Personal or gold loan: బంగారం, పర్సనల్ లోన్ తీసుకుంటున్నారా.. ఇవి గుర్తుంచుకోండి

అత్యవసర సమయంలో వ్యక్తులు చాలామంది బంగారం రుణం, వ్యక్తిగత రుణం తీసుకుంటారు. సాధారణంగా అత్యవసర పరిస్థితుల్లో బంగారం ఉంటే గోల్డ్ లోన్ తీసుకోవడానికి చాలామంది ఆసక్తి కనబరుస్తారు. ఆ తర్వాత పర్సనల్ లోన్‌ను ఎంచుకుంటారు. వ్యక్తిగత లోన్ కంటే బంగారం పైన రుణాలకు కాస్త తక్కువ వడ్డీ రేటు ఉంటుంది. బంగారం సెక్యూర్డ్ అయితే, పర్సనల్ లోన్ అన్-సెక్యూర్డ్ లోన్. కాబట్టి పర్సనల్ లోన్ పైన వడ్డీ రేటు కాస్త ఎక్కువగా ఉంటుంది. బంగారం రుణాలు లేదా వ్యక్తిగత రుణాలు తీసుకోవడానికి ముందు పలు అంశాలను పరిగణలోకి తీసుకోవాలి.

వడ్డీ రేటు

దరఖాస్తుదారు క్రెడిట్ ప్రొఫైల్ ఆధారంగా వివిధ బ్యాంకులు పర్సనల్ లోన్ పైన 10 శాతం నుండి 24 శాతం వడ్డీ రేటును అందిస్తాయి. వడ్డీ రేటు రిస్క్ అసెస్‌మెంట్ ఆధారంగా, ఆయా బ్యాంకులు లేదా గోల్డ్ లోన్ సంస్థలు బంగారం రుణాలపై 7 శాతం నుండి 29 శాతం వడ్డీ రేటును అందిస్తాయి. అధిక రుణాలు తీసుకుంటే వడ్డీ రేట్లు కాస్త తగ్గుతాయి.

రుణ మొత్తం

రుణ మొత్తాన్ని కూడా పరిగణలోకి తీసుకోవాలి. వ్యక్తిగత లోన్ సాధారణంగా రూ.50,000 నుండి రూ.15 లక్షల వరకు ఇస్తారు. కొంతమంది రూ.30 లక్షల నుండి 40 లక్షల వరకు కూడా పర్సనల్ లోన్ ఇస్తారు. ఇక బంగారంపై రుణం అంటే బంగారం వ్యాల్యూ పైన 75 శాతం ఇస్తారు.

ఎన్ని రోజుల్లోపు వస్తాయి

పర్సనల్ లోన్ తీసుకోవడానికి రుణ గ్రహీతలు తమ ఐటీ రిటర్న్ ఫామ్స్, పే-స్లిప్స్, ఇతర డాక్యుమెంట్స్ అవసరం. వ్యక్తిగత రుణం అకౌంట్లో పడడానికి రెండు రోజుల నుండి ఏడు రోజుల సమయం పడుతుంది. ఇటీవల కొద్ది గంటల్లోనే పడుతుంది. బంగారం రుణం అత్యంత వేగంగా మంజూరు అవుతుంది.

రీపేమెంట్ కాలం

సాధారణంగా వ్యక్తిగత రుణం రీపేమెంట్ కాలపరిమితి ఏడాది నుండి రెండేళ్లు ఉంటుంది. గరిష్టంగా ఏడేళ్లు కూడా ఉండవచ్చు. బంగారం రుణాలు గరిష్ట కాలపరిమితి మూడు సంవత్సరాలు. కొన్ని సందర్భాల్లో నాలుగైదు సంవత్సరాలు కూడా ఉంటాయి. అలాగే, ప్రాసెసింగ్ ఫీజును కూడా పరిగణలోకి తీసుకోవాలి.