Wedding Insurance:పెళ్లిళ్లలో కొత్త ట్రెండ్.. వెడ్డింగ్ ఇన్సూరెన్స్! ఇదెలా ఉంటుందంటే..

ఈ రోజుల్లో భారతీయ వివాహాలు అంటే కేవలం వేడుకలు మాత్రమే కావు. అవి సంప్రదాయంగా చేసే భారీ ఈవెంట్లు. నెలల తరబడి ప్లానింగ్ తో పాటు బోలెడంత ఖర్చు చేస్తారు. బంగారు ఆభరణాలు, కాస్ట్లీ వేదిక, కేటరింగ్, భారీ లైటింగ్.. ఇలా పెళ్లికి లక్షల్లో ఖర్చు అవుతుంది. అందుకే ఇప్పుడు వీటిని కవర్ చేసేందుకు ఇన్సూరెన్స్ పాలసీలు కూడా వచ్చాయి. ఇవెలా ఉంటాయంటే..

సాధారణంగా ప్రజలు కార్లు, ఇళ్లు, ఫోన్లకు బీమా చేస్తారు. కానీ, అన్నిటికంటే ఎక్కువ ఖర్చు పెట్టే పెళ్లిని మాత్రం బీమా చేయరు. అయితే ఇప్పుడిప్పుడే ఈ ఆలోచనా విధానం మారుతోంది. పెళ్లిళ్ల కోసం లక్షల్లో ఖర్చు చేస్తున్నప్పుడు అనూహ్యంగా ఏదైనా జరిగితే పరిస్థితి ఏంటి? కేటరర్ చివరి నిమిషంలో రాకపోతే? అలంకరణకు భారీ నష్టం జరిగితే? భారీ వర్షం వల్ల అవుట్‌డోర్ ఫంక్షన్ ఆగిపోతే? ఇలాంటి అపారమైన ఆర్థిక ప్రమాదాల నుంచి రక్షణ కల్పించడానికి ఇప్పుడు భారతీయ కుటుంబాలు కొత్త మార్గాన్ని ఎంచుకుంటున్నాయి. అదే వెడ్డింగ్ ఇన్సూరెన్స్ (Wedding Insurance).

పెళ్లి వేడుకల భద్రత

ఈ రోజుల్లో భారతీయ పెళ్లి సగటు ఖర్చు దాదాపు రూ. 28.5 లక్షలు. మధ్యతరగతి కుటుంబాల వార్షిక ఆదాయాన్ని కూడా ఇది మించిపోతుంది. ప్రతి సంవత్సరం కోటి కంటే ఎక్కువ వివాహాలు జరుగుతుండటంతో ఈ వేడుకలలో ఆర్థిక ప్రమాదాల అవకాశం కూడా పెరిగింది. ఎంతో ఖర్చుతో చేసే ఈ ఈవెంట్లలో చిన్న అంతరాయం కూడా భారీ నష్టాన్ని కలిగిస్తుంది. ఇటీవలి రోజుల్లో వాతావరణ మార్పులు, వెండర్ల వైఫల్యాల వల్ల చాలా పెళ్లిళ్లు ఆగిపోయాయి. పెళ్లిల్లలో ఆభరణాల దొంగతనం వంటి సంఘటనలు తరచుగా జరుగుతున్నాయి. ఈ అనిశ్చితి పెరగడం వల్ల, పెళ్లి ఖర్చులకు భద్రత కల్పించే వెడ్డింగ్ ఇన్సూరెన్స్ గురించి అవగాహన పెరుగుతోంది.

వెడ్డింగ్ ఇన్సూరెన్స్ అంటే ఏమిటి?

వెడ్డింగ్ ఇన్సూరెన్స్ అనేది వివాహ వేడుక ప్రణాళికలో వచ్చే ఊహించని నష్టాలకు ఆర్థిక భద్రతను అందించే ఒక రకమైన ఈవెంట్ ఇన్సూరెన్స్. ఈ ఇన్సూరెన్స్ తీసుకోవడం ద్వారా కుటుంబాలు అనేక కీలక అంశాలను బీమా చేసుకోవచ్చు.

• రద్దు/వాయిదా: అగ్ని ప్రమాదం, ప్రకృతి వైపరీత్యాలు లేదా కుటుంబంలో అత్యవసర పరిస్థితి కారణంగా పెళ్లి రద్దు అయినప్పుడు లేదా వాయిదా పడినప్పుడు అయ్యే ఖర్చులు.
• వెండర్ వైఫల్యం: కేటరింగ్, ఫోటోగ్రాఫర్ లేదా డెకరేటర్ చివరి నిమిషంలో తమ సేవలను అందించలేకపోయినప్పుడు అయిన అడ్వాన్స్ నష్టం.
• నష్టం/దొంగతనం: పెళ్లి వేదిక వద్ద జరిగిన ఆభరణాల దొంగతనం, లేదా ప్రమాదవశాత్తు వేదికకు జరిగిన నష్టం.
• వ్యక్తిగత గాయం/అనారోగ్యం: అతిథులకు లేదా ముఖ్య కుటుంబ సభ్యులకు ప్రమాదవశాత్తు గాయాలైనప్పుడు వైద్య ఖర్చులు.

తక్కువ ప్రీమియంతో భరోసా

వెడ్డింగ్ ఇన్సూరెన్స్ చాలా సరసమైన ధరల్లో లభిస్తుంది. ఇందలో ప్రీమియం అనేది సాధారణంగా బీమా చేయబడిన మొత్తంలో 0.2% నుండి 2% మధ్య ఉంటుంది. ఉదాహరణకు మీరు రూ. 50 లక్షల విలువైన పెళ్లి ఖర్చులకు బీమా తీసుకోవాలనుకుంటే ప్రీమియం రూ. 10,000 నుంచి రూ. 1,00,000 మధ్య ఉండవచ్చు. అతిథుల సంఖ్య, వేదిక, వేడుకల వ్యవధిని బట్టి ప్రీమియం మారుతుంది.

డెస్టినేషన్ వెడ్డింగ్స్ కోసం..

ఇటీవల కాలంలో డెస్టినేషన్ వెడ్డింగ్స్ (Destination Weddings) బాగా పెరిగాయి. గోవాలో బీచ్ సైడ్ వేడుక అయినా, రాజస్థాన్‌లో రాయల్ థీమ్ పెళ్లి అయినా.. వీటిలో ముందస్తు ఖర్చు చాలా ఎక్కువ. వేరే ప్లేస్ లో జరిగే ఈవెంట్ కాబట్టి అంతరాయాలకు ఎక్కువ అవకాశం ఉంటుంది. కాబట్టి ఖర్చు నష్టం కూడా పెరుగుతుంది. ఫ్లైట్ ఆలస్యం అవ్వడం, వసతి సమస్యలు, పెళ్లి దుస్తులు లేదా డెకర్ సామాగ్రి కోల్పోవడం.. ఇలాంటి నష్టాలన్నింటి కోసం ప్రత్యేక కవరేజీని ఇన్సూరెన్స్ కంపెనీలు అందిస్తున్నాయి.

పాలసీ షరతులు తెలుసుకోవాలి

ఇతర బీమా పాలసీల మాదిరిగానే.. వెడ్డింగ్ ఇన్సూరెన్స్ లో కూడా కొన్ని షరతులు ఉంటాయి. పెళ్లి చేసుకోకూడదని స్వచ్ఛందంగా నిర్ణయం తీసుకున్నప్పుడు లేదా ముందుగానే తెలిసిన ప్రమాదాలకు కవరేజీ ఉండదు. సరైన లైసెన్స్ లేని వెండర్లను నియమించడం లేదా వేదిక భద్రతా మార్గదర్శకాలను పాటించకపోవడం వంటి నిర్లక్ష్యాలు రుజువైతే క్లెయిమ్‌లు తిరస్కరించబడవచ్చు.
పాలసీ డాక్యుమెంట్‌ను పూర్తిగా చదవడం ద్వారా మీ వేడుకకు అవసరమైన రక్షణను మాత్రమే ఎంచుకునేందుకు వీలుంటుంది. బజాజ్ అలియన్స్, టాటా AIG, ICICI లాంబార్డ్, HDFC ERGO వంటి ప్రధాన బీమా సంస్థలు ఈ విభాగంలో చురుకుగా ఉన్నాయి.