వెండి ధరలపై షాకింగ్ న్యూస్.. ఆ ఒక్కటి జరిగితే కుప్పకూలడం..లేదంటే భారీగా పెరగడం ఖాయం.. ఇంతకీ ఏంటది..

అంతర్జాతీయంగా భౌగోళిక, రాజకీయ పరిస్థితులు మళ్లీ ఉద్రిక్తకరంగా మారుతున్నాయి. అగ్రరాజ్యం అమెరికాలో నెలకొన్న పరిస్థితులు ఇప్పుడు మళ్లీ ప్రపంచవ్యాప్తంగా ఆందోళనకర పరిస్థితిని తీసుకువస్తున్నాయి. ముఖ్యంగా పెట్టుబడిదారుల గుండెల్లో రైళ్లు పరిగెత్తిస్తున్నాయి. డాలర్ బలహీనం, అమెరికా స్టాక్ మార్కెట్లలో నెలకొన్న పతనం ఇప్పుడు ఇన్వెస్టర్లను సేఫ్ డిమాండ్ వైపు నడిపిస్తున్నాయి.

దీంతో బంగారం, వెండి ధరలు భగ్గమనే పరిస్థితికి వచ్చాయి. పెట్టుబడిదారులు డాలర్ ఆధారిత ఆస్తులను వదిలేసి విలువైన లోహాల మీదకు తమ పెట్టుబడులను మళ్లించారు. దీంతో బంగారం, వెండి ధరల్లో భారీ పెరుగుదల చోటు చేసుకుంది. ఫిబ్రవరి 23, 2026న అంతర్జాతీయ మార్కెట్‌లో వెండి ధరలు భారీ ర్యాలీని నమోదు చేశాయి.

ఒక్క రోజులోనే Silver (XAG/USD) ధర దాదాపు 6 శాతం ఎగబాకి 87.30 డాలర్ల స్థాయికి చేరింది. ఇదే సమయంలో బంగారం కంటే Silver చాలా వేగంగా పెరగడం మార్కెట్ దృష్టిని ఆకర్షించింది. గత కొన్ని వారాలుగా కనిపించిన ఒడిదుడుకుల తర్వాత వెండి తిరిగి బలంగా పుంజుకోవడం పెట్టుబడిదారుల్లో కొత్త ఉత్సాహాన్ని నింపింది. విశ్లేషకులు ఇప్పుడు వెండి ధర మళ్లీ 100 డాలర్ల స్థాయిని చేరే అవకాశాలపై దృష్టి పెడుతున్నారు.

ఇటీవలి ర్యాలీకి ప్రధాన కారణాల్లో ఒకటి అమెరికా వాణిజ్య విధానాల్లో వచ్చిన మార్పులు. అధ్యక్షుడు ట్రంప్ ప్రపంచవ్యాప్తంగా 15 శాతం సుంకాలను విధిస్తూ తీసుకున్న నిర్ణయం మార్కెట్‌లో అనిశ్చితిని పెంచింది. వాణిజ్య యుద్ధాలు, ద్రవ్యోల్బణం మళ్లీ పెరిగే ప్రమాదం ఉన్న నేపథ్యంలో పెట్టుబడిదారులు డాలర్‌కు ప్రత్యామ్నాయంగా ఉన్న హార్డ్ ఆస్తుల వైపు మొగ్గు చూపుతున్నారు. ఈ పరిస్థితుల్లో వెండి, బంగారంతో పోలిస్తే ఎక్కువ అస్తిరత కలిగిన లోహం కావడంతో,ధరలు వేగంగా మార్పులకు లోనయ్యాయి.

ట్రంప్ దెబ్బకు యుఎస్ స్టాక్ మార్కెట్ ఢమాల్.. బంగారం, వెండి వైపు పరిగెత్తిన ఇన్వెస్టర్లు.. పసిడి ధరలు పైపైకి..

భౌగోళిక రాజకీయ పరిస్థితులు కూడా వెండి ధరలకు బలమైన మద్దతునిస్తున్నాయి. ఇరాన్ అణు కార్యక్రమంపై అమెరికా కఠిన హెచ్చరికలు జారీ చేయడం, మధ్యప్రాచ్యంలో ఉద్రిక్తతలు పెరగడం వల్ల లోహాలపై రిస్క్ ప్రీమియం పెరిగింది. ఇలాంటి వార్తలకు వెండి ఎక్కువగా స్పందించడం వల్లే తాజా ర్యాలీ మరింత బలంగా కనిపిస్తోంది. మరో కీలక అంశం సరఫరా లోటు అని చెప్పవచ్చు.

సిల్వర్ ఇన్‌స్టిట్యూట్ అంచనాల ప్రకారం.. 2026లో వెండి మార్కెట్ వరుసగా ఆరో సంవత్సరంగా కొరతను ఎదుర్కోనుంది. ఈ ఏడాది సుమారు 67 మిలియన్ ఔన్సుల సరఫరా లోటు ఉండొచ్చని అంచనా. సౌర పరిశ్రమ ఒక్కో ప్యానెల్‌కు వినియోగించే వెండి పరిమాణాన్ని తగ్గిస్తున్నప్పటికీ.. ఆ లోటును AI డేటా సెంటర్లు, ఎలక్ట్రిక్ వాహనాలు, అధునాతన సెమీకండక్టర్లు భర్తీ చేస్తున్నాయి. ముఖ్యంగా ఆర్టిఫిషియల్ ఇంటెలిజెన్స్ విస్తరణతో వెండి పారిశ్రామిక వినియోగం గణనీయంగా పెరుగుతోంది.

సాంకేతిక విశ్లేషణ పరంగా చూస్తే.. వెండి ధర కీలకమైన రెసిస్టెన్స్ స్థాయిని దాటింది. 4-గంటల చార్ట్‌లో XAG/USD 84.91 డాలర్ల స్థాయిపైన స్థిరపడటం దీర్ఘకాలిక దిగజారుడు ధోరణికి ముగింపు పలికినట్లుగా భావిస్తున్నారు. ప్రస్తుతం 82.20 డాలర్ల ప్రాంతంలో ఉన్న 50-పీరియడ్, 100-పీరియడ్ మూవింగ్ యావరేజ్‌లు బలమైన మద్దతుగా మారాయి. రిలేటివ్ స్ట్రెంత్ ఇండెక్స్ (RSI) 60 పైన ఉండటం కొనుగోలు దారుల ఆధిపత్యాన్ని సూచిస్తోంది. అయితే ఇంకా ఓవర్‌బాట్ స్థాయికి చేరలేదు.

ముందు రోజుల్లో వెండి ధరలపై భిన్న అభిప్రాయాలు వినిపిస్తున్నాయి. బుల్లిష్ దృశ్యంలో వాణిజ్య యుద్ధాలు కొనసాగితే, AI, గ్రీన్ ఎనర్జీ డిమాండ్ బలంగా ఉంటే ధరలు 100 డాలర్ల నుంచి 133 డాలర్ల వరకు చేరే అవకాశం ఉందని కొందరు విశ్లేషకులు చెబుతున్నారు. సాధారణ పరిస్థితుల్లో వెండి 81 డాలర్ల నుంచి 92 డాలర్ల మధ్య కదలాడవచ్చని అంచనా. అయితే.. సుంకాల సమస్యలు త్వరగా పరిష్కారమై, ప్రపంచ ఆర్థిక వృద్ధి మందగిస్తే ధరలు 64 డాలర్ల నుంచి 72 డాలర్ల వరకు పడిపోయే ప్రమాదం కూడా ఉందని హెచ్చరిస్తున్నారు.

ఏదేమైనా ప్రస్తుత అనిశ్చిత కాలంలో వెండి ఒకవైపు సురక్షిత పెట్టుబడిగా.. మరోవైపు AI, గ్రీన్ టెక్నాలజీలకు కీలక లోహంగా మారింది. ధరల్లో అస్తిరత ఉన్నప్పటికీ..80 డాలర్ల పైన బలమైన మద్దతు కొనసాగుతుందని, సమీప కాలంలో 87 డాలర్ల నుంచి 92 డాలర్ల మధ్య మార్కెట్ కదలికలు కనిపించే అవకాశం ఉందని మార్కెట్ వర్గాలు భావిస్తున్నాయి.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.