వ్యవసాయ బీమా రంగంలోకి రిలయన్స్ జనరల్ ఇన్సూరెన్స్

న్యూఢిల్లీ: అనిల్ అంబానీ గ్రూప్ సంస్ద అయిన రిలయన్స్ జనరనల్ ఇన్సూరెన్స్ వ్యవసాయ బీమా వ్యాపారంలోకి ప్రవేశించింది. వాతావరణ మార్పులు తదితర కారణాలవల్ల వాటిల్లే పంట నష్టాలకుగాను రైతులకు బీమా పరిహారాన్ని చెల్లించేందుకు వీలుగా వివిధ పథకాలను ప్రవేశపెట్టింది. ఈ సందర్బంలో రిలయన్స్ జనరల్ ఇన్సూరెన్స్ సీఈఓ రాకేశ్ జైన్ మాట్లాడుతూ ఆంధ్రప్రదేశ్ సహా 21 రాష్ట్రాల్లో వాతావరణ ఆధారిత పంట బీమా (డబ్యూబీసీఐ) పథకాన్ని అమలు చేయడానికి కేంద్ర ప్రభుత్వం ఎంపిక చేసిన సంస్దల జాబితాలో రిలయన్స్ జనరల్ ఒకటిగా ఉంది.

వాతావరణం, పంట దిగుబడి ఆధారిత బీమా పథకాలను ప్రవేశపెట్టడం ద్వారా దేశీయ వ్యవసాయ రంగంలోకి తొలి అడుగు వేశామన్నారు. ఇప్పటికే 5 రాష్ట్రాల్లో ఆయా ప్రభుత్వాల అనుమతితో వ్యవసాయ బీమా పథకాలను రిలయన్స్ జనరల్ ఇన్సూరెన్స్ ప్రవేశపెట్టింది. ఈ ఆర్దిక సంవత్సరం చివరికల్లా 10 రాష్ట్రాల్లో దాదాపు లక్ష మంది రైతులకు బీమా రక్షణ అందించేందుకు ప్రణాళికలను సిద్దం చేస్తున్నామన్నారు.

దీనితోపాటు కేంద్ర ప్రభుత్వ జాతీయ వ్వవసాయ బీమా పథకం (ఎన్ఏఐఎస్)లో పాలు పంచుకోవడానికి రిలయన్స్‌కు అవకాశం ఏర్పడింది. ఈ రెండు పథకాల క్రింద వార్షిక వ్యాపార ప్రీమియం విలువ సుమారు రూ. 5,000 కోట్లు ఉంటుందని అందులో రెండేళ్లలో చెప్పుకోదగ్గ వాటాను చేజిక్కించుకోవాలని లక్ష్యంగా పెట్టుకున్నామన్నారు. రైతులు చెల్లించే ప్రీమియం సొమ్ములో కేంద్ర, రాష్ట్ర ప్రభుత్వాలు సబ్సిడీని ఇవ్వనున్నాయి. ఈ రెండు పథకాల్లో భాగంగా... అధిక వర్షపాతం లేదా వర్షాల కొరత ఉన్నట్లైతే, శీతోష్ణస్థితుల్లో కలిగే మార్పుల వల్ల పంటలకు ఏమైనా నష్టం కలిగితే బీమా పరిహారాన్ని అందజేస్తారు.

వన్ఇండియా మనీ తెలుగు