కొత్త చట్టం: చెక్ బౌన్స్ కేసులపై వీడిన సందిగ్ధత

న్యూఢిల్లీ: చెక్‌ బౌన్స్‌ కేసును చెక్‌ జారీ చేసిన చోట పెట్టాలా లేదంటే బౌన్స్‌ అయిన ప్రాంతంలోనా పెట్టాలా అనే దానిపై సందిగ్ధత వీడింది. ఏ బ్యాంకులో అయితే చెక్ బౌన్స్ అయిందో ఇక నుంచి అక్కడే కేసును నమోదు చేసేలా కొత్త చట్టాన్ని తీసుకొచ్చారు.

దేశ వ్యాప్తంగా పుట్టల్లా పెరిగిపోయిన చెక్ బౌన్స్ కేసులపై నిర్ణయం తీసుకోవడం ఆలస్యమవుతుండటంతో వీటిని త్వరితగతిన పరిష్కరించాలని రాష్ట్రపతి ప్రణబ్ ముఖర్జీ సూచించిన సంగతి తెలిసిందే. ఈ మేరకు ప్రస్తుతం ఉన్న చట్టాల్లో మార్పులు చేశారు.

ఈ క్రమంలో ద నెగోషియబుల్‌ ఇన్‌స్ట్ర్‌మెంట్స్‌ సవరణ చట్టం- 2015కు గత శనివారం నాడు రాష్ట్రపతి ఆమోదముద్ర వేశారు. ఇటీవల పార్లమెంటు శీతాకాల సమావేశాల్లో ఈ చట్టానికి ఆమోదం లభించిన సంగతి తెలిసిందే. కాగా, దేశవ్యాప్తంగా 18 లక్షల చెక్‌బౌన్స్ కేసులు నమోదైనట్లు అంచనా.

వీటిలో 38 వేల కేసులు పలు హైకోర్టుల్లో పెండింగ్‌లో ఉన్నాయి. అయితే చెక్‌ బౌన్స్‌ కేసును ఎక్కడ నమోదుచేయాలన్న విషయంపై కొంత వివాదం నెలకొంది. లిటిగేషన్‌కు సంబంధించినవారు వివిధ ప్రాంతాల నుంచి రాకపోవడంతో చెక్‌బౌన్స్‌ల కేసులపై హైకోర్టులు నిర్ణయం తీసుకోలేకపోతున్నాయి.

దీంతో ఈ కొత్త చట్టం దీనికి పరిష్కారం చూపనుండటంతో పాటు సత్వరం విచారణ పూర్తయ్యేందుకు మార్గం చూపనుంది.