రూ.5 లక్షల కోట్లు క్రాస్ చేసి, 2020ని దాటుతున్న కంపెనీలివే..

ముంబై: భారత్‌లోని 5 లిస్టెడ్ కంపెనీల మార్కెట్ క్యాపిటలైజేషన్ రూ.5 లక్షల కోట్లు దాటి 2020 ఏడాది ముగుస్తోంది! కేవలం డిసెంబర్ త్రైమాసికంలోనే ఇప్పటి వరకు ఫారెన్ ఇన్వెస్టర్స్ 18.5 బిలియన్ డాలర్ల రికార్డ్ మొత్తాన్ని భారత ఈక్విటీ మార్కెట్లోకి జొప్పించారు. 2020 ముగిసే సమయానికి 5 కంపెనీల మార్కెట్ క్యాప్ రూ.5 లక్షల కోట్లు దాటి ముగుస్తుండగా, అందులో ఈ ఏడాది మాత్రమే ఈ మార్కు అందుకున్న సంస్థలు రెండు. ఒకటి హిందూస్తాన్ యూనీ లీవర్(HUL), ఇన్ఫోసిస్. తద్వారా ఈ కంపెనీలు రిలయన్స్ ఇండస్ట్రీస్, టాటా కన్సల్టెన్సీ, HDFC బ్యాంకు లిమిటెడ్ జాబితాలో చేరాయి.

రిలయన్స్ ఎం-క్యాప్ అప్ అండ్ డౌన్

ముఖేష్ అంబానీ నేతృత్వంలోని రిలయన్స్ ఇండస్ట్రీస్ స్టాక్ రూ.12.64 లక్షల కోట్లు దాటింది. ఈ ఏడాది ఓ సమయంలో రూ.16 లక్షల మార్కు చేరుకున్న రిలయన్స్, ఆ తర్వాత పడిపోయింది. రూ.2,300ను క్రాస్ చేరి జీవనకాల గరిష్టాన్ని తాకింది. అయితే ఫ్యూచర్ గ్రూప్ డీల్‌కు సంబంధించి అమెజాన్‌తో న్యాయచిక్కుల నేపథ్యంలో ఇటీవల స్టాక్ 1950 దిగువకు కూడా పడిపోయింది. గతవారం కూడా రూ.1994 వద్దే ముగిసిన స్టాక్, చాలా రోజుల తర్వాత నేడు రూ.2002 వద్ద క్లోజ్ అయింది. ప్రస్తుతం ఈ కంపెనీ మార్కెట్ క్యాప్ రూ.13 లక్షల కోట్లు దిగువన ఉంది. అయినప్పటికీ దేశీయ కంపెనీల మార్కెట్ క్యాపిటలైజేషన్‌లో రిలయన్స్ ముందు ఉన్నది.

టాప్ 5 కంపెనీల మార్కెట్ క్యాప్

రిలయన్స్ తర్వాత టీసీఎస్ రెండో స్థానంలో ఉంది. ఈ కంపెనీ మార్కెట్ క్యాప్ రూ.10.91 లక్షల కోట్లు. ఇటీవలే ఈ దేశీయ ఐటీ దిగ్గజం రూ.10 లక్షల కోట్ల మార్కును క్రాస్ చేసింది. HDFC బ్యాంకు మార్కెట్ క్యాప్ రూ.7.69 లక్షల కోట్లు, హిందూస్తాన్ యూనీలీవర్ మార్కెట్ క్యాప్ రూ.5.63 లక్షల కోట్లుగా ఉంది. ఇన్ఫోసిస్ ఎం-క్యాప్ రూ.5.26 లక్షల కోట్లు.

20 శాతం క్షీణించి.. జంప్

భారత స్టాక్ మార్కెట్లు మార్చి నెలలో 20 శాతం మేర క్షీణించాయి. లాక్ డౌన్ నేపథ్యంలో ఆ తర్వాత అంతకంతకూ పడిపోయింది. మార్చి 23న 26వేల దిగువకు పతనమైంది. అన్-లాక్ తర్వాత క్రమంగా కోలుకుంటున్న మార్కెట్లు, రెండు నెలలుగా సరికొత్త శిఖరాలను తాకుతున్నాయి.

ఇక, 2021లో కొన్ని కంపెనీలు రూ.5 లక్షల కోట్ల జాబితాలోకి చేరే అవకాశాలు ఉన్నాయి. ఇందులో HDFC(ప్రస్తుత మార్కెట్ క్యాప్ రూ.4.44 లక్షల కోట్లు), కొటక్ మహీంద్ర (మార్కెట్ క్యాప్ రూ.3.88 లక్షల కోట్లు), ఐసీఐసీఐ బ్యాంకు (3.54 లక్షల కోట్లు) ఉన్నాయి.