హాస్పిటల్ ఖర్చులకు అపోలో-బజాజ్ ఆఫర్: EMI హెల్త్ కార్డ్, ఎలా తీసుకోవచ్చు?

అపోలో హాస్పిటల్స్, బజాజ్ ఫిన్‌సర్వ్ మంగళవారం కీలక భాగస్వామ్యం కుదుర్చుకున్నాయి. వైద్య సేవల సంస్థ, ఆర్థిక సేవల సంస్థ కలిసి హెల్త్ ఈఎంఐ కార్డును (Health EMI card) తీసుకు వచ్చాయి. వైద్య సేవలకు అయ్యే వ్యయాన్ని నెలవారీ వాయిదాలలో చెల్లించేందుకు ఈ కార్డు వెసులుబాటు కల్పిస్తుంది. బజాజ్ ఫిన్‌సర్వ్‌తో కలిసి కో-బ్రాండెడ్ హెల్త్ ఈఎంఐ కార్డును తీసుకు వచ్చినట్లు అపోలో హాస్పిటల్స్ ప్రకటించింది.

ఒకేసారి ఖర్చు భరించలేని వారికి ఈఎంఐ కార్డు ప్రయోజనం

హెల్త్ ఈఎంఐ కార్డు తీసుకుంటే చికిత్స కోసం ఆసుపత్రిలో చేరినప్పుడు ఛార్జీలు చెల్లించనవసరం లేదు. ఛార్జీల చెల్లింపు విషయంలో ఇబ్బంది పడకుండా ఈ కార్డు ఉపయోగపడుతుంది. ఈ కార్డు ఉంటే తమ వైద్య సేవల ఖర్చులను పన్నెండు నెలల వాయిదాలలో చెల్లించవచ్చు. ఒకేసారి చికిత్స ఖర్చులు భరించలేని వారికి ఇది ఎంతో ప్రయోజనం.

హెల్త్ ఈఎంఐ కార్డ్ ఇలా తీసుకోవచ్చు..

హెల్త్ ఈఎంఐ కార్డు ఉన్నవారికి పర్సనల్ యాక్సిడెంట్ ఇన్సూరెన్స్ కవరేజీతో పాటు డిస్కౌంట్ వోచర్స్, కూపన్స్ ఆఫర్ చేస్తారు. ఆర్బీఐ నిబంధనల ప్రకారం పాన్ కార్డ్, ఆధార్ కార్డ్, క్యాన్సిల్ చెక్స్ సమర్పించి ఈ కార్డును తీసుకోవచ్చు.

అపోలో హాస్పిటల్స్‌లలో ప్రత్యేక కౌంటర్లు

బజాజ్ ఫిన్‌సర్వ్-అపోలో హాస్పిటల్స్ ఒప్పందం నేపథ్యంలో అపోలో ఆసుపత్రులలో బజాజ్ ఫిన్‌సర్వ్ ప్రత్యేక కౌంటర్లను ఏర్పాటు చేయనుంది. మంగళవారం చెన్నైలో జరిగిన కార్యక్రమంలో అపోలో హాస్పిటల్స్‌ గ్రూప్ చైర్మన్ ప్రతాప్‌ సి రెడ్డి, ఎండీ సునీతా రెడ్డి, బజాజ్ ఫైనాన్స్ ఎండీ రాజీవ్‌ జైన్ ఈ కార్డును ఆవిష్కరించారు.