గుడ్‌న్యూస్: వడ్డీ రేట్లు తగ్గించిన SBI, మీ హోమ్‌లోన్ ఈఎంఐ ఎంత తగ్గుతుంది?

ప్రభుత్వరంగ దిగ్గజ స్టేట్ బ్యాంక్ ఆఫ్ ఇండియా(SBI) నిధుల ఆధారిత రుణ రేటు(MCLR)ను అన్ని కాలపరిమితులపై 25 బేసిస్ పాయింట్లు తగ్గించింది. ప్రస్తుతం ఏడాది ఎంసీఎల్ఆర్ 7.25 శాతంగా ఉంది. తాజా తగ్గింపుతో ఇది 7 శాతానికి చేరుకుంటుంది. ఎస్బీఐ వడ్డీ రేట్లు తగ్గించడం ఇది వరుసగా 13వసారి. ఎక్స్టర్నల్ బెంచ్ రేటు ఆధారిత రుణాలపై 75 బేసిస్ పాయింట్లు తగ్గించి 7.40 శాతంగా (ఇదివరకు 8.15 శాతం) నిర్ణయించింది. కరోనా నేపథ్యంలో ఆర్బీఐ రెపో రేటు తగ్గించడంతో బ్యాంకులు ఈ ప్రయోజనాలను కస్టమర్లకు అందిస్తోన్న విషయం తెలిసిందే.

జూన్ 10వ తేదీ నుండి అమల్లోకి

ఎస్బీఐ తగ్గించిన వడ్డీ రేట్లు జూన్ 10వ తేదీ నుండి అమలులోకి వస్తాయి. ఆర్బీఐ ఇటీవల రెపో రేటును 40 బేసిస్ పాయింట్లు తగ్గించిన విషయం తెలిసిందే. దీంతో ఆ ప్రయోజనాన్ని కస్టమర్లకు బదలీ చేస్తున్నట్లు ఎస్బీఐ తెలిపింది. ఎంసీఎల్ఆర్‌ని పావు శాతం, రెపో ఆధారిత రేటును 40 బేసిస్ పాయింట్లు తగ్గించింది. ఎక్స్టర్నల్ బెంచ్ మార్క్ ఆధారిత రుణాలపై ఆర్బీఐ కల్పించిన పూర్తి ప్రయోజనాన్ని కస్టమర్లకు బదలీ చేసింది. మార్చి నుండి సెంట్రల్ బ్యాంకు 115 బేసిస్ పాయింట్లు తగ్గించింది.

హోమ్ లోన్ ఈఎంఐ ఎంత తగ్గుతుంది

ఏడాది కాలపరిమితి కలిగిన ఎక్స్టర్నల్ బెంచ్ రేటు (EBR) 7.05 శాతం నుండి 6.65 శాతానికి దిగి వస్తుంది. ఆర్ఎల్ఎల్ఆర్‌ 6.65 శాతం నుండి 6.25 శాతానికి దిగి వచ్చింది. తాజా నిర్ణయంతో ఎంసీఎల్ఆర్‌తో అనుసంధానమైన ముప్పై ఏళ్ల కాలపరిమితి కలిగిన రూ.25 లక్షల హోమ్ లోన్ పైన రూ.421 ఈఎంఐ తగ్గనుంది. అలాగే ఈబీఆర్/ఆర్ఎల్ఎల్ఆర్‌ కూడా రూ.660 తగ్గుతుంది.

ఫిక్స్డ్ డిపాజిట్లపై మే నెలలో వరుసగా రెండోసారి తగ్గింపు

ఎస్బీఐ మే 27వ తేదీన ఫిక్స్డ్ డిపాజిట్స్ వడ్డీ రేట్లను 40 బేసిస్ పాయింట్లు తగ్గించిన విషయం తెలిసిందే. మే నెలలో డిపాజిట్లపై వడ్డీ తగ్గించడం అది రెండోసారి. అంతకుముందు మే 12వ తేదీన తగ్గించింది. రూ.2 కోట్లకు తక్కువ కలిగిన రిటైల్ డిపాజిటర్లకు వడ్డీ రేటును 5.5 శాతం నుండి 5.1 శాతానికి తగ్గించింది.