలు షేర్ల పతనాన్ని, తద్వారా పెట్టుబడిదారుల్లో ఆందోళనను పెంచాయి.

ఈ వారం ప్రారంభంలో, దేశంలోనే అతిపెద్ద రుణదాత ఎస్‌బీఐ, తన బలమైన Q3 ఆర్థిక ఫలితాల మద్దతుతో టీసీఎస్‌ను అధిగమించి, మార్కెట్ క్యాపిటలైజేషన్ పరంగా నాల్గవ అతిపెద్ద లిస్టెడ్ కంపెనీగా నిలిచింది.

మార్కెట్లో ఈ బేరిష్ సెంటిమెంట్ వెనుక యూఎస్ ఆర్టిఫిషియల్ ఇంటలిజెన్స్ స్టార్టప్ ఆంత్రోపిక్ పాత్ర ఉంది. ఈ నెల ప్రారంభంలో, ఆంత్రోపిక్ కార్పొరేట్ లీగల్ టీమ్‌ల కోసం ప్రత్యేకంగా రూపొందించిన కొత్త సాధనాన్ని ఆవిష్కరించింది.

"క్లాడ్" చాట్‌బాట్‌ను రూపొందించిన ఆంత్రోపిక్, ఈ కొత్త ఉత్పత్తి ఒప్పందాల సమీక్షలు, ఎన్‌డీఏల వర్గీకరణ, కంప్లయన్స్ వర్క్‌ఫ్లోలు, లీగల్ బ్రీఫ్‌ల తయారీ, ప్రామాణిక ప్రతిస్పందనలతో సహా అనేక న్యాయ సంబంధిత విధులను ఆటోమేట్ చేయగలదని తెలిపింది.

ఈ అమ్మకాల హోరు విస్తృతంగా కొనసాగింది. నిఫ్టీ ఐటీ ఇండెక్స్ దాదాపు 4% పడిపోగా, ఇన్ఫోసిస్, హెచ్‌సీఎల్‌టెక్, ఎంఫాసిస్, విప్రో వంటి అగ్రశ్రేణి ఐటీ సంస్థల షేర్లు ఒక్కొక్కటి 4-5% మేర పతనమయ్యాయి. ఇది మొత్తం ఐటీ రంగాన్ని భారీ నష్టాల్లోకి కూరుకుపోయింది.

ఈ పతనం మార్కెట్ క్యాపిటలైజేషన్ నుంచి సుమారు రూ. 1.3 లక్షల కోట్లను తుడిచిపెట్టింది. దీంతో నిఫ్టీ ఐటీ కంపోనెంట్స్ మొత్తం విలువ సుమారు రూ. 27.6 లక్షల కోట్లకు తగ్గింది.

జియోజిత్ ఇన్వెస్ట్‌మెంట్స్‌లో చీఫ్ ఇన్వెస్ట్‌మెంట్ స్ట్రాటజిస్ట్ డా. వి.కె. విజయకుమార్ మాట్లాడుతూ, "టెక్ స్టాక్‌లు, ఆంత్రోపిక్ షాక్‌తో కోలుకోవడం కష్టం. భారతీయ ఐటీ రంగం నిరంతరం కష్టపడుతుంది. ఐటీ నుండి ఇతర రంగాలకు మారడం వలన మంచి పనితీరు ప్రదర్శించే రంగాల్లోని స్టాక్‌లకు సహాయపడుతుందని హెచ్చరించారు.

గత వారం, అంతర్జాతీయ బ్రోకరేజీ సంస్థ జెఫరీస్ ఈ మార్కెట్ ప్రతిస్పందనను "సాస్‌పోకలిప్స్" గా అభివర్ణించిన మొదటి సంస్థలలో ఒకటి. 'ఏఐ ఈ కంపెనీలకు సహాయపడుతుంది' అన్న భావన నుంచి 'ఏఐ ఈ కంపెనీలను భర్తీ చేస్తుంది' అన్న భావనకు పెట్టుబడిదారుల సెంటిమెంట్ వేగంగా మారిందని జెఫరీస్ పేర్కొంది.

జెఫరీస్ ఈక్విటీ ట్రేడింగ్ డెస్క్ నుండి జెఫ్రీ ఫవుజ్జా, ప్రస్తుత మార్కెట్ వాతావరణాన్ని "పూర్తి భయాందోళన" గా వర్ణించారు. బ్లూమ్‌బర్గ్ ప్రకారం, "ట్రేడింగ్ ఎక్కువగా 'నన్ను బయటకు పంపించండి' శైలిలో అమ్మకాలు జరుగుతున్నాయి" అని ఆయన తెలిపారు.

టీసీఎస్ Q3 ఆర్థిక ఫలితాల సంగ్రహం:డిసెంబర్ త్రైమాసికంలో కంపెనీ ఏకీకృత నికర లాభం ఏడాదికి ఏడాది (YoY) 14% తగ్గి ₹10,657 కోట్లకు (Q3FY26) చేరింది, గత ఏడాది ఇదే కాలంలో ఇది రూ. 12,380 కోట్లు. ఆపరేషన్ల ద్వారా వచ్చే ఆదాయం YoY 5% పెరిగి రూ. 63,973 కోట్ల నుండి రూ. 67,087 కోట్లకు చేరుకుంది.

అయితే, వరుసగా చూస్తే (సీక్వెన్షియల్), కంపెనీ PAT Q2FY26లో ₹12,075 కోట్ల నుండి 12% తగ్గింది. ఇదే కాలంలో ఆదాయం మాత్రం జూలై-సెప్టెంబర్ త్రైమాసికంలో నమోదైన ₹65,799 కోట్ల నుండి 2% పెరిగి ₹67,087 కోట్లుగా నమోదైంది.