భూటాన్‌లో పర్యటిస్తున్నారా? జూలై నుంచి రూ.1,200 చెల్లించాలి!

ఈ ఏడాది జూలై నుంచి భూటాన్ పర్యటనకు వెళ్లే భారత పర్యాటకులకు అలర్ట్! భూటాన్ దిగువ సభ సోమవారం ఓ చట్టానికి ఆమోదం తెలిపింది. తమ దేశ సుస్థిర అభివృద్ధి కోసం భారత్‌తో పాటు బంగ్లాదేశ్, మాల్దీవుల నుంచి వచ్చే పర్యాటకులు రోజుకు రూ.1,200 చెల్లించాలనే చట్టానికి దిగువ సభ ఆమోదం తెలిపింది.

పర్యావరణానికి ప్రాధాన్యత.. అందుకే

తమ దేశ సుస్థిర అభివృద్ధి కోసం ఈ నిర్ణయం తీసుకున్నట్లు తెలిపింది. హిమాలయన్ కింగ్‌డమ్ భూటాన్ పర్యావరణానికి ప్రాధాన్యత ఇస్తుంది. అయితే భారత్ సహా పై దేశాల నుంచి పర్యాటకుల సంఖ్య రోజు రోజుకు భారీగా పెరుగుతోంది. దీంతో రోజుకు రూ.1200 చెల్లించాలనే నిర్ణయాన్ని తీసుకుంది.

పర్యాటకులు రోజు రోజుకు పెరుగుతుండటంతో..

పైమూడు దేశాల నుంచి భూటాన్‌కు వచ్చే పర్యాటకుల సంఖ్య అంతకుముందు ఏడాది కంటే 2019లో 10 శాతం మేర పెరిగింది. ఈ బిల్లు భూటాన్ నేషనల్ అసెంబ్లీలో కూడా ఇంకా చర్చల్లో ఉంది. అయితే ఈ ఫీజు నామమాత్రమే పెరిగే అవకాశముందని అధికారులు అంటున్నారు.

రూ.18,000 చెల్లిస్తున్న అంతర్జాతీయ పర్యాటకులు

ప్రస్తుతం అంతర్జాతీయ పర్యాటకులు ప్రతిరోజు 250 డాలర్లు (దాదాపు రూ.18,000) చెల్లిస్తున్నారు. 250 డాలర్లలో 65 డాలర్లు సుస్థిర అభివృద్ధి ఫీజు కింద వసూలు చేస్తున్నారు. 40 డాలర్లు వీసా ఛార్జీగా వసూలు చేస్తున్నారు. ప్రస్తుతం భారత్, బంగ్లాదేశ్, మాల్దీవుల నుంచి వెళ్లే పర్యాటకులు ఎలాంటి ఛార్జీలు చెల్లించాల్సిన అవసరం లేదు. ప్రస్తుత చట్టం జూలై నుంచి అమలైతే భారతీయులు సుస్థిర అభివృద్ధి ఫీజు, పర్మిట్ ప్రాసెసింగ్ ఫీజు కింద కొంత చెల్లించాల్సి ఉంటుంది.