బ్యాంక్ పని మీద వెళ్లేవారికి బిగ్ అలర్ట్.. వచ్చే వారం 5 రోజుల పాటు బ్యాంకులు మూత..

ఈ వారం బ్యాంక్ పని మీద వెళ్లేవారికి బిగ్ అలర్ట్.. వచ్చే వారం అంటే మార్చి 31 నుండి ఏప్రిల్ 5 వరకు దేశవ్యాప్తంగా వివిధ నగరాల్లో బ్యాంకులు ఐదు రోజుల పాటు మూసివేయబడనున్నాయి. అయితే, ఈ సెలవులు అన్ని రాష్ట్రాల్లోనూ వరుసగా ఒకేలా ఉండవని.. ప్రాంతీయ పండుగలు, వారాంతపు సెలవుల ఆధారంగా ఆయా నగరాల్లో బ్యాంకు శాఖలు మూసి ఉంటాయని ఖాతాదారులు గమనించాలి. ముఖ్యంగా మార్చి నెలాఖరు కావడంతో బ్యాంకు కార్యకలాపాలపై ఈ సెలవుల ప్రభావం ఉండే అవకాశం ఉంది. ఈ ఆరు రోజుల వ్యవధిలో ఏయే రోజుల్లో ఎక్కడెక్కడ సెలవులు ఉన్నాయో వివరంగా తెలుసుకోవడం చాలా అవసరం.

మార్చి 31వ తేదీన మహావీర్ జయంతి సందర్భంగా దేశంలోని ప్రధాన నగరాలైన హైదరాబాద్, ముంబై, న్యూఢిల్లీ, అహ్మదాబాద్, బెంగళూరు, చెన్నై, కోల్‌కతా మరియు లక్నోలలో బ్యాంకులకు సెలవు ప్రకటించారు. ఇది నెగోషియబుల్ ఇన్‌స్ట్రుమెంట్స్ యాక్ట్ కింద ఇచ్చే సెలవు కాబట్టి ఈ నగరాల్లోని ప్రభుత్వ, ప్రైవేట్ బ్యాంకు శాఖలు పనిచేయవు. ఆ తర్వాతి రోజైన ఏప్రిల్ 1న ఆర్థిక సంవత్సరం ముగింపు నేపథ్యంలో బ్యాంకుల ఖాతాల వార్షిక ముగింపు (Annual Closing of Accounts) ప్రక్రియ ఉంటుంది. దీనివల్ల భారతదేశంలోని మెజారిటీ నగరాల్లో బ్యాంకులు మూసి ఉంటాయి. అయితే రాంచీ, షిల్లాంగ్, సిమ్లా, కోహిమా, గాంగ్‌టక్, ఐజ్వాల్ వంటి నగరాల్లోని బ్యాంకులు ఈ జాబితాలో లేకపోవడం గమనార్హం.

ఏప్రిల్ 2వ తేదీన మౌండీ గురువారం సందర్భంగా కేరళలోని కొచ్చి నగరంలో బ్యాంకులకు సెలవు ఉంటుంది. మిగిలిన రాష్ట్రాల్లో బ్యాంకులు యధావిధిగా పనిచేస్తాయి. ఆ తర్వాతి రోజు ఏప్రిల్ 3న 'గుడ్ ఫ్రైడే' సందర్భంగా దేశవ్యాప్తంగా చాలా నగరాల్లో బ్యాంకులు మూసివేయబడతాయి. క్రైస్తవ సోదరులకు ఇది ముఖ్యమైన దినం కావడంతో ఆర్బీఐ సెలవుల క్యాలెండర్ ప్రకారం సెలవు వర్తిస్తుంది. కానీ చండీగఢ్, గౌహతి, జైపూర్, జమ్మూ, శ్రీనగర్ వంటి ప్రాంతాల్లో బ్యాంకులు పనిచేస్తాయని తెలుస్తోంది. చివరగా ఏప్రిల్ 5వ తేదీ ఆదివారం కావడం వల్ల దేశవ్యాప్తంగా ఉన్న షెడ్యూల్డ్, నాన్-షెడ్యూల్డ్ బ్యాంకులన్నీ ప్రభుత్వ సెలవును పాటిస్తాయి.

New Rules: ఏప్రిల్ 1 నుంచి ATM రూల్స్ మారుతున్నాయి.. ఇకపై ఛార్జీలు బాదుడే!

ఆర్బీఐ సెలవులను మూడు రకాలుగా విభజిస్తుంది.. నెగోషియబుల్ ఇన్స్ట్రుమెంట్స్ చట్టం కింద సెలవులు, రియల్ టైమ్ గ్రాస్ సెటిల్మెంట్ (RTGS) కింద సెలవులు, ఖాతాల ముగింపు సెలవులు. ప్రాంతీయ పండుగలను బట్టి ఆయా రాష్ట్ర ప్రభుత్వాల నోటిఫికేషన్ ఆధారంగా కూడా ఈ సెలవులు మారుతుంటాయి. ఉదాహరణకు తిరువళ్లువర్ దినం వంటి సందర్భాల్లో కేవలం తమిళనాడు లేదా కొచ్చి వంటి ప్రాంతాల్లోనే సెలవు ఉండవచ్చు. బ్యాంకులు భౌతికంగా మూసి ఉన్నప్పటికీ, ఖాతాదారులకు ఇబ్బంది కలగకుండా మొబైల్ బ్యాంకింగ్, ఇంటర్నెట్ బ్యాంకింగ్, ఏటీఎం సేవలు నిరంతరాయంగా అందుబాటులో ఉంటాయి. అత్యవసర లావాదేవీల కోసం డిజిటల్ ప్లాట్‌ఫారమ్‌లను ఉపయోగించుకోవాలని నిపుణులు సూచిస్తున్నారు.