దక్షిణ కొరియా రాజధాని సియోల్‌లో ఎస్‌బీఐ శాఖ

దేశీయ అతిపెద్ద ప్రభుత్వ రంగ బ్యాంకింగ్ దిగ్గజం స్టేట్ బ్యాంక్ ఆఫ్ ఇండియా (ఎస్‌బీఐ) తాజాగా దక్షిణ కొరియాలోని సియోల్‌లో తన తొలి శాఖను ప్రారంభిస్తున్నట్లు ప్రకటించింది. ఇరు దేశాల మధ్య ఆర్ధిక కార్యకలాపాల వృద్ధి కోసమే సియోల్‌లో కొత్త శాఖను ప్రారంభిస్తున్నట్లు ఎస్‌బీఐ మేనేజింగ్ డెరైక్టర్ బి.శ్రీరామ్ తెలిపారు.

దక్షిణ కొరియాలో భారతీయ బ్యాంకు శాఖను ప్రారంభించిన రెండో బ్యాంకుగా ఎస్‌బీఐ నిలిచింది. అంతకముందు ఇండియన్ ఓవర్సీస్ బ్యాంకు తన శాఖను సియోల్‌లో ఏర్పాటు చేసింది. ఎక్స్‌ఫోర్ట్-ఇంఫోర్ట్ బ్యాంక్ ఆఫ్ కొరియాతో ఇప్పటికే స్టేట్ బ్యాంక్ ఆఫ్ ఇండియా సుమారు రూ. 3,300 కోట్ల క్రెడిట్ ఒప్పందాలను కుదుర్చుకుంది.

ఎస్‌బీఐ సియోల్ శాఖ పారిశ్రామికవేత్తలకు రిటైల్ బ్యాంకింగ్‌తో సహా ట్రెడ్ ఫైనాన్స్, సిండికేటెడ్ రుణాలు, కార్పొరేట్ డిపాజిట్స్ వంటి తదితర సేవలను అందిస్తుందని ఆయన తెలిపారు. అలాగే రిటైల్ కస్టమర్లకు సేవింగ్స్, కరెంట్ అకౌంట్, టర్మ్ డిపాజిట్స్, రెమిటెన్స్ వంటి తదితర సేవలను అందిస్తుందని పేర్కొన్నారు.

ఇది ఇలా ఉంటే ప్రపంచ వ్యాప్తంగా విదేశాల్లో స్టేట్ బ్యాంక్ ఆఫ్ ఇండియాకి దాదాపు 135కి పైగా శాఖలు ఉన్నాయి.