మరింత ఈజీగా.. పోస్టాఫీస్‌లోను ఐటీ రిటర్న్స్ ఫైల్ చేయవచ్చు

పన్ను చెల్లింపుదారులకు ఇండియా పోస్ట్ గుడ్‌న్యూస్. మీ దగ్గరలోని పోస్టాఫీస్ సేవా కేంద్రాల్లో(CSC) ఐటీ రిటర్న్స్ దాఖలు చేసే అవకాశం కల్పిస్తోంది. ఈ మేరకు ఇండియా పోస్ట్ ఇటీవల ప్రకటించింది. దీంతో ఐటీ రిటర్న్స్ మరింత సులభం కానున్నాయి. దేశవ్యాప్తంగా లక్షలమంది వేతన జీవులు ఉన్నారు. వీరందరికీ ఇది ఎంతో ఊరట కలిగించే అంశం. సోషల్ మీడియా వేదిక అధికారిక ట్విట్టర్ హ్యాండిల్ ద్వారా ఈ మేరకు ప్రకటించింది.

మీ ఆదాయపు పన్ను రిటర్న్స్‌ను దాఖలు చేయడానికి చాలా దూరం వెళ్లవలసిన అవసరం లేదని, మీ సమీప పోస్టాఫీస్ CSC కౌంటర్‌లో ఐటీ రిటర్న్స్‌ను సులభంగా దాఖలు చేయవచ్చునని ఇండియా పోస్ట్ ప్ర‌క‌టించింది. CSC అంటే కామన్ సర్వీసెస్ సెంటర్. దేశంలోని గ్రామీణ ప్రాంతాల్లో వివిధ ఎలక్ట్రానిక్ సేవలు అందించేందుకు ఇవి యాక్సెస్ పాయింట్స్‌గా పని చేస్తాయి. ఈ సెంటర్ ద్వారా ప్రజలు వివిధ ఇతర ప్రభుత్వ ప్రయోజనాలు, సమాచారం పొందవచ్చు.

పోస్టాఫీస్, బ్యాంకింగ్, బీమా సేవలు వంటి వివిధ ఆర్థిక సేవల కోసం దేశవ్యాప్తంగా పోస్టాఫీస్ సీఎస్‌సీ కౌంటర్లు పనిచేస్తాయి. కేంద్ర ప్రభుత్వం డిజిటల్ ఇండియా కార్యక్రమం కింద భారత పౌరులకు వివిధ ఈ-సేవలను అందిస్తోంది. అయితే ఆన్‌లైన్‌లో రిటర్న్స్ దాఖ‌లు చేసుకోగ‌లిగేవారు కొత్త ఆదాయపు పన్ను వెబ్‌సైట్‌లోకి లాగ్-ఇన్ కావడం ద్వారా ఐటీఆర్‌ను సమర్పించవచ్చు.