హోమ్ లోన్, కారు లోన్ పైన బ్యాంక్ ఆఫ్ మహారాష్ట్ర అదిరిపోయే ఆఫర్

ప్రభుత్వరంగ బ్యాంక్ ఆఫ్ మహారాష్ట్ర(BoM) తన కస్టమర్లకు మంచి ఆఫర్ ప్రకటించింది. రిటైల్ బొనాంజా ఫెస్టివ్ ధమాకా కింద హోమ్ లోన్స్ పైన వడ్డీ రేటును లైఫ్ టైమ్ కనిష్టస్థాయి 6.40 శాతానికి తగ్గించింది. ఇప్పటి వరకు వడ్డీ రేటు 6.80 శాతంగా ఉంది. అలాగే కారు రుణాలపై వడ్డీ రేటును 7.05 శాతం నుండి 6.80 శాతానికి తగ్గించింది. ఈ కొత్త రేట్లు సోమవారం నుండి అమల్లోకి వస్తున్నాయి. అయితే ఈ ఆఫర్ రుణ గ్రహీతల క్రెడిట్ స్కోర్ ఆధారంగా వర్తిస్తుందని బ్యాంక్ ఆఫ్ మహారాష్ట్ర తెలిపింది. ఇదివరకు యూనియన్ బ్యాంక్ ఆఫ్ ఇండియా హోమ్ లోన్స్ వడ్డీ రేట్లను 6.40 శాతానికి తగ్గించింది.

తాము ప్రకటించిన రిటైల్ బొనాంజా ఫెస్టివ్ ధమాకా ఆఫర్ తమ కస్టమర్లకు రుణం పైన మరింత సేవ్ చేయడానికి ఉపయోగపడుతుందని, ఇది కస్టమర్లకు అదనపు ప్రయోజనమని బ్యాంక్ ఆఫ్ మహారాష్ట్ర మేనేజింగ్ డైరెక్టర్ ఏఎశ్ రాజీవ్ అన్నారు.

బ్యాంక్ ఆఫ్ మహారాష్ట్ర 2021-22 ఆర్థిక సంవత్సరం రెండో త్రైమాసికంలో బలమైన వృద్ధి రేటును నమోదు చేసింది. ప్రాఫిట్ రెండు రెట్లు పెరిగి రూ.264 కోట్లకు చేరుకుంది. జూలై - సెప్టెంబర్ త్రైమాసికంలో ఏడాది ప్రాతిపదికన వృద్ధి రూ.2,270 కోట్ల నుండి రూ.3700 కోట్లకు పెరిగింది. బ్యాంక్ ఆఫ్ మహారాష్ట్ర స్టాక్ ధర క్రితం సెషన్లో రూ.20.70 వద్ద క్లోజ్ అయింది.