క్రెడిట్ కార్డ్ బిల్లు రూ. 1 లక్ష వచ్చిందా.. ప్రతినెలా మినిమమ్ అమౌంట్ కడితే ఏమవుతుందో తెలుసుకోండి..

Credit Card Minimum Payment Trap: అత్యవసర అవసరాలు, ఆన్‌లైన్ షాపింగ్‌కు క్రెడిట్ కార్డ్ ఎంతో ఉపయోగకరంగా ఉన్నప్పటికీ, గడువు నాటికి బిల్లును పూర్తిగా చెల్లించకపోతే భారీ ఆర్థిక సమస్యలు ఎదురవుతాయి. కార్డ్ స్టేట్‌మెంట్‌లో 'పూర్తి బకాయి' (Total Due) తో పాటు 'కనీస చెల్లింపు మొత్తం' (Minimum Amount Due) అనే నిబంధన కనిపిస్తుంది. బిల్లును పూర్తిగా కట్టడం కష్టమైనప్పుడు కనీస మొత్తాన్ని మాత్రమే చెల్లించడం ఒక సులువైన మార్గంగా తోచవచ్చు. కానీ ఇది దీర్ఘకాలిక అప్పుల ఊబికి దారితీస్తుందని ఆర్థిక నిపుణులు హెచ్చరిస్తున్నారు.

ఆర్‌బిఐ (RBI) నిబంధనల ప్రకారం చెల్లింపు గడువు నాటికి పూర్తి బిల్లును చెల్లించకపోతే.. వినియోగదారులు పొందే ఉచిత వడ్డీ గడువు కాలం (Interest-free period) రద్దవుతుంది. ప్రస్తుతం ఎస్‌బిఐ కార్డ్ వంటి ప్రధాన సంస్థలు బకాయిలపై నెలకు 3.75 శాతం లేదా సంవత్సరానికి 45 శాతం వరకు ఫైనాన్స్ ఛార్జీలను విధిస్తున్నాయి.

రూ. 1 లక్ష బిల్లు ఉదాహరణ - లెక్కలు ఇలా ఉంటాయి:

ఒకవేళ కార్డ్ బకాయి రూ. 1,00,000 ఉండి, నెలకు 3.75% ఫైనాన్స్ ఛార్జీ వర్తిస్తుందనుకుంటే:

నెలవారీ వడ్డీ ఛార్జీ: రూ. 1,00,000 × 3.75% = రూ. 3,750
జీఎస్టీ భారం (18%): వడ్డీ ఛార్జీపై జీఎస్టీ సుమారు రూ. 675
మొత్తం ఛార్జీలు: వడ్డీ + జీఎస్టీ కలిపి ప్రతి నెల సుమారు రూ. 4,425 అవుతుంది.

ఈ పరిస్థితిలో మీరు నెలకు రూ. 5,000 చెల్లిస్తున్నప్పటికీ, అందులో రూ. 4,425 కేవలం వడ్డీ, పన్నులకే సరిపోతుంది. అసలు అప్పు తగ్గడానికి కేవలం రూ. 575 మాత్రమే మిగులుతుంది. దీనివల్ల మొదటి నెల ముగిసేసరికి మీ బకాయి రూ. 99,425 గానే మిగిలిపోతుంది. కొత్తగా ఏమీ కొనకపోయినా, ఈ పద్ధతిలో రూ. 1 లక్ష అప్పు తీరడానికి దాదాపు 4 సంవత్సరాల సమయం పట్టడమే కాకుండా, తిరిగి చెల్లించే మొత్తం ఏకంగా రూ. 2.5 లక్షలకు చేరుకుంటుంది.

Also Read

46 పైసలు చెల్లించలేదని రూ.1,200 ఛార్జీలు.. క్రెడిట్ కార్డ్ బిల్లు చెల్లింపులో చిన్న పొరపాటుకి భారీ షాక్..

సమస్య నుంచి బయటపడే మార్గాలు:

కార్డుపై పాత బకాయిలు ఉన్నప్పుడు కొత్త కొనుగోళ్లు చేయడం వల్ల వడ్డీ మరింత వేగంగా పెరుగుతుంది. కాబట్టి బకాయిలు తీరే వరకు కొత్త ఖర్చులను పూర్తిగా నిలిపివేయడం మొదటి అడుగు. కనీస మొత్తం కంటే వీలైనంత ఎక్కువ మొత్తాన్ని చెల్లించడం వల్ల అసలు త్వరగా తగ్గి వడ్డీ భారం తగ్గుతుంది. అంతేకాకుండా, కార్డ్ జారీ చేసే బ్యాంకును సంప్రదించి బకాయి ఉన్న మొత్తాన్ని తక్కువ వడ్డీ కలిగిన సులభ వాయిదాల (EMI) రూపంలోకి మార్చుకోవడం కూడా మంచిది. పొదుపు ఖాతా లేదా తక్కువ రాబడి ఇచ్చే డిపాజిట్లలో డబ్బులు ఉంటే, క్రెడిట్ కార్డ్ అధిక వడ్డీతో పోల్చి చూసి వాటిని బకాయి చెల్లింపుకు ఉపయోగించడమే సరైన నిర్ణయం. 'కనీస చెల్లింపు' అనేది తాత్కాలిక అత్యవసర రక్షణ మాత్రమే తప్ప.. దీర్ఘకాలిక చెల్లింపు వ్యూహం కాదని గుర్తించాలి.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.