ఎల్ఐసీ కొత్త ఎండోమెంట్ పాలసీ: "లిమిటెడ్ పిరియడ్ ఎండోమెంట్ ప్లాన్"

న్యూఢిల్లీ: ప్రభుత్వ రంగ భీమా కంపెనీ లైఫ్ ఇన్సూరెన్స్ కార్పొరేషన్ (ఎల్‌ఐసీ) కొత్తగా మార్కెట్‌లోకి ఎండోమెంట్ పాలసీని ప్రవేశపెట్టింది. "లిమిటెడ్ పిరియడ్ ఎండోమెంట్ ప్లాన్" పేరుతో ప్రవేశపెట్టిన ఈ పథకానికి పరిమిత కాలానికి ప్రీమియం చెల్లిస్తే సరిపోతుంది.

ఈ పాలసీ 12, 16, 21 ఏళ్ల కాలపరిమితిలో లభిస్తోంది. పాలసీదారు తన అవసరానికి అనుగుణంగా ఇందులో ఒక కాలపరిమితిని ఎంచుకుంటే ప్రీమియంను 8 లేదా 9 ఏళ్లలో చెల్లించాల్సి ఉంటుంది. ప్రీమియం చెల్లించే కాలపరిమిని పాలసీదారుడే నిర్ణయించుకోవచ్చు.

ఈ పథకంలో కనీస బీమా మొత్తాన్ని రూ. 3 లక్షలుగా నిర్ణయించారు. ఆపైన రూ. 10,000ల్లో గరిష్టంగా ఎంత మొత్తమైనా తీసుకోవచ్చు. 18 ఏళ్ల వయసు నుండి 62 ఏళ్ల లోపు వారు ఈ పాలసీ తీసుకునేందుకు అర్హులు.

ఉదాహరణకు 30 ఏళ్ల వ్యక్తి 21ఏళ్లకు పాలసీ తీసుకొని ప్రీమియం చెల్లించే కాలపరిమితిని 8 ఏళ్లుగా ఎంచుకుంటే రూ. 3 లక్షల పాలసీకి రూ. 23, 865.. అదే తొమ్మిదేళ్లకు ఎంచుకుంటే రూ. 21, 795 చెల్లించాల్సి ఉంటుంది.

తొమ్మిదేళ్లలో సుమారు రూ. 1.96 లక్షలు ప్రీమియం కింద చెల్లిస్తే పాలసీ కాలపరిమితి తర్వాత కనిష్టంగా నాలుగు శాతం రాబడి ప్రకారం చూస్తే సుమారుగా రూ. 3 లక్షలు, అదే గరిష్టంగా 8 శాతం రాబడి ప్రకారం చూస్తే రూ. 5.30 లక్షలు వచ్చే అవకాశం ఉంది.