మీ ఆదాయంలో EMI వాటా ఎంత? ఈ లిమిట్ దాటితే మీరు ట్రాప్‌లో చిక్కుకున్నట్టే!

నేటి డిజిటల్ యుగంలో వస్తువు ఏదైనా సరే.. చేతిలో చిల్లిగవ్వ లేకపోయినా 'బై నౌ పే లేటర్' (BNPL) లేదా ఈఎంఐ (EMI) ఆప్షన్లతో సులభంగా కొనేయవచ్చు. కానీ, ఈ సౌకర్యమే ఇప్పుడు యువతను, ముఖ్యంగా జెన్-జీ (Gen Z) , కొత్తగా ఉద్యోగాల్లో చేరిన వారిని ఆర్థిక కష్టాల్లోకి నెడుతోంది. క్రెడిట్ కార్డులు, పర్సనల్ లోన్ల మీద ఆధారపడటం ఒక ప్రమాదకరమైన ధోరణిగా మారుతోందని ఆర్థిక నిపుణులు హెచ్చరిస్తున్నారు. జీ బిజినెస్ (Zee Business) నిర్వహించిన ఒక చర్చా కార్యక్రమంలో ప్రముఖ నిపుణులు హేమంత్ రుస్తగీ , విశ్వజిత్ పరాశర్ యువత ఎదుర్కొంటున్న ఆర్థిక ఇబ్బందులపై కీలక సూచనలు చేశారు.

అప్పుల ఉచ్చు ఎక్కడ మొదలవుతుంది?

కెరీర్ ప్రారంభంలో ఆదాయం తక్కువగా ఉంటుంది. కానీ, సోషల్ మీడియా ప్రభావం , విలాసవంతమైన జీవనశైలి పట్ల ఆకర్షణ ఎక్కువగా ఉంటుంది. ఈ క్రమంలో అవసరం లేకపోయినా ఖరీదైన గ్యాడ్జెట్లు, బట్టలు, ట్రిప్పుల కోసం లోన్లు తీసుకోవడం అలవాటుగా మారుతోంది. "చిన్న చిన్న అప్పులు ఈఎంఐ (EMI) రూపంలో సులభంగా అనిపించవచ్చు. కానీ, అవన్నీ కలిపి నెలాఖరుకు వచ్చేసరికి ఆదాయం కంటే ఖర్చులే ఎక్కువగా ఉండేలా చేస్తున్నాయి" అని హేమంత్ రుస్తగీ పేర్కొన్నారు. ఆస్తుల సృష్టి (Asset Creation) కోసం కాకుండా కేవలం ఖర్చుల కోసమే అప్పులు చేయడం అనేది ఒక ప్రమాదకరమైన సంకేతం.

45% పరిమితి - రెడ్ ఫ్లాగ్!

నిపుణుల అభిప్రాయం ప్రకారం.. మీ నెలవారీ ఆదాయంలో ఈఎంఐ (EMI) చెల్లింపులు 40 నుంచి 45 శాతానికి మించకూడదు. ప్రస్తుతం అమ్ముడవుతున్న ఐఫోన్లలో దాదాపు 70 శాతం ఈఎంఐల మీదే కొంటున్నారని విశ్వజిత్ పరాశర్ తెలిపారు. "మనం కొనే వస్తువు మనకు అవసరమా (Need) లేదా కేవలం కోరిక (Want) మాత్రమేనా అనే తేడాను గుర్తించలేకపోవడమే అసలు సమస్య" అని ఆయన అన్నారు. ఒకవేళ మీ ఆదాయంలో సగం కంటే ఎక్కువ అప్పులకే పోతుంటే.. మీరు వెంటనే మీ ఖర్చులను తగ్గించుకోవాల్సిన అవసరం ఉంది.

డెట్ ట్రాప్‌లో ఉన్నారని తెలిపే సంకేతాలు..

మీరు అప్పుల ఊబిలో కూరుకుపోయారని చెప్పడానికి కొన్ని ప్రధాన లక్షణాలు ఇవే..

• క్రెడిట్ కార్డ్ బిల్లులో కేవలం 'మినిమమ్ డ్యూ' (Minimum Due) మాత్రమే చెల్లిస్తుండటం.
• పాత అప్పులు తీర్చడానికి కొత్తగా మళ్ళీ లోన్ తీసుకోవడం.
• ఎమర్జెన్సీ ఫండ్ (అత్యవసర నిధి) ఏమాత్రం లేకపోవడం.
• నెల ఆదాయంలో 50 శాతం కంటే ఎక్కువ కేవలం వడ్డీలు, అసలు కట్టడానికే సరిపోవడం.

పెట్టుబడి సూత్రాలు, నిపుణుల సలహాలు

అప్పుల నుండి బయటపడటమే కాకుండా, సంపదను సృష్టించడంపై కూడా యువత దృష్టి పెట్టాలి. నెలకు రూ. 5000 తో సిస్టమాటిక్ ఇన్వెస్ట్‌మెంట్ ప్లాన్ (SIP) ప్రారంభించడం వల్ల దీర్ఘకాలంలో కోట్లాది రూపాయలు గడించవచ్చు. ఇన్వెస్ట్ చేసేటప్పుడు పది, పద్నాలుగు ఫండ్లలో కాకుండా.. కేవలం 4 నుండి 5 మంచి డైవర్సిఫైడ్ ఈక్విటీ ఫండ్లలో పెట్టుబడి పెట్టాలని నిపుణులు సూచిస్తున్నారు. లార్జ్ క్యాప్, మిడ్ క్యాప్ , స్మాల్ క్యాప్ విభాగాల్లో పెట్టుబడులను విభజించడం ద్వారా రిస్క్‌ను తగ్గించుకోవచ్చు.

మొత్తంగా క్రెడిట్ లేదా ఈఎంఐ (EMI) అనేది ఒక ఆర్థిక సాధనం మాత్రమే. కానీ, దానిని బాధ్యతారాహిత్యంగా వాడితే అది మీ భవిష్యత్తును దెబ్బతీస్తుంది. క్రమశిక్షణతో కూడిన ఖర్చులు, సరైన బడ్జెట్, స్పష్టమైన ఆర్థిక లక్ష్యాలు మాత్రమే మిమ్మల్ని అప్పుల ఊబి నుండి కాపాడగలవు. ఈ నెలను 'నో క్రెడిట్' (No Credit) నెలగా ప్రకటించుకుని, మీ ఖర్చుల సరళిని ఒక్కసారి గమనించండి. ఇది మీ ఆర్థిక స్వేచ్ఛకు మొదటి అడుగు కావచ్చు.