భారత్‌‌కు డబ్బే డబ్బు.. రూ. 2 లక్షల కోట్లు తీసుకొస్తున్న విదేశీ ఇన్వెస్టర్లు.. కారణం ఏంటంటే..

భారతదేశం బ్లూమ్‌బెర్గ్ గ్లోబల్ అగ్రిగేట్ ఇండెక్స్‌లో చేరే అవకాశాలు మరింతగా బలపడుతున్నాయి. ప్రపంచవ్యాప్తంగా భారీగా పెట్టుబడులు పెట్టే ప్రముఖ విదేశీ పోర్ట్‌ఫోలియో ఇన్వెస్టర్లు (FPIs) భారత బాండ్ మార్కెట్లో ఇటీవలి సంస్కరణలు, పారదర్శకత, సులభమైన యాక్సెస్ వంటి అంశాలను ప్రశంసిస్తూ.. భారత్ ఇప్పుడు అంతర్జాతీయ బాండ్ సూచికల్లో చోటు సంపాదించడానికి సిద్ధంగా ఉందని అభిప్రాయపడుతున్నారు. ఈ నేపథ్యంలో బ్లూమ్‌బెర్గ్ జనవరి 2026లో భారతదేశాన్ని తన ప్రధాన గ్లోబల్ అగ్రిగేట్ ఇండెక్స్‌లో చేర్చే అవకాశం ఉందనే అంచనాలు బలంగా వినిపిస్తున్నాయి.

ఈ మొత్తం ప్రక్రియలో కీలకమైన అంశం ఏంటంటే.. FPIs ఇచ్చిన పాజిటివ్ ఫీడ్ బ్యాక్. Bloomberg Global ఇండెక్స్ సర్వీసెస్ ఇటీవల పెట్టుబడిదారుల అభిప్రాయాలను సేకరించగా.. చాలా మంది విదేశీ పెట్టుబడిదారులు ఇప్పుడు భారత మార్కెట్ మరింత సులభంగా యాక్సెస్ చేయగలుగుతున్నారని పేర్కొన్నారు. ముఖ్యంగా FAR (Fully Accessible Route) కింద ఉన్న భారత ప్రభుత్వ బాండ్లలో పెట్టుబడి పెట్టడం ముందుతో పోలిస్తే చాలా సులభమైందని అనేక సంస్థలు గుర్తించాయి. యాక్సెస్ సౌలభ్యం, నియంత్రణ వ్యవస్థ బలోపేతం, మార్కెట్ లిక్విడిటీ పెరగడం.. ఇవన్నీ కలిపి భారత్‌ను ఆకర్షణీయ గమ్యస్థానంగా మార్చుతున్నాయి.

మరొక ముఖ్యమైన కారణం ఏంటంటే భారత ప్రభుత్వ బాండ్లపై ఉన్న అధిక రాబడి. ప్రపంచంలో పెద్ద ఆర్థిక వ్యవస్థలలో ఒకటైన చైనా ప్రస్తుతం 10-సంవత్సరాల బాండ్లపై 1.8-1.9 శాతం మాత్రమే రాబడి అందిస్తోంది. అయితే contrastలో భారత బాండ్లు అధిక రాబడి ఇస్తున్నాయి. ఇది సహజంగానే FPIs దృష్టిని భారతదేశం వైపు మళ్లిస్తోంది. అంతేకాకుండా, రూపాయి-డాలర్ మారకం విలువ (రూ. 88.6-రూ.88.8) గత కొన్ని నెలలుగా స్థిరంగా ఉండటం, పెట్టుబడిదారుల్లో నమ్మకాన్ని పెంచుతోంది. ఇప్పుడు భారత్‌లో పెట్టుబడి పెడితే మంచి యీల్డ్, మంచి స్థిరత్వం, మంచి దీర్ఘకాలిక లాభాలు అనే భావన FPIs మధ్య బలపడుతోంది.

ఈ సూచికలో భారతదేశం చేర్చబడితే దాని ప్రభావం గణనీయంగా ఉంటుంది. ఓ అంచనా ప్రకారం భారతదేశం దాదాపు 1 శాతం బరువు (weight) పొందే అవకాశం ఉంది. ఇది జరిగితే వచ్చే 10-12 నెలల్లో సుమారు 25 బిలియన్ డాలర్ల (దాదాపు రూ.2.2 లక్షల కోట్లు) విదేశీ పెట్టుబడులు భారత్‌లోకి ప్రవేశించవచ్చు.గతంలో JP మోర్గాన్ తన బాండ్ సూచికల్లో భారత బాండ్లను చేర్చినప్పుడు వచ్చిన పెట్టుబడి ప్రవాహం ఈ అంచనాకు బలమైన ఆధారంగా గుర్తించబడుతోంది. ఈ డబ్బు ప్రవాహం భారత బాండ్ మార్కెట్‌ను మాత్రమే కాదు, మొత్తం భారత ఆర్థిక వ్యవస్థను బలపరచగలదని నిపుణులు అంచనా వేస్తున్నారు.

ఇక బ్లూమ్‌బెర్గ్ నిర్ణయ ప్రక్రియ కూడా ఇప్పటికే చివరి దశలో ఉంది. పెట్టుబడిదారుల ఫీడ్బ్యాక్‌కు చివరి తేదీ నవంబర్ 30. ఆ తర్వాత ఫీడ్బ్యాక్‌ను సమీక్షించిన బ్లూమ్‌బెర్గ్ జనవరి 2026లో అధికారిక ప్రకటన చేసే అవకాశం ఉంది. అయితే, ఒకసారి ప్రకటించిన తర్వాత కూడా వాస్తవాత్మక చేరిక (actual inclusion) ప్రాసెస్ దాదాపు 10 నుంచి 12 నెలలు పడుతుంది. అంటే 2026 చివరికి భారతదేశం పూర్తిగా ప్రపంచ బాండ్ సూచికలో భాగమవుతుంది.

ఇప్పటికే భారతదేశం బ్లూమ్‌బెర్గ్ ఎమర్జింగ్ మార్కెట్ లోకల్ కరెన్సీ గవర్నమెంట్ ఇండెక్స్‌లో చేర్చబడింది. జనవరి 31, 2025 నుండి గ్లోబల్ పెట్టుబడుల్లో 10 శాతం నేరుగా భారత బాండ్లలోకి వచ్చే అవకాశం ఉంది. ఇది భారత్‌కు మరొక విజయ సూచికగా నిలిచింది.ఈ క్రమంలోనే, ప్రపంచ ఆర్థిక వేదికపై భారత బాండ్ మార్కెట్ ప్రాముఖ్యత వేగంగా పెరుగుతోంది. ఇప్పుడు గ్లోబల్ అగ్రిగేట్ ఇండెక్స్‌లో చేరడం ద్వారా భారత బాండ్ మార్కెట్‌కు అంతర్జాతీయ గుర్తింపు, భారీ పెట్టుబడులు, బలమైన విదేశీ నిధుల మద్దతును తీసుకురాగల కీలకమైన అడుగుగా నిపుణులు అభివర్ణిస్తున్నారు.