వెండి ధరలు భారీగా పెరిగాయి.. 3 రోజుల్లో 15 వేలు జంప్.. షాకవుతున్న ఇన్వెస్టర్లు..

దేశీయ, అంతర్జాతీయ కమోడిటీ మార్కెట్లలో వెండి ధరలు రికార్డు స్థాయిలో విపరీతమైన ర్యాలీని నమోదు చేస్తున్నాయి. గడిచిన కేవలం మూడు సెషన్ల వ్యవధిలోనే భారతీయ మార్కెట్‌లో వెండి ధరలు ఏకంగా రూ. 15 వేల మేర పెరిగి ఇన్వెస్టర్లను, కొనుగోలుదారులను ఆశ్చర్యపరిచాయి. బలహీనపడిన అమెరికన్ డాలర్, అనిశ్చితంగా ఉన్న యూఎస్ ట్రెజరీ ఈల్డ్స్ (రాబడులు) కారణంగా సురక్షితమైన ఇన్వెస్ట్‌మెంట్ మార్గంగా భావించే విలువైన లోహాలకు డిమాండ్ అమాంతం పెరిగింది.

గ్లోబల్ మార్కెట్‌లో Silver కామెక్స్ 2.47 శాతం లాభపడి ఔన్సుకు 70.59 డాలర్ల వద్దకు చేరగా.. స్పాట్ సిల్వర్ 2.29 శాతం పెరిగి 69.65 డాలర్ల వద్ద ట్రేడ్ అవుతోంది. ఈ గ్లోబల్ ట్రెండ్‌కు అనుగుణంగా భారతదేశంలో ఎమ్‌సీఎక్స్ ట్రేడింగ్‌లో వెండి ధర 1.44 శాతం పెరిగి కిలోకు రూ. 2,46,751 కి చేరింది. వెండితో పాటే బంగారం కూడా ఈ బుల్లిష్ ట్రెండ్‌లో పోటీపడింది. అంతర్జాతీయంగా స్పాట్ గోల్డ్ 1.51 శాతం పెరిగి ఔన్సుకు 4,584.93 డాలర్లకు చేరగా.. దేశీయ ఎంసీఎక్స్‌లో 10 గ్రాముల పసిడి ధర 1.24 శాతం లాభపడి రూ. 1,61,397 వద్ద స్థిరపడింది.

ఈ ఊహించని ధరకు ప్రధానంగా మూడు అంతర్జాతీయ ఆర్థిక పరిణామాలు ఊతమిచ్చాయి. బ్లూమ్‌బెర్గ్ డాలర్ స్పాట్ ఇండెక్స్.. ఇటీవల 0.3 శాతం పడిపోవడంతో డాలర్ విలువ పతనమైంది. దీనివల్ల ఇతర కరెన్సీలను కలిగి ఉన్న విదేశీ కొనుగోలుదారులకు డాలర్ ఆధారిత పసిడి, వెండి లోహాలు మరింత చౌకగా మారి కొనుగోళ్ల జోరు పెరిగింది. మరోవైపు తీవ్ర ఒడిదుడుకుల తర్వాత యూఎస్ 10-ఏళ్ల ట్రెజరీ ఈల్డ్స్ రెండు బేసిస్ పాయింట్లు తగ్గి 4.69 శాతానికి పడిపోగా.. జర్మనీ, బ్రిటన్ బాండ్ ఈల్డ్స్ కూడా వరుసగా తగ్గుముఖం పట్టాయి. బాండ్లపై వచ్చే రాబడులు తగ్గినప్పుడు, రాబడి లేని బంగారం, వెండి లాంటి లోహాలలో పెట్టుబడి పెట్టడానికి అయ్యే అవకాశ వ్యయం తగ్గి ఇన్వెస్టర్లు బులియన్ వైపు మళ్లుతారు.

Also Read

బంగారం, వెండి కొనడం ఆపేయండి.. ఈ నెల చివరలో భారీ ర్యాలీ తప్పదంటున్న నిపుణులు..

వీటికి తోడు అమెరికా ప్రభుత్వ వ్యయం పెరగడం, సుదీర్ఘ ద్రవ్యోల్బణ ప్రమాదాలు, బడ్జెట్ లోటుపై ప్రపంచ బాండ్ మార్కెట్లలో తీవ్ర ఆందోళన వ్యక్తమవుతోంది. ఈ దీర్ఘకాలిక రుణ వ్యయాలను తగ్గించడానికి యూఎస్ ట్రెజరీ జోక్యం చేసుకుని ఆకస్మిక ద్రవ్య లభ్యత పెంపు, బైబ్యాక్‌లను విస్తరించేందుకు సిద్ధమైనట్లు ప్రకటించింది. ఈ రుణ ఆందోళనల దృష్ట్యా భద్రమైన ప్రత్యామ్నాయ ఆస్తిగా ఇన్వెస్టర్లు వెండి, బంగారాలను ఎంచుకుంటున్నారు.

సాధారణంగా వెండి అనేది కేవలం ఆభరణాలు లేదా పెట్టుబడి సాధనమే కాకుండా పారిశ్రామిక రంగానికి అత్యంత కీలకమైన లోహం కావడం వల్ల, ఈ ద్వంద్వ డిమాండ్ కారణంగా బంగారం కంటే కూడా వెండి ధరలలో మార్కెట్ స్పందన మరింత వేగంగా నమోదవుతోంది. అమెరికా ఆర్థిక విధానాల నుంచి వచ్చే తదుపరి సంకేతాలు, ద్రవ్యోల్బణ గణాంకాల ఆధారంగా ఈ వెండి ర్యాలీ ఎంతవరకు కొనసాగుతుందనేది ఆధారపడి ఉంటుందని మార్కెట్ నిపుణులు అంచనా వేస్తున్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.