EPFO: ఉద్యోగులకు శుభవార్త.. ఇక ఆటోమేటిక్‌గా నిధుల బదిలీ..!

దాదాపుగా ఉద్యోగం చేసే ప్రతి ఒక్కరికి పీఎఫ్ ఖాతా ఉంటుంది. ఉద్యోగి కొంత భాగం ఖాతాలోకి వెళ్తోంది. అలాగే యాజమాన్యం కూడా కొంత చెల్లిస్తోంది. అయితే ప్రభుత్వ ఉద్యోగులు ప్రభుత్వంలో పని చేస్తారు. వారికే ఒకే ఫీఎఫ్ ఖాతా ఉంటుంది. కానీ ప్రైవేట్ లో ఉద్యోగం చేసేవారు కంపెనీలు మారుతుంటారు. ఇలా కంపెనీలు మారే వారు పీఎఫ్ ఖాతాను బదిలీ చేసుకోవడానికి ఇబ్బంది పడేవారు. అయితే ఇప్పుడు వీరికి ఉద్యోగుల భవిష్య నిధి సంస్థ (EPFO) శుభవార్త చెప్పింది. ఇకపై ఉద్యోగం మారిన ప్రతిసారీ పాత పీఎఫ్ ఖాతాలోని డబ్బును కొత్త ఖాతాలోకి బదిలీ చేసుకోవడానికి ప్రత్యేకంగా దరఖాస్తు చేసుకోవాల్సిన అవసరం లేకుండా చేసింది. ఈపీఎఫ్‌ఓ ప్రవేశపెడుతున్న 'సెంట్రలైజ్డ్ డేటాబేస్ మైగ్రేషన్' ప్రక్రియ ద్వారా ఈ బదిలీ ఆటోమేటిక్‌గా జరిగిపోతుందని కంపెనీ ప్రకటించింది.

ఈ సాంకేతిక మార్పు ద్వారా తరచూ ఉద్యోగాలు మారే కార్పొరేట్, ఐటీ రంగాల ఉద్యోగులకు ఇబ్బంది లేకుండా ఉంటుందని చెబుతున్నారు. అయితే ఆటోమేటిక్ బదిలీ సదుపాయం సజావుగా సాగాలంటే పీఎఫ్ చందాదారులు ఒక ముఖ్యమైన నిబంధనను పాటించాల్సి ఉంటుందని చెబుతున్నారు. మీ యూనివర్సల్ అకౌంట్ నంబర్ (UAN‌)కు ఆధార్ అనుసంధానం చేయాలి. యూఏఎన్‌-ఆధార్ లింకింగ్ పూర్తయిన సభ్యులు ఒక సంస్థ నుంచి మరొక సంస్థకు మారినప్పుడు పాత కంపెనీ పీఎఫ్ ఖాతాలోని నిధులు, సర్వీస్ హిస్టరీ ఎలాంటి మాన్యువల్ అభ్యర్థనలు లేకుండానే కొత్త ఖాతాలోకి బదిలీ చేయనున్నారు.

గతంలో పాత పీఎఫ్ డబ్బులు బదిలీ అవ్వాలంటే ఆన్‌లైన్‌లో 'ఫారమ్ 13' సమర్పించాలి. పాత లేదా కొత్త యజమానుల డిజిటల్ సంతకం కోసం వేచి చూడటం వంటి ఇబ్బందులు ఉండేవి. ఇప్పుడు ఈ ఇబ్బందులు తప్పనున్నాయి. ఖాతాలు సకాలంలో విలీనం కావడం వల్ల ఉద్యోగి పీఎఫ్ సొమ్ముపై వచ్చే వడ్డీకి ఎలాంటి బ్రేకులు పడకుండా నిరంతరాయంగా కొనసాగుతుందని అధికారులు చెబుతున్నారు. చందాదారుడు మీ పీఎఫ్ మెంబర్‌ పోర్టల్‌లోకి లాగిన్ అయి ఆధార్ స్టేటస్ వెరిఫైడ్ అని ఉందో లేదో చూసుకోవాలని సూచిస్తున్నారు.

కాగా పీఎఫ్ వడ్డీని ఖాతాదారుల ఖాతాల్లో జమ చేస్తున్నారు. జూలై 15 వరకు వడ్డీ జమ పూర్తి చేయనున్నారు. ఇప్పటికే దాదాపు 80 శాతం ఖాతాల్లో వడ్డీ డబ్బులు జమ అయినట్లు EPFO తెలిపింది. ఉద్యోగుల అకౌంట్లో పడిన వడ్డీ డబ్బులను తెలుసుకునేందుకు యూనివర్సల్‌ అకౌంట్‌ నంబరు (UAN) యాక్టివ్ చేసుకోవాలి. ఇక ఇది యాక్టివ్ ​లో ఉన్నవారు ఈపీఎఫ్‌ఓ మెంబర్‌ పోర్టల్‌తోపాటు ఉమాంగ్‌ యాప్‌, ఎస్‌ఎంఎస్‌ సర్వీస్‌ ద్వారా బ్యాలెన్స్​ వివరాలు తెలుసుకోవచ్చని చెబుతున్నారు.