LIC హౌసింగ్ లోన్‌పై బంపరాఫర్: అప్పటి దాకా EMI చెల్లించక్కర్లేదు, ఆఫర్ ఎప్పటి వరకంటే

ఇంటిని కొనుగోలు చేయాలనుకునే వారికి లైఫ్ ఇన్సురెన్స్ కార్పోరేషన్ (LIC) నుంచి శుభవార్త. ఎల్ఐసీ హౌసింగ్ ఫైనాన్స్ లిమిటెడ్ (LICHFL) బంపరాఫర్ ప్రకటించింది. సంక్రాంతి పర్వదినం రోజున (15 జనవరి 2020) '2020 హోమ్ లోన్ ఆఫర్'ను ప్రకటించింది. రియల్ ఎస్టేట్ రంగానికి ఊతమిచ్చే లక్ష్యంతో ఎల్ఐసీ మంచి ఆఫర్ ఇస్తోంది.

పే వెన్ యు స్టే

రియల్ ఎస్టేట్ రంగానికి ఊతమిచ్చేలా హౌసింగ్ అండర్ కన్స్ట్రక్షన్, రెడీ టూ మూవ్ ఆస్తుల కొనుగులుపై ఆఫర్లతో ముందుకు వచ్చింది. ఆక్యుపెన్సీ సర్టిఫికెట్ అందుకున్న హోమ్ బయ్యర్స్‌కు ప్రయోజనకరం. పే వెన్ యు స్టే బ్రాండుతో దీనిని అందిస్తున్నారు. అంటే మీరు ఇంట్లోకి వెళ్లిన తర్వాతే ప్రిన్సిపల్ అమౌంట్ చెల్లించాలి.

ఆ తర్వాతే ప్రిన్సిపల్ అమౌంట్ చెల్లింపు

ప్రస్తుతం నిర్మాణంలో ఉన్న ప్రాజెక్టుల్లో ఇంటిని కొనుగోలు చేసే రుణగ్రహీతలకు గృహ ప్రవేశం వరకు లేదా తొలి విడత రుణ నిధుల జారీ నుంచి 48 నెలల పాటు ఏది ముందు అయితే దాని ప్రకారం అసలు మొత్తాన్ని తిరిగి చెల్లించాల్సిన అవసరం లేదు. విడుదల చేసిన రుణ నిధులపై వడ్డీ చెల్లిస్తే సరిపోతుంది.

ఈఎంఐ చెల్లింపులకు మినహాయింపు

నిర్మాణం పూర్తయిన ప్రాజెక్టుల్లోని ఇంటిని కొనుగోలు చేసే రుణగ్రహీతలకు ఆరు నెలల EMI చెల్లింపుల నుంచి మినహాయింపు ఇస్తోంది. రుణ కాలపరిమితిలో 5, 10, 15వ సంవత్సరాలలో రెండు చొప్పున EMI చెల్లింపులకు మినహాయింపు లభిస్తుంది.

పరిమిత కాల ఆఫర్

సక్రమంగా తిరిగి చెల్లింపులు జరిపే వారికి, మొదటి అయిదేళ్ల వరకు ఎలాంటి ముందస్తు చెల్లింపులు జరపని వారికి మాత్రమే ఈ సౌకర్యం లభిస్తుంది. ఈ పరిమితకాల ఆఫర్ జనవరి 29 వరకు అందుబాటులో ఉంటుంది. మార్చి 15వ తేదీలోగా రుణం జారీ కావాల్సి ఉంటుంది.

రుణగ్రహీతలకు ప్రయోజనం

బుధవారం ఈ స్కీం లాంఛ్ సందర్భంగా LICHFL మేనేజింగ్ డైరెక్టర్ అండ్ సీఈవో సిద్ధార్థ మొహంతీ మాట్లాడారు. అండర్ కన్స్ట్రక్షన్ హౌస్‌లు కొనుగోలు చేసిన వారు లేదా రెడీ టూ హోమ్ కొనుగోలు చేసిన వారు.. ఆ ఇంట్లోకి వెళ్లిన తర్వాత పే చేయవచ్చునని చెప్పారు. దీని వల్ల నెలవారీ ఈఎంఐ బరువు తగ్గుతుందన్నారు. ప్రిన్సిపల్ పేమెంట్ పైన 48 నెలల వరకు ఊరట ఉంటుందన్నారు. ఆరు ఈఎంఐల మినహాయింపు రుణగ్రహీతలకు ప్రయోజనం అన్నారు. 2022 నాటికి అందరికీ ఇళ్లు అనే కేంద్రం నినాదానికి అనుగుణంగా తాము పని చేస్తున్నామన్నారు.