యాడ్-ఆన్ క్రెడిట్ కార్డ్ అంటే ఏంటి? అది మీ కుటుంబానికి నిజంగా అవసరమా.. లాభనష్టాలు ఇవే!

మీరు కాలేజీకి వెళ్లే మీ పిల్లల రోజువారీ ఖర్చులు, ప్రయాణాల కోసం క్రమంతప్పకుండా డబ్బు పంపాల్సి వస్తోందా? లేదా మీరు, మీ భాగస్వామి నిత్యావసర వస్తువులు, కరెంట్ బిల్లుల కోసం ప్రతి నెల ఒకరికొకరు డబ్బులు ట్రాన్స్‌ఫర్ చేసుకుంటూ ఇబ్బంది పడుతున్నారా? ఇలాంటి పరిస్థితుల్లో బ్యాంకులు మనకు చూపే ఒక ఈజీ సొల్యూషన్.. 'యాడ్-ఆన్ క్రెడిట్ కార్డ్' (add on credit card).
కుటుంబ సభ్యులకు విడిగా కొత్త క్రెడిట్ కార్డ్ అకౌంట్ ఓపెన్ చేసే పని లేకుండా, మీ ప్రస్తుత కార్డుకు లింక్ చేస్తూ అదనంగా ఇచ్చే కార్డునే యాడ్-ఆన్ లేదా సప్లిమెంటరీ కార్డ్ అంటారు. వినడానికి ఇది చాలా సింపుల్‌గా అనిపించినా, దీని వెనుక ఒక ముఖ్యమైన ట్విస్ట్ ఉంది: "ఖర్చు వాళ్లు చేసినా.. బిల్లు మాత్రం మీరే కట్టాలి!"

క్రెడిట్ లిమిట్ షేరింగ్.. కొత్త అకౌంట్ కాదు!

యాడ్-ఆన్ కార్డ్ చూడటానికి వేరే నంబర్‌తో, విడిగా స్వైప్ చేసుకునేలా సాధారణ క్రెడిట్ కార్డు లాగే ఉంటుంది. ఆన్‌లైన్ షాపింగ్‌లు కూడా చేసుకోవచ్చు. కానీ బ్యాక్‌గ్రౌండ్‌లో ఇది మీ మెయిన్ అకౌంట్‌కే లింక్ అయి ఉంటుంది. బ్యాంకు దీనికి విడిగా ఎలాంటి క్రెడిట్ లిమిట్ ఇవ్వదు. మీ కార్డుకు ఉన్న లిమిట్‌లోనే కొంత భాగాన్ని మీ కుటుంబ సభ్యులకు వాడుకునే అవకాశాన్ని ఇస్తుంది. కాబట్టి, ఆ కార్డుపై చేసే ప్రతి ఖర్చు చివరికి మీ నెలవారీ స్టేట్‌మెంట్‌లోనే కనిపిస్తుంది.

ఫ్యామిలీ ఖర్చులు ఈజీ అవుతాయి

యాడ్-ఆన్ కార్డ్స్ వల్ల కుటుంబాలలో చాలా లాభాలు ఉన్నాయి..

• పిల్లల చదువులు: ఊరికి దూరంగా హాస్టళ్లలో ఉండి చదువుకునే పిల్లలకు అత్యవసర ఖర్చుల కోసం ఈ కార్డులు ఎంతగానో ఉపయోగపడతాయి.
• వృద్ధులైన తల్లిదండ్రులు: మెడికల్ ఎమర్జెన్సీ సమయాల్లో హాస్పిటల్ బిల్లులు కట్టడానికి వృద్ధులకు ఇది ఒక భరోసాగా ఉంటుంది.
• కన్సాలిడేటెడ్ బిల్లింగ్: ప్రతి నెల ఇంటి ఖర్చుల కోసం విడివిడిగా మనీ ట్రాన్స్‌ఫర్‌లు చేసుకునే అవసరం లేకుండా, ఒకే స్టేట్‌మెంట్ ద్వారా మొత్తం కుటుంబ బడ్జెట్‌ను ట్రాక్ చేయవచ్చు.

అసలు సమస్య ఎక్కడ వస్తుంది?

యాడ్-ఆన్ కార్డ్ అనేది బ్యాంకింగ్ నిబంధనల కంటే కూడా.. కుటుంబ సభ్యుల మధ్య ఉండే నమ్మకం, అవగాహనపై ఎక్కువగా ఆధారపడి ఉంటుంది. కార్డును ఎలా వాడాలో స్పష్టమైన రూల్స్ లేకపోతే సమస్యలు వస్తాయి.

మీకు చెప్పకుండా మీ ఫ్యామిలీ మెంబర్ ఎవరైనా లగ్జరీ గ్యాడ్జెట్లు కొనడమో, లేదా ఖరీదైన ఫ్లైట్ టిక్కెట్లు బుక్ చేయడమో చేస్తే, ఆ బిల్లు చూసి నెల చివర్లో షాక్ అవ్వాల్సి వస్తుంది. ఎందుకంటే ఆ లావాదేవీ ఎవరు చేశారనే దానితో బ్యాంకుకు సంబంధం లేదు. బిల్లు కట్టాల్సిన పూర్తి చట్టపరమైన బాధ్యత ప్రైమరీ కార్డ్ హోల్డర్ (మీదే) అవుతుంది. అందుకే, చాలా మంది తమ యాడ్-ఆన్ కార్డులపై ముందే 'స్పెండింగ్ లిమిట్' (ఖర్చు పరిమితి) సెట్ చేసి ఉంచుతారు.

రివార్డ్ పాయింట్లు వేగంగా పెరుగుతాయి.. కానీ!

బ్యాంకులు యాడ్-ఆన్ కార్డులను ప్రమోట్ చేయడానికి ప్రధాన కారణం.. రెండు కార్డులపై చేసే ఖర్చులన్నీ ఒకే రివార్డ్ ప్రోగ్రామ్‌కు యాడ్ అవుతాయి. దీనివల్ల..

• రివార్డ్ పాయింట్లు చాలా వేగంగా పెరుగుతాయి.
• ట్రావెల్ బెనిఫిట్స్, క్యాష్‌బ్యాక్‌లు త్వరగా వస్తాయి.

అయితే, ఈ రివార్డ్ పాయింట్ల ఆశలో పడి.. ప్రతి స్వైప్ కూడా మీ జేబు నుండే బిల్లు రూపంలో వెళ్తుందనే నిజాన్ని మర్చిపోకూడదు.

మీ సిబిల్ (CIBIL) స్కోర్‌పై ప్రభావం!

ఇది చాలా మందిని ఆశ్చర్యపరిచే విషయం. యాడ్-ఆన్ కార్డ్ వాడుతున్న వ్యక్తి పరిమితికి మించి భారీగా ఖర్చు చేస్తే, మీ మొత్తం కార్డ్ యుటిలైజేషన్ రేషియో (Credit Utilization Ratio) పెరిగిపోతుంది. ఒకవేళ నెలవారీ బిల్లు మీ అంచనాలను దాటిపోయి, మీరు సకాలంలో పేమెంట్ చేయలేకపోతే, ఆ ఎఫెక్ట్ మీ క్రెడిట్ స్కోర్‌పై పడుతుంది. కార్డ్ వాడుతున్న వ్యక్తి స్కోర్ దెబ్బతినదు, కేవలం ప్రైమరీ హోల్డర్ అయిన మీ స్కోర్ మాత్రమే పడిపోతుంది. అంటే సౌకర్యం ఇద్దరిదైనా, బాధ్యత మాత్రం మీ ఒక్కరిదే!

మీరు యాడ్-ఆన్ కార్డ్ తీసుకోవాలా?

యాడ్-ఆన్ క్రెడిట్ కార్డ్ అనేది ఖచ్చితంగా ఒక అద్భుతమైన ఫైనాన్షియల్ టూల్. డబ్బును పదే పదే బదిలీ చేసే అవసరం లేకుండా ఉమ్మడి ఖర్చులను నిర్వహించడానికి ఇది చాలా ప్రాక్టికల్ మార్గం. కానీ ఇది సక్సెస్ అవ్వాలంటే పరస్పర నమ్మకం, కమ్యూనికేషన్ చాలా ముఖ్యం.