సిండికేట్ బ్యాంక్ సరిక్రొత్త ప్లాన్ ‘సండే క్లినిక్’

హైదరాబాద్, ఆగస్టు 26: కాసా (కరెంట్ అకౌంట్ - సేవింగ్స్ ఆకౌంట్) ఖాతాల కోసం సిండికేట్ బ్యాంకు ఈనెల 26 నుండి 28వ తేదీ వరకూ అన్ని శాఖల్లోనూ ప్రత్యేక కార్యకలాపాలను చేపట్టనుంది. ఇందుకోసం హైదరాబాద్, సికింద్రాబాద్‌లలో ఎంపిక చేసిన ప్రదేశాల్లో ప్రత్యేక స్టాల్స్‌ను ఏర్పాటు చేస్తున్నట్లు సిండికేట్ బ్యాంక్ విడుదల చేసిన ఒక ప్రకటనలో పేర్కొంది.

ఈ సందర్భంగా ఖాతాలు ప్రారంభించే వారికి అప్పటికప్పుడే డెబిట్ కార్డు, ఇంటర్నెట్ బ్యాంకింగ్, మొబైల్ బ్యాంకింగ్, నగదు బదిలీ వంటి సదుపాయాలను కల్పిస్తోంది. జూలై 16న ప్రారంభమైన సిండికేట్ బ్యాంక్ ‘కాసా' క్యాంపెయిన్ సెప్టెంబర్ 30 వరకు కొనసాగుతుంది. కేవలం కాసా ఖాతాలను సేకరించడం మాత్రమే కాకుండా పీఓఎస్ (పాయింట్ ఆఫ్ సేల్) టెర్మినల్స్ ఏర్పాటు చేయడం. డెబిట్ కార్డుల జారీ, సిండ్ ఆరోగ్య (మెడి క్లెయిమ్ ) భీమా పథకాల విక్రయం తదితర కార్యకలాపాలను కూడా ఈ సంధర్బంగా చేపట్టనున్నారు.

ఇది ఇలా ఉంటే ఖాతాదారులకు అతి తక్కువ ధరకే బీమా రక్షణను కల్పించడానికి ‘ఫ్రీడమ్ సురక్షా' పేరుతో కెనరా బ్యాంక్ కూడా ప్రత్యేక పథకాన్ని ప్రారంభించింది. రూ. లక్ష బీమా కోసం 18 నుంచి 35 ఏళ్ల వ్యక్తులు సంవత్సరానికి ప్రీమియంగా రూ.177 చెల్లిస్తే సరిపోతుంది. 36 నుంచి 50 ఏళ్లలోపు ఉన్న ఖాతాదారులు రూ.366, ఆపైన వయస్సున్న వారు రూ.988 చెల్లించాల్సి ఉంటుంది. వచ్చే రెండు నెలల్లో కనీసం 10 లక్షల మంది ఖాతాదారులకు ఈ బీమా సౌకర్యాన్ని కల్పించాలని కెనరా బ్యాంక్ లక్ష్యంగా నిర్దేశించుకుంది.

తెలుగు వన్ఇండియా