ఆ ఖాతా తెరిస్తే రూ.5 లక్షల ఉచిత బీమా కవరేజీ...

భారతీ ఎయిర్ టెల్ కు చెందిన ఎయిర్ టెల్ పేమెంట్స్ బ్యాంక్ మరో వినూత్న బ్యాంక్ ఖాతాను అందుబాటులోకి తీసుకువచ్చింది. ఈ ఖాతా పేరు *భరోసా సేవింగ్స్ ఖాతా'. ఈ ఖాతా తెరిచిన కస్టమర్లు కనీస నిల్వను కొనసాగిస్తే ఉచిత ప్రమాద బీమా సదుపాయాన్ని కల్పిస్తోంది. ఈ ఖాతాలో ఎంత కనీస నిల్వ ఉండాలి, ఎంత ప్రమాద బీమా కవరేజీ లభిస్తుంది తదితర వివరాలు తెలుసుకుందామా...

కనీస నిల్వ రూ.500

* దేశంలో ఇప్పటికీ అనేక మందికి బ్యాంకు ఖాతా సదుపాయం అందుబాటులో లేదు. బీమా పరిస్థితి గురించి ప్రత్యేకంగా చెప్పనక్కర లేదు. ఈ నేపథ్యంలో ఎయిర్ టెల్ తెచ్చిన కొత్త ఖాతా ఈ రెండు అవసరాలను తీర్చేవిధంగా ఉంది.

* ఈ ఖాతాలో నెలవారీ కనీస నిల్వ కేవలం రూ.500 ఉంటే చాలు...రూ. 5 లక్షల ఉచిత వ్యక్తిగత ప్రమాద బీమా కవరేజీని అందిస్తోంది.

* ఈ సదుపాయం లభించాలంటే నెలలో కనీసం ఒక డెబిట్ లావాదేవీ నిర్వహించాలి.

* ప్రభుత్వం వివిధ పథకాల ద్వారా అందిస్తున్న సబ్సిడీలను తమ భరోసా ఖాతా ద్వారా పొందాలని నిర్ణయించుకున్నా లేదా ఖాతాలో నగదు డిపాజిట్ చేసినా కూడా క్యాష్ బ్యాక్ కు అర్హులని చెబుతోంది.

* మార్కెట్లో పరిశోధన చేసిన తర్వాతనే ఈ ఖాతాను అందుబాటులోకి తెచ్చినట్టు బ్యాంకు చెబుతోంది. ఈ ఖాతా ద్వారా అధికారిక బ్యాంకింగ్ లావాదేవీలు మరింతగా పెరగడానికి అవకాశం ఉంటుందని అంచనా వేస్తున్నారు.

* భరోసా సేవింగ్స్ ఖాతా కస్టమర్లు దేశవ్యాప్తంగా ఉన్న 6.50 లక్షలకు పైగా ఏఈపీఎస్ ఎనేబుల్డ్ ఔట్లెట్ల ద్వారా నగదును తీసుకోవచ్చు. తమ ఖాతాలో నిల్వను చెక్ చెక్ చేసుకోవచ్చు. అంతే కాకుండా మినీ స్టేట్ మెంట్ కూడా తీసుకునే అవకాశం ఉంది.

* దేశంలో తొలుత ప్రారంభమైన పేమెంట్స్ బ్యాంక్ ఎయిర్ టెల్ పేమెంట్స్. ఇది సులభతరంగా డిజిటల్ బ్యాంకింగ్ సర్వీసులను అందిస్తోంది.

మొబైల్ నెంబర్.. ఖాతానెంబర్ ఒకటే

* ఇప్పటికే ఎయిర్ టెల్ ఒక సేవింగ్స్ బ్యాంక్ ఖాతాను అందిస్తోంది. ఖాతా దారు మొబైల్ నెంబరే వారి ఖాతా నెంబర్ గా ఉంటుంది.

* ఈ ఖాతాపై 4 శాతం వడ్డీ రేటును అందిస్తున్నారు. ఆన్ లైన్ కార్డు కూడా ఉంటుంది. దీన్ని ఆన్ లైన్ లావాదేవీల కోసం వినియోగించుకోవచ్చు.

* ఈ ఖాతాపై కూడా ఉచిత పర్సనల్ యాక్సిడెంట్ బీమాను అందిస్తున్నారు.

* లావాదేవీలు నిర్వహిస్తున్నదాన్ని బట్టి బీమా కాలపరిమితి పెరుగుతుంది.

నష్టం రూ. 339 కోట్లు

* 2018-19 ఆర్ధిక సంవత్సరంలో ఎయిర్ టెల్ పేమెంట్స్ బ్యాంకు పన్నుకు ముందు నష్టం రూ.338.8 కోట్లకు చేరుకుంది. అంతకు ముందు ఆర్థిక సంవత్సరంలో పన్నులకు ముందు నష్టం రూ.272.6 కోట్లుగా ఉంది.

* 2019 మార్చి 31 తో ముగిసిన ఆర్ధిక సంవత్సరంలో అంతకు ముందు ఆర్థిక సంవత్సరంతో పోల్చితే మొత్తం రాబడి దాదాపు 59 శాతం పెరిగి రూ. 254 కోట్లకు చేరుకుంది.