ఎస్సెమ్మెస్ ద్వారా నిల్ జీఎస్టీ రిటర్న్స్ ఫైల్ సదుపాయం ప్రారంభం

నిల్ జీఎస్టీ రిటర్న్స్‌ను ఎస్సెమ్మెస్ ద్వారా ఫైల్ చేసే కొత్త సౌకర్యాన్ని కేంద్ర ఆర్థికమంత్రి నిర్మలా సీతారామన్ బుధవారం(జూన్ 30) ప్రారంభించారు. తమ తమ రిజిస్టర్డ్ మొబైల్స్ ద్వారా ఎస్సెమ్మెస్ పంపించడం ద్వారా జీఎస్టీ ట్యాక్స్ పేయర్స్ రిటర్న్స్‌ను దాఖలు చేయవచ్చు. ఈ మేరకు నిర్మలా సీతారామన్ ట్వీట్ చేశారు.

జీఎస్టీ విధానాన్ని ప్రవేశపెట్టిన తర్వాత ఇప్పటి వరకు 66 కోట్లకు పైగా జీఎస్టీ ఫైల్ అయినట్లు కేంద్ర ఆర్థిక శాఖ తెలిపింది. 2017 జూలై 1వ తేదీన జీఎస్టీ నాలుగేళ్లు పూర్తయిన సందర్భంగా వరుస ట్వీట్లు చేశారు. పన్ను చెల్లింపుదారులు, వినియోగదారులకు జీఎస్టీ స్నేహపూరితంగా ఉందనే భావన అందరిలో ఉందని పేర్కొంది.

ఫోర్ ఇయర్ జీఎస్టీ అనే హ్యాష్ ట్యాగ్‌తో మంత్రిత్వ శాఖ ట్వీట్ చేసింది. జీఎస్టీతో ప్రజలు చెల్లించే పన్ను రేటు 13.5 శాతం నుండి 11.6 శాతానికి తగ్గిందని తెలిపింది. ఏ రాష్ట్రంలో అయినా ఒక కంపెనీ వ్యాపారం చేయాల్సి వస్తే 495 రకాల పత్రాలు సమర్పించవలసి వచ్చేదని, ఇప్పుడు ఆ సంఖ్య 12కు దిగి వచ్చిందని పేర్కొంది.

జీఎస్టీతో దేశాన్ని ఒకే మార్కెట్‌గా మలచడం సాధ్యపడిందని వెల్లడించింది. ఎక్సైజ్ సుంకం, వ్యాట్ తదితర 17 రకాల పన్నులు, మరో 13 రకాల సెస్‌లను ఏకం చేయడం ద్వారా దేశవ్యాప్తంగా జీఎస్టీ ప్రారంభమైంది. ఇప్పటివరకు జీఎస్టీ 1.3 కోట్ల పన్ను చెల్లింపుదారులు నమోదైనట్లు ఆర్థిక శాఖ తెలిపింది.