కస్లమర్లకు బిగ్ అలర్ట్.. మీ లోన్లు ఏమైనా ఉన్నాయా వీటిల్లో.. 4 NBFC సంస్థల రిజిస్ట్రేషన్ రద్దు చేసిన RBI

భారతీయ రిజర్వ్ బ్యాంక్ (RBI) నాన్-బ్యాంకింగ్ ఫైనాన్షియల్ కంపెనీల (NBFCs)పై గురువారం నాడు కీలక చర్యలు చేపట్టింది. నియంత్రణ నిబంధనల ఉల్లంఘనల కారణంగా నాలుగు NBFCల రిజిస్ట్రేషన్ సర్టిఫికెట్లను రద్దు చేస్తున్నట్లు ప్రకటించింది. మరో నాలుగు సంస్థలు స్వచ్ఛందంగా తమ లైసెన్సులను సరెండర్ చేసి ఈ రంగం నుంచి నిష్క్రమిస్తున్నట్లు ఆర్‌బిఐ ప్రకటించింది. ఈ నిర్ణయాలు దేశ ఆర్థిక వ్యవస్థలో పారదర్శకతను, క్రమశిక్షణను బలోపేతం చేసే దిశగా తీసుకున్న కీలక అడుగుగా ఆర్థిక విశ్లేషకులు భావిస్తున్నారు.

బ్యాంకింగ్, ఆర్థిక రంగంలో స్థిరత్వాన్ని కాపాడేందుకు ఆర్‌బిఐ నిరంతరం బ్యాంకులు, ఎన్‌బిఎఫ్‌సిల కార్యకలాపాలను తనిఖీ చేస్తోంది. మొండి రుణాలు (NPAs), ఆర్థిక మోసాలు, ఖాతాల నివేదికల్లో లోపాలు, నియంత్రణ నిబంధనల ఉల్లంఘనలు వంటి అంశాలపై ప్రత్యేక దృష్టి సారిస్తోంది. ఈ తనిఖీలలో భాగంగా అవసరమైన చోట హెచ్చరికలు జారీ చేయడం, జరిమానాలు విధించడం, తీవ్రమైన ఉల్లంఘనలున్న సంస్థల లైసెన్సులను రద్దు చేయడం వంటి చర్యలు తీసుకుంటోంది. ఇది ఏడాది పొడవునా కొనసాగించే ప్రక్రియ కావడంతో, ఇలాంటి ప్రకటనలు తరచూ వెలువడుతుంటాయి.

తాజా నిర్ణయాల ప్రకారం.. పశ్చిమ బెంగాల్‌కు చెందిన మూడు సంస్థలైన జెమ్ ఇన్వెస్ట్‌మెంట్స్ & ట్రేడింగ్ కో ప్రైవేట్ లిమిటెడ్, విస్టార్ ఫైనాన్షియర్స్, అంబికా బార్టర్ ప్రైవేట్ లిమిటెడ్ తో పాటుగా చండీగఢ్‌కు చెందిన శ్రీ లఖి ఫైనాన్షియల్ సర్వీసెస్ లిమిటెడ్ అనే నాలుగు NBFCల రిజిస్ట్రేషన్ సర్టిఫికెట్లను ఆర్‌బిఐ రద్దు చేసింది. ఈ కంపెనీలు ఇకపై ఎటువంటి NBFC కార్యకలాపాలను నిర్వహించేందుకు అనుమతించబడవు. నిర్దేశిత నియంత్రణ నిబంధనలను ఉల్లంఘించిన కారణంగానే ఈ చర్య తీసుకున్నట్లు ఆర్‌బిఐ స్పష్టం చేసింది.

అదే సమయంలో...మరో నాలుగు NBFCలు స్వచ్ఛందంగా తమ రిజిస్ట్రేషన్ సర్టిఫికెట్లను అప్పగించాయి. YG క్యాపిటల్ లిమిటెడ్ తన NBFC వ్యాపారాన్ని పూర్తిగా నిలిపివేయడంతో లైసెన్సును సరెండర్ చేసింది. కోర్ ఇన్వెస్ట్‌మెంట్ కంపెనీ (CIC) నిబంధనలకు అనుగుణంగా ఇంటెల్ ఇన్వోఫిన్ ఇండియా ప్రైవేట్ లిమిటెడ్ తన రిజిస్ట్రేషన్‌ను వదులుకుంది. అలాగే, విలీనం లేదా స్వచ్ఛంద రద్దు కారణంగా చట్టపరమైన సంస్థలుగా కొనసాగని గంగోత్రి కమోడిటీస్ & ఫిన్‌వెస్ట్ ప్రైవేట్ లిమిటెడ్, పెర్కిన్ డీలర్స్ ప్రైవేట్ లిమిటెడ్ తమ లైసెన్సులను అప్పగించాయి.

ఇక ఒడిశాలోని పర్లాఖేముండిలో ఉన్న ది కో-ఆపరేటివ్ అర్బన్ బ్యాంక్ లిమిటెడ్‌పై నియంత్రణ నిబంధనల ఉల్లంఘనల కారణంగా ఆర్‌బిఐ రూ.13 వేలు జరిమానా విధించింది. బ్యాంకింగ్ కార్యకలాపాల్లో జరిగిన లోపాలను దృష్టిలో పెట్టుకొని ఈ చర్య తీసుకున్నట్లు పేర్కొంది.

NBFCలు భారత ఆర్థిక సేవల రంగంలో కీలక పాత్ర పోషిస్తాయి. అయితే నిబంధనలను పాటించని సంస్థలు కస్టమర్లకు నష్టం కలిగించే అవకాశం ఉంటుంది. అందువల్ల, తప్పు చేసిన కంపెనీలపై కఠిన చర్యలు తీసుకోవడం ద్వారా డిపాజిటర్లు, పెట్టుబడిదారుల ప్రయోజనాలను కాపాడటం ఆర్‌బిఐ ప్రధాన లక్ష్యంగా కొనసాగుతోంది. ఈ చర్యలు ఇతర ఆర్థిక సంస్థలకు కూడా ఒక స్పష్టమైన హెచ్చరికగా నిలుస్తున్నాయి.

క్లుప్తంగా చెప్పాలంటే ఆర్‌బిఐ తీసుకుంటున్న ఈ నియంత్రణ చర్యలు భారత ఆర్థిక వ్యవస్థ విశ్వసనీయతను పెంచడంలో కీలక పాత్ర పోషిస్తున్నాయి. ప్రజలు, పెట్టుబడిదారులు ఎప్పటికప్పుడు RBI రిజిస్టర్డ్, నియంత్రణకు లోబడి ఉన్న సంస్థలనే ఎంచుకోవడం ఎంతో అవసరం. ఇలా చేయడం ద్వారా వారి పొదుపులు, పెట్టుబడులు సురక్షితంగా ఉంటాయని నిపుణులు సూచిస్తున్నారు.