ఎల్ఐసీ సహా... 2022లో వస్తున్న 5 ప్రభుత్వరంగ ఐపీవోలు ఇవే

ఫండ్స్ సమీకరించేందుకు కేవలం ప్రయివేటు సంస్థలు మాత్రమే ఐపీవోను ఎంచుకోవడం లేదు! తమ PSUల ద్వారా ప్రభుత్వం కూడా నిధులను సమీకరిస్తుంది. గత కొన్నేళ్లలో ప్రభుత్వం ప్రయివేటీకరణ, విలీనం, పెట్టుబడుల ఉపసంహరణ, షేర్ల విక్రయం ద్వారా నిధులను సమీకరించింది. గవర్నమెంట్ ఆఫ్ ఇండియా 2022లో పలు ఐపీవోలతో ముందుకు వస్తోంది. ఈ క్యాలెండర్ ఏడాదిలో వచ్చే ఐదు ఐపీవోలను ఇక్కడ చూద్దాం... ఇందులో ప్రధానమైనది ఎల్ఐసీ.

ఎల్ఐసీ

లైఫ్ ఇన్సురెన్స్ కార్పోరేషన్ ఆఫ్ ఇండియా (LIC) ప్రభుత్వరంగ సంస్థ మాత్రమే కాదు, భారత అతిపెద్ద ఐపీవోగా నిలువనుంది. సమాచారం మేరకు ఎల్ఐసీ ఐపీవో ప్రస్తుత ఆర్థిక సంవత్సరం ముగిసే నాటికి పూర్తి అవుతుంది. 2022లో భారత క్యాపిటల్ మార్కెట్ వృద్ధికి ఎల్ఐసీ ఐపీవో కీలకం కానుంది. ఎల్ఐసీ ఐపీవోకు వీలుగా కేంద్రం లైఫ్ ఇన్సురెన్స్ కార్పోరేషన్ చట్టంలో సవరణలు చేసింది. తాజాగా చైర్మన్ పదవిని మరో ఏడాది పాటు పొడిగించింది.

ఈసీజీసీ లిమిటెడ్

ప్రభుత్వరంగ సంస్థలు ఈసీజీసీ లిమిటెడ్, నేషనల్ సీడ్స్ కార్పోరేషన్ లిమిటెడ్.. ఈ రెండు కూడా ఐపీవోకు వస్తున్నాయి. ఈసీజీసీ అంటే ఎక్స్‌పోర్ట్ క్రెడిట్ గ్యారెంటీ కార్పోరేషన్ ఆఫ్ ఇండియా. ఇది ప్రభుత్వ రంగ క్రెడిట్ ప్రొవైడర్. ఇది మినిస్ట్రీ ఆఫ్ కామర్స్ అండ్ ఇండస్ట్రీ ఆధ్వర్యంలో ఉంది. ప్రధాన కార్యాలయం ముంబైలో ఉంది. ఈ కంపెనీ వివిధ ఆన్ లైన్ సేవలు అందిస్తుంది.

నేషనల్ సీడ్స్ కార్పోరేషన్

నేషనల్ సీడ్స్ కార్పోరేషన్ లిమిటెడ్(NSC) కూడా ఐపీవోకు వస్తుంది. ఇది వ్యవసాయ కార్పోరేషన్, రైతు సంక్షేమ శాఖ, వ్యవసాయ కార్పోరేషన్, రైతు సంక్షేమ మంత్రిత్వ శాఖ పరిపాలనా నియంత్రణలో ఉంది. NSC విత్తన పరీక్ష, నాణ్యత నియంత్రణ కోసం భోపాల్, ఢిల్లీ, సూరత్‌గర్, సికింద్రాబాద్‌లలో నాలుగు క్వాలిటీ కంట్రోల్ లేబోరేటరీలను ఏర్పాటు చేసింది. ఇందులో 25 శాతం వాటాను విక్రయించేందుకు ప్రభుత్వం సిద్ధమైంది. మినీరత్న ఎన్ఎస్సీ 2019-20 ఆర్థిక సంవత్సరంలో 29.92 కోట్ల లాభాన్ని (ప్రాఫిట్ ఆఫ్టర్ ట్యాక్స్) ఆర్జించింది. మార్చి 31, 2020 నాటికి దీని వ్యాల్యూ రూ.646.37 కోట్లు. 2022లో ఐపీవోకు రావొచ్చు.

WAPCOS లిమిటెడ్

WAPCOS (వాటర్ అండ్ పవర్ కన్సల్టెన్సీ సర్వీసెస్) ప్రభుత్వరంగ సంస్థ. విద్యుత్, నీళ్లు, ఇన్ఫ్రా రంగాలకు సంబంధించినది. ఈ మినీరత్న కంపెనీ ఆప్ఘనిస్తాన్‌తో పాటు వివిధ దేశాల్లో సేవలు అందిస్తోంది. ఐపీవోపై దూకుడుగా ముందుకు వెళ్లినప్పటికీ, కరోనా కారణంగా ఆలస్యమైంది. WAPCOS ప్రస్తుతం తన అంతర్జాతీయ వ్యాపారాలన్నింటి పైన సమాచారం సేకరిస్తోంది. ఇది కొద్ది నెలల్లో పూర్తవుతుంది. ఆ తర్వాత ఐపీవోకు రావొచ్చు.

నార్త్ ఈస్టర్న్ ఎలక్ట్రిక్ పవర్ కార్పోరేషన్ లిమిటెడ్

నార్త్ ఈస్టర్న్ ఎలక్ట్రిక్ పవర్ కార్పోరేషన్ లిమిటెడ్ (NEEPCO).. ప్రభుత్వ ఆధారిత విద్యుత్ ఉత్పత్తిదారు ఎన్టీపీసీ అనుబంధ సంస్థ. అసెట్ మానిటైజేషన్‌లో భాగంగా ఇది ఐపీవోకు వస్తోంది. ఎన్టీపీసీ మరో రెండు అనుబంధ సంస్థల్లో ఈ పెట్టుబడులు పెడుతోంది. పవన శక్తి పైన దృష్టి సారించి, మున్ముందు కాలంలో సాంప్రదాయేతర ఇంధన వనరుల నుండి విద్యుత్‌ను ఉత్పత్తి చేసే వ్యూహాన్ని అనుసరిస్తోంది NEEPCO. 2022-23 ఆర్థిక సంవత్సరంలో ప్రారంభం కావొచ్చు.