Mutual funds: రిటర్న్స్ కాదు, ఆదాయం గురించి ఆలోచించండి! అసలు మీ పోర్ట్‌ఫోలియో ఎలా ఉండాలంటే..

చాలామంది ఉద్యోగస్థులు తమ రిటైర్మెంట్ గురించి చాలా ధీమాగా ఉంటారు. దానికి కారణం వారి దగ్గర ఈపీఎఫ్ (EPF), ఎన్‌పీఎస్ (NPS), కొన్ని ఫిక్స్‌డ్ డిపాజిట్లు , మరికొన్ని మ్యూచువల్ ఫండ్స్ (mutual funds) లో ఎస్ఐపీ (SIP)లు ఉండటమే. కానీ, "భవిష్యత్తులో మీ నెలవారీ ఖర్చులకు సరిపడా ఆదాయం గ్యారెంటీగా వస్తుందా?" అని అడిగితే మాత్రం ఎవరి దగ్గరా స్పష్టమైన సమాధానం ఉండదు. మనం పెట్టుబడులను 'ప్రొడక్ట్స్' (Products) లాగా చూస్తున్నామే తప్ప, వాటి 'పర్పస్' (Purpose) లేదా లక్ష్యం గురించి ఆలోచించడం లేదు.

1. డబ్బుకు ఉండాల్సింది రెండే పనులు

రిటైర్మెంట్ కోసం మీరు దాచే డబ్బు కేవలం రెండు పనులు మాత్రమే చేయాలి. ఒకటి 'స్టెబిలిటీ' (Stability) - అంటే మీ తిండి, అద్దె, మెడికల్ ఖర్చులకు భరోసా ఇవ్వడం. రెండు 'గ్రోత్' (Growth) - అంటే ద్రవ్యోల్బణాన్ని తట్టుకుని మీ డబ్బు పెరగడం. కానీ మన దగ్గర ఐదు ఆరు రకాల స్కీమ్‌లు ఉన్నా.. ఏది దేనికో మనకు తెలియదు. మీ దగ్గర ఉన్న మొత్తాన్ని ఈ రెండు భాగాలుగా విడగొడితేనే మీ భవిష్యత్తుపై మీకు క్లారిటీ వస్తుంది.

2. మీ శాలరీ స్లిప్ నిర్ణయిస్తున్న రిస్క్

మీరు ఏదో ఒక మ్యూచువల్ ఫండ్‌ ను ఎంచుకోవడం వల్ల రిస్క్ పెరుగుతుందని అనుకుంటారు. కానీ, నిజానికి మీ రిస్క్ మీ శాలరీ స్లిప్‌లోనే దాగి ఉంది. ప్రతి నెల ఆటోమేటిక్‌గా ఈపీఎఫ్, ఎన్‌పీఎస్ డెట్ వంటి తక్కువ రిస్క్ ఉన్న పథకాల్లోకి మీ డబ్బు వెళ్ళిపోతుంది. దీనివల్ల 35-40 ఏళ్ల వయస్సులో ఉండాల్సిన 'గ్రోత్' మీ పోర్ట్‌ఫోలియోలో ఉండటం లేదు. సేఫ్ ప్రొడక్ట్స్ పేరుతో మనం 'కాంపౌండింగ్' (Compounding) లాభాన్ని కోల్పోతున్నాం.

3. డైవర్సిఫికేషన్ అంటే వేర్వేరు బ్యాంకులు కాదు

చాలామంది దగ్గర పది రకాల పాలసీలు, ఎఫ్‌డీలు ఉంటాయి. అవన్నీ వేర్వేరు చోట్ల ఉన్నా.. అవి చేసే పని మాత్రం ఒక్కటే - 'పెట్టుబడిని కాపాడటం'. దీన్ని నిజమైన డైవర్సిఫికేషన్ అనలేం. రిటైర్మెంట్ ప్లానింగ్‌ లో అసలైన డైవర్సిఫికేషన్ అంటే.. కొంత డబ్బు సురక్షితంగా ఉండాలి. కొంత డబ్బు ఈక్విటీ (mutual funds) ద్వారా వేగంగా పెరగాలి.

4. రిటర్న్స్ కాదు.. ఆదాయం ముఖ్యం

మనం ఎప్పుడూ ఫండ్ ఎంత రిటర్న్ ఇచ్చిందని చూస్తాం. కానీ, 20 ఏళ్ల తర్వాత ఆ డబ్బు మనకు నెలకు ఎంత ఆదాయాన్ని ఇస్తుందో లెక్కించం. రిటైర్మెంట్ కి కావాల్సింది ఒకేసారి వచ్చే పెద్ద మొత్తం కాదు, ప్రతి నెలా చేతికి అందే స్థిరమైన ఆదాయం.

ఒక్క పేజీతో మీ ప్లాన్ మార్చుకోండి

మీరు కొత్తగా ఏ స్కీమ్ కొనక్కర్లేదు. కేవలం ఒక తెల్ల కాగితం తీసుకోండి. మీ దగ్గర ఉన్న అన్ని ఇన్వెస్ట్‌మెంట్లను రాయండి. వాటిని రెండు వరుసల్లో (స్టెబిలిటీ vs గ్రోత్) విడగొట్టండి. అప్పుడు మీకే తెలుస్తుంది - మీరు ఎక్కడ తప్పు చేస్తున్నారో! 30-40 ఏళ్లలో ఉన్నవారు గ్రోత్ మీద 50 ఏళ్లు దాటిన వారు స్టెబిలిటీ మీద దృష్టి పెట్టాలి.

రిటైర్మెంట్ పోర్ట్‌ఫోలియో అంటే స్కీమ్‌ ల సేకరణ కాదు, అది మీ జీవన ప్రమాణాలను కాపాడే ఒక వ్యవస్థ. కొత్త ప్రొడక్ట్స్ వెంట పడటం ఆపి, మీ దగ్గర ఉన్న ప్రతి రూపాయికి ఒక బాధ్యతను అప్పగించండి. అప్పుడే మీ రిటైర్మెంట్ ప్రశాంతంగా సాగుతుంది.