Loan Interest Rates: లోన్లు తీసుకున్న వారికి షాక్.. ఆర్బీఐ రెపో రేటు పెంపుతో పెరగనున్న రుణ భారం..!

రిజర్వ్ బ్యాంక్ ఆఫ్ ఇండియా ద్రవ్య విధాన కమిటీ (MPC) బుధవారం రెపో రేటును 25 బేసిస్ పాయింట్లు పెంచిన సంగతి తెలిసిందే. దీంతో రుణ వ్యయాలు పెరగనున్నాయి. మారుతున్న ప్రపంచ, దేశీయ ప్రమాదాల నేపథ్యంలో ద్రవ్యోల్బణ ఒత్తిళ్లను అదుపులోకి తీసుకురావడానికి కేంద్ర బ్యాంక్ ప్రయత్నిస్తున్నందున, ఈ చర్య కఠినమైన ద్రవ్య విధానానికి సంకేతంగా ఉంది. గృహ రుణగ్రహీతలకు ఈ రేటు పెంపు వలన రుణ కాలపరిమితి పెరగడం లేదా ఈఎంఐలు అధికమయ్యే అవకాశం ఉంది. ముఖ్యంగా ఫ్లోటింగ్-రేట్ రుణాలు తీసుకున్నవారికి ఇది మరింత భారంగా ఉంటుంది. రీసెట్ సైకిల్స్, ట్రాన్స్మిషన్ టైమ్‌లైన్‌లను బట్టి బ్యాంకులు ఈ పెంపును క్రమంగా వినియోగదారులకు బదిలీ చేసే అవకాశం ఉంది.

ఉదాహరణకు 25 సంవత్సరాల కాలపరిమితి గల రూ. 50 లక్షల గృహ రుణానికి, వడ్డీ రేట్లలో 25 బేసిస్ పాయింట్ల (bps) పెరుగుదల వల్ల నెలవారీ ఈఎంఐ దాదాపు రూ. 816 మేర పెరగవచ్చు. ఒకవేళ రుణగ్రహీతలు కాలపరిమితిని మార్చకుండా ఉంచాలని ఎంచుకుంటే, దీనివల్ల రుణ కాలపరిమితిలో మొత్తం వడ్డీ భారం దాదాపు రూ. 2.45 లక్షల మేర పెరిగే అవకాశం ఉంది. 25 సంవత్సరాల కాలానికి 7.5 శాతం వడ్డీ రేటుతో రూ. 30 లక్షల రుణంపై నెలవారీ ఈఎంఐ సుమారు రూ. 490, రూ. 40 లక్షల రుణంపై రూ. 654,, రూ. 50 లక్షల రుణంపై రూ. 817 మేర పెరగవచ్చు. పూర్తి కాలవ్యవధిలో, అదనపు వడ్డీ లెక్కెస్తే రూ.30 లక్షల రుణంపై రూ. 1.5 లక్షలు, రూ.40 లక్షల రుణంపై రూ. 1.96 లక్షలు, రూ.50 లక్షల రుణంపై రూ. 2.45 లక్షల వరకు ఉంటుంది.

25 బేసిస్ పాయింట్ల రేటు పెంపు తర్వాత కూడా రుణగ్రహీత ఈఎంఐని రూ. 36,950 వద్ద యథాతథంగా ఉంచితే, రుణ కాలవ్యవధి సుమారు 22 నెలలు పెరిగే అవకాశం ఉంది. దీంతో తిరిగి చెల్లించే కాలం 25 సంవత్సరాల నుంచి దాదాపు 27 సంవత్సరాలకు చేరుతుంది. ఫ్లోటింగ్-రేట్ రుణగ్రహీతలు తమ రుణాలు పెరిగిన ప్రామాణిక రేటుకు రీసెట్ అయిన వడ్డీ చెల్లించాల్సి వచ్చే అవకాశం ఉంది. కొంతమంది రుణదాతలు, ఈఎంఐకి బదులుగా రుణ కాలపరిమితిని పెంచుకోవడానికి రుణగ్రహీతలకు అవకాశం ఉంది. దీనివల్ల నెలవారీ నగదు ప్రవాహంపై తక్షణ ప్రభావం తగ్గినప్పటికీ, రుణ కాలపరిమితి మొత్తం మీద చెల్లించే వడ్డీ పెరుగుతుంది.

ప్రపంచ అనిశ్చితుల నేపథ్యంలో ముఖ్యంగా ముడి చమురు ధరల అస్థిరత, పశ్చిమ ఆసియా పరిస్థితుల వల్ల ద్రవ్యోల్బణ ఒత్తిళ్లను నియంత్రించడానికి ఆర్‌బీఐ చర్యలు చేపట్టింది. ఇందులో భాగంగానే 25 బేసిస్ పాయింట్ల రెపో రేటు పెంచింది. వడ్డీ రేట్ల తగ్గింపునకు ఆస్కారమే లేదని బ్యాంక్‌బజార్ సీఈఓ అధిల్ షెట్టి అన్నారు. తదుపరి చర్యగా వడ్డీ రేట్ల పెంపు లేదా నిలుపుదల మాత్రమే ఉంటుందని ఆర్‌బిఐ చెబుతున్నందున, రుణగ్రహీతలు తక్కువ ఈఎంఐల కోసం ప్రణాళికలు వేసుకోకూడదని సూచించారు. ముందు ముందు, బ్యాంకులు వడ్డీ రేట్ల పెంపును ఎంత వేగంగా అమలు చేస్తున్నాయో రుణగ్రహీతలు నిశితంగా గమనించాలన్నారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.