Best Pension scheme: 10 కంటే తక్కువ పెట్టుబడితో 5 వేల పెన్షన్.. కేంద్ర ప్రభుత్వం హామీతో పక్కా రిటర్న్స్

Atal Pension Yojana: పదవీ విరమణ వయసు తర్వాత జీవితంపై చాలామందికి ఆందోళన ఉంటుంది. ఇతరులపై ఆధారపడకుండా సొంతగా జీవించాలని భావిస్తుంటారు. ఇందుకోసం వివిధ రకాల రిటైర్‌మెంట్ ఉత్పత్తుల్లో ఇన్వెస్ట్ చేస్తుంటారు. అయితే కేంద్ర ప్రభుత్వం అమలు చేస్తున్న ఓ పథకం ద్వారా కేవలం కప్పు టీ ఖర్చుతో నెలనెలా మంచి ఆదాయం పొందవచ్చు.

భారత ప్రభుత్వం ప్రవేశపెట్టిన ప్రధాన మంత్రి అటల్ పెన్షన్ యోజన గురించి చాలా మందికి తెలియదు. కేవలం రూ. 7 ఆదా చేస్తూ, 60 ఏళ్ల తర్వాత నెలకు 5 వేలు పెన్షన్ పొందే అవకాశాన్ని ఇది కల్పిస్తుంది. తద్వారా రిటైర్‌మెంట్ తర్వాత భవిష్యత్తుకు భరోసా లభిస్తుంది. దీంతో ఇప్పటికే ఈ పథకంలో ప్రజలు పెద్దఎత్తున పెట్టుబడి పెడుతున్నారు.

దీనిలో ఇన్వెస్ట్‌ చేసేందుకు వయసు 18 నుంచి 40 సంవత్సరాల మధ్య ఉండాలి. అయితే వయసు ఆధారంగా పెట్టుబడి మారుతూ ఉంటుందని గమనించాలి. ఉదాహరణకు 18 ఏళ్ల వయస్సులో ఈ పథకానికి దరఖాస్తు చేసుకుంటే, అటల్ పెన్షన్ యోజనలో ప్రతిరోజూ 7 ఆదా చేయాలి అంటే ప్రతి నెలా 210 పెట్టుబడిగా పెట్టాలి.

ఈ విధంగా 60 ఏళ్లు వచ్చే వరకు ఇన్వెస్ట్ చేస్తూ పోవాలి. ఇక 60 సంవత్సరాలు దాటిన తర్వాత ప్రతి నెలా 5 వేల రూపాయల పెన్షన్ అందుకోవచ్చు. కేంద్ర ప్రభుత్వం భరోసా ఉండటంతో ఎటువంటి ఆందోళన చెందాల్సిన అవసరం ఉండదు. దగ్గర్లోని బ్యాంక్ ను సందర్శించి చాలా సులభంగా ఈ ఖాతాను ఓపెన్ చేయవచ్చు.