Benefits of Home Loan: హోమ్ లోన్ తీసుకుంటే ప్రయోజనాలు ఎన్నో
సాధారణంగా ప్రతి ఒక్కరి దీర్ఘకాల లక్ష్యం ఇంటి నిర్మాణం లేదా ఇంటిని కొనుగోలు చేయడం. ఇంటి కొనుగోలు లక్షలతో కూడిన వ్యవహారం. ఒకేసారి అంతమొత్తం చెల్లించలేని పరిస్థితుల్లో చాలామంది ఇంటిని కొనుగోలు చేయడానికి హోమ్ లోన్ తీసుకుంటారు. హోమ్ లోన్ తీసుకుంటే ఇంటిని సొంతం చేసుకోవడంతో పాటు కొన్ని రకాల ఆర్థిక ప్రయోజనాలు పొందవచ్చు.
ఇంటిని కొనుగోలు చేయడం ద్వారా పన్ను మినహాయింపు, ఓవర్ డ్రాఫ్ట్ సౌకర్యం, టాప్ అప్ వంటి వివిధ ప్రయోజనాలు ఉంటాయి. వాటితో పాటు కో-అప్లికెంట్ను చేర్చుకోవచ్చు. అలాగే మహిళలకు అదనపు ప్రయోజనాలు ఉంటాయి. మన ఆదాయాన్ని బట్టి ఈఎంఐ సౌకర్యాన్ని ఎంచుకునే వెసులుబాటు ఉంది.
హోమ్ లోన్ పైన చెల్లించే వడ్డీకి ప్రతి సంవత్సరం రూ.2 లక్షల వరకు పన్ను మినహాయింపు వర్తిస్తుంది. ఆదాయపు పన్ను చట్టంలోని సెక్షన్ 24బీ కింద ఈ ప్రయోజనం వర్తిస్తుంది. అలాగే సెక్షన్ 80సీ కింద రూ.1,50,000 వరకు అసలు మొత్తానికి కూడా పన్ను మినహాయింపు ఉంటుంది. రుణం మనకు భారంగా మారుతుందనుకుంటే కో-అప్లికెంట్ను చేర్చుకునే వెసులుబాటు ఉంది. హోమ్ లోన్ కోసం మహిళలు సహదరఖాస్తురాలిగా ఉంటే కొన్ని అదనపు ప్రయోజనాలు ఉంటాయి.
హోమ్ లోన్ కింద ఓవర్ డ్రాఫ్ట్ వసతిని పొందే అవకాశం ఉంటుంది. తరుచూ నగదు అవసరం ఉండేవారు ఈ వెసులుబాటును ఉపయోగించుకోవచ్చు. ఎలాంటి వడ్డీ లేకుండా గడువు తీరేలోగా తిరిగి చెల్లించవచ్చు. ఓడీ ద్వారా తీసుకున్న మొత్తాన్ని తిరిగి హోమ్ లోన్ చెల్లింపుకు ఉపయోగించుకోవచ్చు. అత్యవసరమైతే హోమ్ లోన్ పైన టాప్-అప్ లోన్ తీసుకోవచ్చు.