దర్జాగా బతకాలనే మోజు.. అప్పుల ఊబిలోకి మధ్యతరగతి కుటుంబాలు.. RBI హెచ్చరిక ఇదే..

దర్జాగా బతకాలనే మోజులో భారతీయ కుటుంబాలు మునుపెన్నడూ లేని విధంగా అప్పుల్లో మునిగిపోతున్నాయి. రుణాలు సులభంగా లభించడం, తక్షణ జీవనశైలి ఆకాంక్షల పెరుగుదలతో చాలా మంది అప్పులపై ఆధారపడే పరిస్థితి రోజు రోజుకూ పెరుగుతోంది. పర్సనల్ ఫైనాన్స్ ఇన్‌ఫ్లూయెన్సర్ (Personal Finance Influencer) నేహా నగర్ చెబుతున్న వివరాల ప్రకారం.. భారతదేశంలో 70 శాతం ఐఫోన్లు (iPhones) రుణాల ద్వారా, 80 శాతం కార్లు EMIల ద్వారా కొనుగోలు అవుతున్నాయి.

ఈ వినియోగ రుణాల పెరుగుదల భారతదేశ ఆర్థిక ప్రవర్తనలో లోతైన మార్పును సూచిస్తోంది. ఆదాయాలు తక్కువగా ఉన్నప్పటికీ, కోరికలు వేగంగా పెరుగుతున్నందున, ఎక్కువ మంది వ్యక్తులు ఆస్తులు నిర్మించేందుకు కాకుండా, జీవనశైలిని కొనసాగించడానికి రుణాల వైపు దృష్టి పెట్టుతున్నారు.

నిపుణుల చెబుతున్న వివరాల ప్రకారం, అన్ని రుణాలు సమానంగా ఉపయోగకరంగా ఉండవు. మంచి రుణాలు అంటే భవిష్యత్తులో సంపాదన సామర్థ్యాన్ని పెంచే రుణాలు. విద్యా రుణాలు, గృహ రుణాలు, వ్యాపార విస్తరణ కోసం తీసుకున్న రుణాలు, ప్రొఫెషనల్ స్కిల్స్ కోసం అప్‌స్కిల్లింగ్ రుణాలు. ఇవి ఆర్థిక స్థిరత్వానికి దోహదపడతాయి. దీనికి విరుద్ధంగా విలాస వస్తువులు, గాడ్జెట్లు, సెలవులు వంటి సామాన్య వినియోగానికి తీసుకునే చెడు రుణాలు దీర్ఘకాలిక విలువను కలిగించవు. ఈ రుణాలు తాత్కాలిక సంతోషాన్ని ఇస్తాయి, కానీ వీటితో భారతీయులు EMIల అప్పుల చక్రంలో (Debt Trap) చిక్కుకుపోతున్నారు.

ఫైనాన్స్ రచయిత రాబర్ట్ కియోసాకి (Robert Kiyosaki) తన పుస్తకం 'రిచ్ డాడ్ పూర్ డాడ్' లో పేర్కొన్నట్టుగా..ధనవంతులు రుణాలను ఆస్తులను నిర్మించడానికి వాడతారు, పేద, మధ్యతరగతివారు విలాసాలను కొనడానికి ఉపయోగిస్తారన్నారు. ఈ వ్యత్యాసం భారత మధ్యతరగతి EMI సంస్కృతిని సరిగ్గా వివరించేలా ఉంది.ఇలాంటి పరిస్థితుల్లో.. రుణాలపై అధికంగా ఆధారపడటం భవిష్యత్తులో ఆర్థిక సమస్యలకు దారితీయవచ్చు. నేహా నగర్ చెప్పినట్లుగా అప్పు శత్రువు కాదు, అజ్ఞానం శత్రువు. ప్రజలు మంచి రుణాలు, చెడు రుణాల మధ్య తేడాను గుర్తించి, వ్యర్థ ఖర్చుల వలన తలెత్తే ఆర్థిక ఒత్తిడిని నివారించాలంటున్నారు.

RBI డేటా ప్రకారం చూసుకున్నట్లయితే.. గృహ రుణాలు, వ్యక్తిగత రుణాలు, EMIలపై ఆధారపడే వినియోగం పెరుగుతోంది. దీన్ని అంచనా వేసి, కేంద్ర బ్యాంక్ ఇప్పటికే అన్‌సెక్యూర్డ్ రుణాల రిస్క్ వెయిట్లను 125 శాతానికి పెంచి క్రెడిట్ విస్తరణను నియంత్రిస్తోంది. అయినప్పటికీ తలసరి గృహ రుణం రూ. 3.9 లక్షల నుంచి రూ. 4.8 లక్షలకు పెరగడం ఆందోళన కలిగిస్తోంది. మార్చి 2021-2025 మధ్య వ్యక్తిగత రుణాలు సంవత్సరానికి 20.4% వృద్ధి రేటుతో పెరిగాయి, ఇది వినియోగం ఆధారిత రుణాల పెరుగుదలని స్పష్టంగా చూపిస్తుంది.

2015లో GDPలో 26 శాతంగా ఉన్న గృహ రుణం-GDP నిష్పత్తి, 2024 డిసెంబరులో 41.9 శాతానికి చేరింది. అంటే దాదాపు రెట్టింపు అయింది. అదేవిధంగా, వినియోగ రుణాల వాటా కూడా గణనీయంగా పెరిగింది. క్రెడిట్ కార్డులు, వ్యక్తిగత రుణాలు, కన్స్యూమర్ డ్యూరబుల్స్ రుణాలు ఇప్పుడు మొత్తం రిటైల్ రుణాల్లో 54.9 శాతం వరకు చేరాయి.ఇక గృహ రుణాల వాటా 2019లో 37 శాతం ఉండగా, 2024లో అది 29 శాతానికి పడిపోయింది. ప్రస్తుతం వినియోగదారుల రుణాలలో NPAలు (నిరర్థక రుణాలు) కేవలం 1.4%గా ఉన్నప్పటికీ, పొదుపు రేట్లు 47 సంవత్సరాల కనిష్ట స్థాయికి.. GDPలో 5.3 శాతం వరకు పడిపోయాయి. ఇది భవిష్యత్‌లో ఆర్థిక అసమతుల్యతకు దారితీయవచ్చని నిపుణులు చెబుతున్నారు.

ఏదేమైనా ఐఫోన్-ఆన్-EMI, కార్ల EMI కొనుగోళ్లు ఒక వ్యక్తిగత సౌకర్యం మాత్రమే కాక.. భారతీయుల ఆర్థిక సంస్కృతిలో నిర్మాణాత్మక-విధ్వంసక రుణాల మధ్య తేడా గుర్తించే అవసరంను సూచిస్తున్నాయి. ఈ రుణ అలవాట్లు ఉత్పాదక రుణాల వైపు మళ్లకపోతే, భారతదేశం రుణ సంక్షోభం ఎదుర్కొనే ప్రమాదంలో ఉందని నిపుణులు హెచ్చరిస్తున్నారు. భారత ఆర్థిక వ్యవస్థ ఇప్పుడు క్రెడిట్ ఆధారిత వినియోగంపై అధికంగా ఆధారపడుతోంది; ఇది దీర్ఘకాలిక వృద్ధికి ప్రమాదకరమని RBI కూడా హెచ్చరించింది.