వెండి కొనుగోలు వెంటనే ఆపేయండి.. భవిష్యత్తులో భారీగా పతనమవుతాయంటున్న అన్మోల్ సిల్వర్ సీఈఓ..

Silver Investors Alert: ఈ ఏడాది నమోదు చేసిన గరిష్ఠ స్థాయిల నుండి పసిడితో పాటు వెండి ధరలు దాదాపు 25 శాతం మేర భారీగా క్షీణించినప్పటికీ.. సమీప భవిష్యత్తులో ఈ విలువైన లోహంపై ఒత్తిడి ఇలాగే కొనసాగవచ్చని అన్మోల్ సిల్వర్ (Anmol Silver) సీఈఓ కిషోర్ రూన్‌వాల్ అభిప్రాయపడ్డారు. పండుగలు, వివాహాల సీజన్ సమీపిస్తుండటంతో తగ్గిన ధరలు రిటైల్ వినియోగదారులను నగల దుకాణాల వైపు ఆకర్షిస్తున్నప్పటికీ.. పెట్టుబడిదారుల సెంటిమెంట్ మాత్రం ఇంకా ప్రతికూలంగానే ఉందని ఆయన పేర్కొన్నారు.

కిషోర్ రూన్‌వాల్ విశ్లేషణ ప్రకారం.. వెండి ధరలు ఇప్పటికీ కనిష్ట స్థాయికి (Bottom Out) చేరలేదని, రాబోయే రోజుల్లో పతనం మరింత ప్రమాదకరంగా మారే అవకాశం ఉందని ఆందోళన వ్యక్తం చేశారు. ప్రస్తుత ప్రతికూల ధోరణి కొనసాగితే, భౌతిక మార్కెట్‌లో (Physical Market) వెండి ధర కిలోకు రూ. 1.80 లక్షల నుండి రూ. 1.85 లక్షల స్థాయికి, అలాగే ఎమ్‌సీఎక్స్ (MCX) ఫ్యూచర్స్ మార్కెట్‌లో రూ. 1.75 లక్షల నుండి రూ. 1.80 లక్షల స్థాయికి పడిపోయే ప్రమాదం ఉందని ఆయన హెచ్చరించారు.

ధరల తగ్గుదలకు ప్రధాన కారణాలు:

1. అధిక యూఎస్ వడ్డీ రేట్లు:అమెరికా ఫెడరల్ రిజర్వ్ వడ్డీ రేట్లను సుదీర్ఘకాలం పాటు అధికంగా కొనసాగించడం వల్ల బాండ్ ఈల్డ్స్ పెరుగుతూ బులియన్ ఉత్పత్తులపై పెట్టుబడి ఆకర్షణను తగ్గిస్తున్నాయి.
2. అంతర్జాతీయ క్రూడ్ భయాలు: పెరుగుతున్న ముడి చమురు ధరలు అంతర్జాతీయంగా ద్రవ్యోల్బణ భయాలను మళ్లీ పెంచుతున్నాయి.
3. భౌగోళిక రాజకీయ అనిశ్చితి: పశ్చిమ ఆసియాలోని దాడులు మరియు ఉద్రిక్తతల వల్ల పెట్టుబడిదారులు తీవ్ర హెచ్చుతగ్గులకు గురవుతున్నారు.

పండుగ డిమాండ్ & సరఫరా పరిస్థితి:
అంతర్జాతీయ ఒత్తిళ్లు ఉన్నప్పటికీ, భారత్‌లో దీపావళి, పెళ్లిళ్ల సీజన్ దృష్ట్యా తక్కువ ధరలు వినియోగదారులకు వరంగా మారాయని ఆయన తెలిపారు. ప్రస్తుతం రీటైల్ షాపుల్లో రద్దీ పెరుగుతోందని, ధరలు ఈ తక్కువ స్థాయిల్లోనే మరో వారం రోజులు కొనసాగితే కొనుగోళ్లు విపరీతంగా పుంజుకుంటాయని రూన్‌వాల్ స్పష్టం చేశారు. పెళ్లిళ్ల సీజన్‌లో ముందుగా బులియన్ మరియు నాణేల (Coins) కోసం పెట్టుబడి డిమాండ్ పెరిగి, ఆ తర్వాత ఆభరణాలు, వెండి పాత్రల కొనుగోళ్లు వేగం పుంజుకుంటాయని అంచనా వేశారు.

అలాగే ఇటీవల ప్రభుత్వం తీసుకున్న నిర్ణయాల వల్ల దిగుమతి లైసెన్సింగ్ నిబంధనలు సులభతరమయ్యాయని, దీనివల్ల దేశీయంగా సరఫరా కొరత ఏర్పడి ధరలు పెరిగే అవకాశం లేదని ఆయన స్పష్టం చేశారు. విపణిలో స్వల్పకాలిక ఒత్తిడి ఉన్నప్పటికీ.. దీర్ఘకాలికంగా నాణేలు, భౌతిక వెండి రూపంలో చేసే పెట్టుబడులు ఇతర మార్గాల కంటే ఉత్తమ రాబడులను అందిస్తాయని రూన్‌వాల్ ధీమా వ్యక్తం చేశారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.