గుడ్న్యూస్, వడ్డీ రేట్లను పెంచిన కెనరా బ్యాంకు: ఏ కాలపరిమితిపై ఎంత అంటే?
ప్రభుత్వరంగ కెనరా బ్యాంకు ఫిక్స్డ్ డిపాజిట్ (FD) వడ్డీ రేట్లను 0.25 శాతం పెంచింది. కొత్త వడ్డీ రేట్లు తక్షణమే అమలులోకి వచ్చాయి. తాజాగా సవరించిన వడ్డీ రేటు ప్రకారం ఏడాది లోపు డిపాజిట్ పైన 5.1 శాతానికి, ఏడాది నుండి రెండేళ్ల కాలపరిమితిపై ఫిక్స్డ్ డిపాజిట్ వడ్డీ రేటు 5.15 శాతానికి పెరిగింది. ఈ రెండు డిపాజిట్స్ పైన ప్రస్తుతం వడ్డీ రేటు 5 శాతంగా ఉంది. రెండేళ్ల నుండి మూడేళ్ల కాలపరిమితిపై వడ్డీ రేటు 5.20 శాతానికి, 3-5 సంవత్సరాల ఎఫ్డీపై 5.45 శాతానికి పెంచారు. అయిదేళ్ల నుండి పదేళ్ల కాలపరిమితిపై ఫిక్స్డ్ డిపాజిట్ వడ్డీ రేటు గరిష్టంగా 0.25 శాతం నుండి 5.5 శాతానికి పెరిగింది.
సీనియర్ సిటిజన్స్కు అన్ని కాలపరిమితిలపై వడ్డీ రేటు 50 బేసిస్ పాయింట్లు ఎక్కువగా ఉంటుంది. కెనరా బ్యాంకు మొదటిసారి రూ.1000 కోట్లు, ఆపై డిపాజిట్ల పైన కొత్త స్లాబ్ను తీసుకు వచ్చింది. ఈ డిపాజిట్లపై 3.5 శాతం వడ్డీని అందించనున్నట్లు తెలిపింది. కెనరా యూనిక్ కింద రూ.2 కోట్ల లోపు డిపాజిట్లపై 5.55 శాతం వడ్డీని, సీనియర్ సిటిజన్లకు 6.05 శాతం వడ్డీని ఆఫర్ చేస్తోంది.
కరోనా తగ్గుదల నేపథ్యంలో బ్యాంకులు వడ్డీ రేట్లను క్రమంగా పెంచుతున్నాయి. హోమ్ లోన్, పర్సనల్ లోన్, వెహికిల్ లోన్స్ దశాబ్దంన్నర కనిష్టం వద్ద ఉన్నాయి. ఇటీవల కరోనా తగ్గడంతో రుణ వితరణలు పెరుగుతున్నాయి. ఇందుకు అనుగుణంగా బ్యాంకులు లిక్విడిటీ కోసం కూడా ఫిక్స్డ్ డిపాజిట్ వడ్డీ రేట్లను పెంచుతున్నాయి.