ఒక పాలసీతో కుటుంబ సభ్యులందరికీ ఆరోగ్య బీమా రక్షణ

న్యూఢిల్లీ: రిలయన్స్ లైఫ్ ఇన్సూరెన్స్ కంపెనీ (ఆర్‌ఎల్‌ఐసీ) కొత్త హెల్త్‌కేర్‌ ప్రాడక్టును మార్కెట్లో విడుదల చేసింది. ఒక పాలసీతో కుటుంబ సభ్యులందరికీ ఆరోగ్య బీమా రక్షణ కల్పించే విధంగా ‘రిలయన్స్ లైఫ్ కేర్ ఫర్ యు అడ్వాంటేజ్ ప్లాన్' పేరుతో సరికొత్త వైద్య బీమా పథకాన్ని ప్రవేశపెట్టింది. హాస్పిటలైజేషన్, శస్త్రచికిత్సలు, కీలక వ్యాధులకు చికిత్స వంటి అన్ని రకాల ప్రయోజనాలను ఈ పాలసీ మొత్తం కుటుంబ సభ్యులకు అందిస్తుందని కంపెనీ విడుదల చేసిన ప్రకటనలో పేర్కొంది.

ఈ పాలసీలో కొన్ని అదనపు ఆకర్షణలు పెట్టింది. వాటిలో కావాలనుకుంటే మూడు సంవత్సరాల కాలానికి ఫిక్స్‌డ్‌ పాలసీ ప్రీమియంను ఒకేసారి చెల్లించే వెసలు బాటు కల్పించింది. దీని వల్ల పాలసీ చెల్లింపు వారికి రెండవ సంవత్సరం నుంచి పెరిగినా అదనంగా చెల్లించాల్సిన అవసరం ఉండదు. ఎన్ని క్లెయిమ్‌లు చేసుకున్నా మొదటి మూడు సంవత్సరాలకు చెల్లించిన ప్రీమియమే ఆ తర్వాతి మూడు సంవత్సరాలకు కూడా ఉండటం ఈ పాలసీలోని ప్రధాన ఆకర్షణ. సంవత్సరంలో ఎటువంటి క్లెయింలు లేకపోతే నో-క్లెయిమ్ బోనస్ కింద బీమా రక్షణ మొత్తం 5 శాతం పెంచుతారు. ఇలా గరిష్టంగా 30 శాతం వరకు నో-క్లెయిమ్ బోనస్ లభిస్తుంది. ఈ ప్లాన్‌లో కవరేజీ రూ. 2 నుండి రూ. 10 లక్షల వరకు ఉంటుంది.

వన్ఇండియా తెలుగు మనీ