ఏడాది తిరిగే లోపు రిచ్ అయిపోవచ్చు! వచ్చే ఏడాది నుంచి ఈ పనులు మొదలుపెట్టేయండి!

మరో కొత్త సంవత్సరం రాబోతోంది. కొత్త ఆశలు, కొత్త లక్ష్యాలతో పాటు, మీ ఫైనాన్షియల్ గోల్స్ కూడా తప్పనిసరి. మనం ఒక ప్రయాణం మొదలుపెట్టినప్పుడు గమ్యానికి ఇంకా ఎంత దూరం ఉందో తెలుసుకోవడానికి మైలురాళ్లను చూస్తాం కదా? మన ఆర్థిక ప్రయాణం కూడా అంతే!

రిటైర్‌మెంట్ వయస్సు అంటూ ఒక పరిమితి ఉంటుంది. కాబట్టి ఆ లోపు మనం అనుకున్న లక్ష్యాలను చేరుకోవాలంటే.. ప్రణాళికను ఎప్పటికప్పుడు సమీక్షించుకోవడం చాలా ముఖ్యం. ఆర్థిక లక్ష్యాల సమీక్ష ద్వారానే మనం లక్ష్యానికి ఎంత దూరంలో ఉన్నామో తెలుస్తుంది. మీ పరుగు వేగం పెంచాలా? లేక దారి మార్చుకోవాలా? అనేది ఈ సమీక్షే చెబుతుంది.

ఇయర్ రివ్యూ చేసుకోండి

ప్రతి ఏడాది తప్పకుండా ఆర్థిక లక్ష్యాలను ఒకసారి రివ్యూ చేసుకోవాలి. చాలామంది ఫైనాన్షియల్ ప్లానర్స్ కూడా ఇదే విషయాన్ని నొక్కి చెబుతారు. ఈ రివ్యూ ఎలా చేసుకోవాలంటే..

1. జీవితంలో మార్పులు:

• కుటుంబంలో మార్పులు: పెళ్లి కావడం, పిల్లలు పుట్టడం వంటి ముఖ్యమైన సంఘటనలు జరిగినప్పుడు మీ ఆర్థిక ప్రాధాన్యతలు పూర్తిగా మారిపోతాయి. పిల్లల చదువు, వివాహం వంటి కొత్త లక్ష్యాలు చేరుతాయి. ఈ మార్పులకు అనుగుణంగా ప్రణాళికను తిరగరాయాలి.
• ఆదాయంలో మార్పులు: ఉద్యోగం మారినా, జీతం పెరిగినా మీ ఖర్చు పెట్టగలిగే ఆదాయం మారుతుంది. పెరిగిన ఆదాయాన్ని సరిగ్గా ఉపయోగించుకోవడానికి, పెట్టుబడులకు ఎక్కువ నిధులు కేటాయించాలి.

2. పెట్టుబడుల పనితీరు:

• అంచనాలు vs వాస్తవం: పెట్టుబడులు ప్రారంభించేటప్పుడు మనం ఒక నిర్దిష్ట రాబడిని ఆశిస్తాం. కానీ, మార్కెట్ పరిస్థితులు మారవచ్చు. అనుకున్న రాబడి రాకపోతే, లక్ష్యాన్ని చేరుకోవడానికి మీ SIP మొత్తాన్ని మార్చాల్సి రావచ్చు. దానికి అనుగుణంగా సిప్ ప్లానింగ్ (SIP Planning) చేసుకోండి.
• బాగాలేని వాటిని మార్చడం: మీ మ్యూచువల్ ఫండ్ పథకాలు సరిగా పనిచేయకపోతే.. ఆ స్కీముల్లో SIPలను ఆపివేసి, మంచి పనితీరు కనబరిచే పథకాల్లో పెట్టుబడి పెట్టడం ద్వారా మీ రాబడిని పెంచుకోవచ్చు.

ఆస్తుల కేటాయింపు (Asset Allocation)

ఇకపోతే వ్యక్తిగత పథకాల పనితీరుతో పాటు.. మీరు చేసిన మొత్తం ఆస్తుల కేటాయింపును (ఈక్విటీ, డెట్ నిష్పత్తి) సమీక్షించడం చాలా కీలకం. స్టాక్ మార్కెట్‌ (Stock Market) విషయానికొస్తే.. ఒకవేళ ఈక్విటీ మార్కెట్ బాగా వృద్ధి చెంది, మీ మొత్తం పోర్ట్‌ఫోలియోలో ఈక్విటీ వాటా పెరిగితే (ఉదాహరణకు, 60% ఉండాల్సింది 75%కి చేరితే), రిస్క్‌ను తగ్గించడానికి కొంత ఈక్విటీని డెట్ (Debt) సాధనాలకు బదిలీ చేయాలి. ఈ ఆర్థిక లక్ష్యాల సమీక్ష ద్వారా మీరు రిస్క్‌ను తగ్గించి, మీ పెట్టుబడులపై రాబడిని సరైన స్థాయిలో ఉంచుకోవచ్చు.

ఇన్సూరెన్స్ రివ్యూ

ఆర్థిక లక్ష్యాల సమీక్ష తో పాటు, మీ ఇన్సూరెన్స్ పోర్ట్‌ఫోలియోను కూడా తప్పనిసరిగా సమీక్షించాలి.

• లైఫ్ ఇన్సూరెన్స్: జీవితంలో మార్పులు (పెళ్లి, పిల్లలు) లేదా ఆదాయం పెరిగినప్పుడు, మీ జీవిత బీమా అవసరాలు పెరుగుతాయి. సాధారణంగా, వార్షిక ఆదాయానికి 12 రెట్లు లైఫ్ ఇన్సూరెన్స్ ఉండాలని నిపుణులు సూచిస్తారు. ఆదాయం పెరిగే కొద్దీ కవరేజీని పెంచుకోవాలి.
• హెల్త్ ఇన్సూరెన్స్: భారతదేశంలో వైద్యం, విద్య ఖర్చులు వేగంగా పెరుగుతున్నాయి. ప్రస్తుతం ప్రధాన వ్యాధుల చికిత్స ఖర్చులను దృష్టిలో ఉంచుకుని మీ హెల్త్ ఇన్సూరెన్స్ కవరేజీ సరిపోతుందో లేదో చూసుకోవాలి.
• అదనపు కవరేజీ: మీకు అధిక రక్తపోటు (Hypertension) లేదా డయాబెటిస్ వంటి జీవనశైలి వ్యాధులు ఉన్నట్లు తేలితే, భవిష్యత్తులో వచ్చే చికిత్స ఖర్చులను కవర్ చేయడానికి వెంటనే హెల్త్ ఇన్సూరెన్స్ కవరేజీని పెంచుకోవడం మంచిది. ఎందుకంటే, ఇప్పటికే ఉన్న వ్యాధులకు బీమా కవర్ అవ్వడానికి కొన్ని సంవత్సరాల వెయిటింగ్ పీరియడ్ ఉంటుంది. అలాగే ఉద్యోగులకు కంపెనీ ఇచ్చే హెల్త్ ఇన్సూరెన్స్‌తో పాటు.. సొంతంగా ఇండిపెండెంట్ హెల్త్ ఇన్సూరెన్స్ ఉండటం తప్పనిసరి.

మొత్తంగా మీ మీ ఆర్థిక లక్ష్యాలను ఒకసారి రివ్యూ చేసుకుని వచ్చే ఏడాది నుంచి అవసరమైన మార్పులు చేసేయండి. ఇలా ముందునుంచే రెడీగా ఉంటే చేస్తే ఆర్థికంగా వచ్చే ఇబ్బందులను తెలివిగా ఎదుర్కోవచ్చు. మీ ఆర్థిక లక్ష్యాలను ఈజీగా చేరుకోవచ్చు.