How to link pan with aadhar: నిమిషాల్లో పాన్-ఆధార్ లింక్ చేసే ఈజీ ప్రాసెస్ ఇదే!

ఈ రోజుల్లో బ్యాంకింగ్ పనుల నుండి ఐటీ రిటర్న్స్ దాఖలు చేసే వరకు ప్రతిదానికీ పాన్ కార్డ్ (PAN Card) అవసరం. అయితే, కేంద్ర ప్రభుత్వం పారదర్శకత కోసం పాన్ కార్డ్‌ను ఆధార్‌తో లింక్ చేయడం తప్పనిసరి చేసింది. ఒకవేళ మీరు నిర్దేశించిన గడువులోగా ఆధార్ పాన్ లింక్ చేయకపోతే.. మీ పాన్ కార్డ్ 'ఇన్‌ఆపరేటివ్' (Inoperative) అవుతుంది. అంటే అది ఉండి కూడా లేనట్టే! కాబట్టి వెంటనే దాన్ని ఎలా లింక్ చేయాలో (How to link pan with aadhar) తెలుసుకోండి!

పాన్-ఆధార్ లింక్ చేయకపోతే కలిగే నష్టాలు

మీ పాన్ కార్డ్ గనుక నిష్క్రియం అయితే మీరు ఎదుర్కొనే ప్రధాన సమస్యలు ఇవే..

• మీరు కొత్త బ్యాంక్ ఖాతా తెరవలేరు.
• మ్యూచువల్ ఫండ్స్ లేదా స్టాక్ మార్కెట్‌లో పెట్టుబడులు పెట్టడం సాధ్యపడదు.
• ఇన్‌కమ్ ట్యాక్స్ రీఫండ్స్ నిలిచిపోతాయి.
• టీడీఎస్ (TDS) ఎక్కువ మొత్తంలో కోత పడుతుంది.

ఆన్‌లైన్‌లో పాన్-ఆధార్ లింక్ చేసే విధానం

మీరు ఈ-ఫైలింగ్ పోర్టల్ ద్వారా చాలా సులభంగా ఈ ప్రక్రియను పూర్తి చేయవచ్చు. కింద ఉన్న స్టెప్స్ ఫాలో అవ్వండి..

1. అధికారిక వెబ్‌సైట్: ముందుగా ఆదాయపు పన్ను శాఖకు చెందిన అధికారిక వెబ్‌సైట్ incometax.gov.in కు వెళ్లండి.
2. లింక్ ఆధార్: హోమ్ పేజీలో ఎడమ వైపున ఉండే 'Quick Links' విభాగంలో 'Link Aadhaar' అనే ఆప్షన్‌పై క్లిక్ చేయండి.
3. వివరాల నమోదు: ఇప్పుడు మీ పాన్ నంబర్ , ఆధార్ నంబర్‌ను ఎంటర్ చేయండి.
4. వెరిఫికేషన్: మీ ఆధార్ కార్డులో ఉన్న విధంగా పేరు , మీ మొబైల్ నంబర్‌ను నమోదు చేయండి.
5. OTP ఎంటర్ చేయండి: మీ మొబైల్ నంబర్‌కు వచ్చే ఓటీపీని ఎంటర్ చేసి 'Validate' బటన్ నొక్కండి.

ఎస్‌ఎమ్‌ఎస్ (SMS) ద్వారా కూడా లింక్ చేయవచ్చు

మీకు ఇంటర్నెట్ సదుపాయం లేకపోతే, మీ ఫోన్ నుండి ఒక మెసేజ్ పంపడం ద్వారా కూడా ఈ పని పూర్తి చేయవచ్చు. మీ మొబైల్ మెసేజ్ బాక్స్‌లో UIDPAN అని టైప్ చేసి 567678 లేదా 56161 నంబర్‌కు పంపండి.

జరిమానా వివరాలు

ప్రభుత్వం ఇప్పటికే ఉచితంగా లింక్ చేసే గడువును ముగించింది. ప్రస్తుతం పాన్ - ఆధార్ లింక్ చేయడానికి రూ. 1,000 ఆలస్య రుసుము (Late fee) చెల్లించాల్సి ఉంటుంది. ఈ పేమెంట్ 'e-Pay Tax' సౌకర్యం ద్వారా చెల్లించిన తర్వాతే లింకింగ్ ప్రక్రియ పూర్తవుతుంది.

మీ లింక్ స్టేటస్ ఇలా చెక్ చేసుకోండి

మీకు ఇప్పటికే లింక్ అయిందో లేదో తెలియకపోతే, ఈ-ఫైలింగ్ వెబ్‌సైట్‌లోనే 'Link Aadhaar Status' పై క్లిక్ చేసి, మీ పాన్ , ఆధార్ నంబర్లు ఇస్తే సరిపోతుంది. ఒకవేళ "Your PAN is already linked to given Aadhaar" అని వస్తే, మీరు మళ్లీ చేయాల్సిన అవసరం లేదు.
మొత్తంగా చెప్పేదేంటంటే.. చివరి నిమిషం వరకు వేచి చూడకుండా ఈ రోజే మీ పాన్ కార్డ్‌ ను ఆధార్‌ తో అనుసంధానం చేయండి. దీనివల్ల భవిష్యత్తులో మీ ఆర్థిక లావాదేవీలకు ఎటువంటి ఆటంకం కలగదు.