LIC IPO: నేడు ప్రారంభం, ఎల్ఐసీ షేర్లను కొనుగోలు చేయవచ్చా?

అందరూ ఎంతో ఆసక్తిగా ఎదురు చూస్తోన్న లైఫ్ ఇన్సురెన్స్ కార్పోరేషన్ ఆఫ్ ఇండియా (LIC) మెగా పబ్లిక్ ఇష్యూ నేడు (మే 4, 2022) ప్రారంభమవుతోంది. సోమవారం యాంకర్ ఇన్వెస్టర్లకు కేటాయించిన భాగానికి భారీ స్పందన వచ్చింది. దీంతో రిటైల్ ఇన్వెస్టర్లు, పాలసీదారులు తొలిసారి పబ్లిక్ ఇష్యూకు దరఖాస్తు చేసుకుంటున్న వారు ఆసక్తిని చూపిస్తున్నారు. ఐపీవో ధరల శ్రేణి రూ.902 నుండి 949గా ప్రకటించారు. పాలసీదారులకు 60, రిటైలర్లు, ఉద్యోగులకు రూ.45 చొప్పున డిస్కౌంట్ ఉంది.

ధరల శ్రేణి, షేర్ల జారీ

రిటైల్, సంస్థాగత ఇన్వెస్టర్లు, ఉద్యోగులు, పాలసీదారులు బుధవారం నుండి ఎల్ఐసీ ఐపీఓకు దరఖాస్తు చేసుకోవచ్చు. రూ.902-949 ధరల శ్రేణితో జారీ చేయనున్నారు. ఈ ఇష్యూ 9వ తేదీన ముగియనుంది. ఈ ఇష్యూ ద్వారా ఎల్ఐసీ మొత్తం 22.13 కోట్ల షేర్లు జారీ చేస్తోంది. ఇందులో 9.88 కోట్ల షేర్లు క్వాలిఫైడ్ ఇనిస్టిట్యూషనల్ కొనుగోలుదారులకు, 2.6 కోట్ల షేర్లు నాన్-ఇనిస్టిట్యూషనల్ కొనుగోలుదారులకు, 15,81,249 షేర్లు ఉద్యోగులకు, 2,21,37,492 షేర్లు పాలసీదారులకు కేటాయించింది. ఈ ఇష్యూ ద్వారా ఎల్ఐసీ 3.5 శాతం వాటాను విక్రయించి, రూ.21,000 కోట్లు సమీకరించాలని లక్ష్యంగా పెట్టుకుంది. ఇది 17వ తేదీన బీఎస్ఈ, ఎన్ఎస్ఈలలో నమోదు కానుంది.

దీర్ఘకాలానికి...

30 కోట్ల వరకు పాలసీదారులు, 13 లక్షలకు పైగా ఏజెంట్లు ఉన్నారు. బీమా ప్రీమియంలో 64 శాతం వాటాను కలిగి ఉంది. 2019-20లో రూ.5.7 లక్షల కోట్ల ప్రీమియం ఆదాయంతో భారత బీమా మార్కెట్ రికార్డ్ సృష్టించింది. ఎల్ఐసీకి రూ.3.8 లక్షల కోట్ల ఆదాయం దక్కింది. ఈ ఐపీవోకు దరఖాస్తు చేసుకోవచ్చునని, కానీ దీర్ఘకాలాన్ని దృష్టిలో పెట్టుకొని ఇన్వెస్ట్ చేయాలని, ఎందుకంటే ఏడాది తర్వాత మరోసారి వాటా విక్రయం ఉండే అవకాశముందని అంటున్నారు మార్కెట్ నిపుణులు.

వీటిని పరిగణలోకి తీసుకోవాలి

ఎల్ఐసీ షేర్లను కొనుగోలు చేయవచ్చునని బ్రోకరేజీ సంస్థలు కూడా చెబుతున్నాయి. అయితే పెట్టుబడి పెట్టడానికి ముందు కాస్త అప్రమత్తంగా ఉండాలని, ప్రయివేటు కంపెనీల నుండి వస్తున్న ఒత్తిడితో ఎల్ఐసీ మార్కెట్ వాటా క్రమంగా తగ్గుతోందని గుర్తు చేస్తున్నారు. ఎల్ఐసీ పాలసీలు సంప్రదాయ ఏజెంట్ పద్ధతిలోనే ఎక్కువగా ఉన్నాయని, రెన్యూవల్ ప్రీమియంలు మాత్రమే 36 శాతం డిజిటల్‌గా ఉన్నాయని చెబుతున్నారు. ప్రయివేటు బీమా సంస్థలు ఈ విషయంలో ముందున్నాయి.