ఇప్పుడు కమోడిటీ మార్కెట్‌లో పెట్టుబడులు పెట్టవచ్చా.. మార్కెట్ గురు ఏమంటున్నారు?

కమోడిటీ మార్కెట్‌లో ఇన్వెస్ట్ చేయడానికి ఇది మంచి సమయమా? అంటే ఈ సమయంలో కమోడిటీ స్టాక్స్‌లో ఇన్వెస్ట్ చేయకపోవడమే మంచిదని ప్రముఖ మార్కెట్ ఇన్వెస్ట్‌మెంట్ గురు మార్క్ మొబియస్ చెబుతున్నారు. సమీప భవిష్యత్తులో కమోడిటీ ధరలు పెరుగుతాయనే అంచనాలు, అభిప్రాయాలు ఉన్నప్పటికీ ఆయన మాత్రం ప్రస్తుత పరిస్థితుల్లో వీటిలో ఇన్వెస్ట్ చేయకపోవడమే ఉత్తమం అంటుండటం గమనార్హం. కమోడిటీ మార్కెట్‌కు బదులు ద్రవ్యోల్భణాన్ని అధిగమించగలిగే శక్తి కలిగిన ఈక్విటీ, కంపెనీలలో పెట్టుబడులు పెట్టాలని ఆయన సూచిస్తున్నారు.

అంతర్జాతీయంగా చమురు ధరలు పెరుగుతుండటం, రష్యా - ఉక్రెయిన్ యుద్ధం, ఫెడ్ వడ్డీ రేట్ల పెంపు సహా వివిధ అంశాల కారణంగా ద్రవ్యోల్భణం ప్రపంచవ్యాప్తంగా పెరుగుతుందనే ఆందోళనలు ఉన్నాయి. కాబట్టి కమోడిటీస్‌కు బదులు ద్రవ్యోల్భణాన్ని అధిగమించగలిగే శక్తి కలిగిన కంపెనీలు, ఈక్విటీలలో పెట్టుబడి పెట్టాలన్నారు. కరోనా తర్వాత కమోడిటీస్ ధరలు భారీగా పెరుగుతున్నాయి. చాలా ఉత్పత్తుల ధరలు గతంలో ఎన్నడూ లేని విధంగా అత్యధిక పెరుగుదలను నమోదు చేశాయి.

కరోనా తర్వాత రష్యా-ఉక్రెయిన్ యుద్ధం, ఆ తర్వాత రష్యా పైన అమెరికా, యూరోపియన్ దేశాలు ఆంక్షలు విధించడం వంటి వివిధ అంశాలు ప్రభావం చూపాయి. దీంతో కమోడిటీ ధరలు పెరిగాయి. దీనికి అనుగుణంగా కమోడిటీ స్టాక్స్ కూడా పుంజుకున్నాయి. అయితే సమీప భవిష్యత్తులో పుంజుకున్నప్పటికీ, ఆ తర్వాత కాస్త శాంతించే అవకాశాలు ఉన్నాయని, దీనిని పరిగణలోకి తీసుకోవాలని మార్కెట్ నిపుణులు చెబుతున్నారు.