Silver: వెండి ధరలు నిముషాల్లో మారిపోతున్నాయి! అసలేం జరుగుతోంది?

నేడు బులియన్ మార్కెట్‌లో పెను ప్రకంపనలు రేగాయి. అంతర్జాతీయ మార్కెట్లలో చోటు చేసుకున్న భారీ సెల్-ఆఫ్ కారణంగా.. గురువారం ఉదయం భారతీయ కమోడిటీ మార్కెట్ (MCX)లో వెండి (Silver) ధరలు అమాంతం పడిపోయాయి. ట్రేడింగ్ ప్రారంభమైన కొద్ది నిమిషాల్లోనే వెండి ధర సుమారు 9 శాతం మేర క్షీణించి ఇన్వెస్టర్లను షాక్‌ కు గురిచేసింది.

గ్లోబల్ మార్కెట్‌లో ఏం జరిగింది?

నేడు ఆసియా పసిఫిక్ రీజియన్‌ లో ట్రేడింగ్ మొదలైనప్పుడు.. అంతర్జాతీయ వెండి ధరలు ఒకానొక దశలో ఔన్స్‌ కు 90 డాలర్ల వద్ద స్థిరంగా కనిపించాయి. అయితే నిమిషాల వ్యవధిలోనే అమ్మకాల ఒత్తిడి పెరగడంతో ధర ఏకంగా 75 డాలర్ల కంటే కిందికి పడిపోయింది. ప్రస్తుతం గ్లోబల్ స్పాట్ ధరలు 13 శాతం పైగా నష్టాల్లో కొనసాగుతున్నాయి. ఈ ప్రభావం నేరుగా భారతీయ మార్కెట్లపై పడింది.

ఎంసీఎక్స్ (MCX) లో తాజా పరిస్థితి

భారతదేశంలో ఎంసీఎక్స్ మార్కెట్ మొదట 6 శాతం నష్టంతో ప్రారంభమైంది. అయితే మదుపరులు అమ్మకాలకు ఎగబడటంతో కొద్దిసేపటికే నష్టం 9 శాతానికి చేరింది. కేవలం కొద్ది నిమిషాల్లోనే వెండి ధర కిలోకు రూ. 24,196 తగ్గి, ప్రస్తుతం రూ. 2,44,654 వద్ద ట్రేడ్ అవుతోంది. కొద్ది రోజుల క్రితమే కిలో వెండి ధర రూ. 4 లక్షల రికార్డు స్థాయిని తాకిన నేపథ్యంలో ఈ పతనం అందరినీ ఆశ్చర్యపరిచింది.

అదనపు మార్జిన్ విధింపు

మార్కెట్లో విపరీతమైన ఒడిదుడుకులు వస్తున్న నేపథ్యంలో ఎంసీఎక్స్ (MCX) రిస్క్ మేనేజ్‌మెంట్‌ లో భాగంగా అదనపు మార్జిన్లను ప్రకటించింది.

• గురువారం నుంచి: వెండి ఫ్యూచర్ కాంట్రాక్టులపై 4.5%, బంగారంపై 1% అదనపు మార్జిన్ అమల్లోకి వచ్చింది.
• శుక్రవారం (ఫిబ్రవరి 6) నుంచి: వెండిపై మరో 2.5%, బంగారంపై మరో 2% మార్జిన్ పెరుగుతుంది. దీనివల్ల మొత్తం మీద వెండిపై 7 శాతం, బంగారంపై 3 శాతం అదనపు మార్జిన్ భారం పడనుంది. మార్కెట్ ఒత్తిడిని తగ్గించడానికి ఎక్స్‌ఛేంజ్ ఈ నిర్ణయం తీసుకుంది.

సిల్వర్ ఈటీఎఫ్ (Silver ETF) లపై ప్రభావం

వెండి ధరలు తగ్గడంతో సిల్వర్ ఈటీఎఫ్‌ లు కూడా 13 నుంచి 15 శాతం నష్టాల్లో ట్రేడ్ అవుతున్నాయి. నిప్పన్ ఏఎంసీ సిల్వర్ ఈటీఎఫ్ వంటి సంస్థలు భారీగా లెవరేజ్ పొజిషన్లను కలిగి ఉండటంతో వాటిపై ప్రభావం ఎక్కువగా ఉంది. బంగారంతో పోలిస్తే వెండిలోనే అధిక పతనం కనిపిస్తోంది. గడిచిన రెండు రోజుల్లో వచ్చిన చిన్నపాటి రికవరీని ఈ నేటి పతనం పూర్తిగా తుడిచిపెట్టేసింది.

ఇన్వెస్టర్లు జాగ్రత్తగా ఉండాలి

ప్రస్తుత మార్కెట్ పరిస్థితులు అత్యంత అనిశ్చితంగా ఉన్నాయి. అంతర్జాతీయ పరిణామాలు, ఎక్స్‌ఛేంజ్ మార్జిన్ నిబంధనల మార్పుల వల్ల ధరలు మరింత అస్థిరంగా ఉండే అవకాశం ఉంది. వెండిలో పెట్టుబడి పెట్టేవారు లేదా ట్రేడింగ్ చేసేవారు ఈ వేగవంతమైన మార్పులను గమనిస్తూ జాగ్రత్తగా వ్యవహరించడం ఉత్తమం.