Zomato News: జొమాటోలో మరో కొత్త సర్వీస్.. ఇకపై ఆ బాధలు తీరినట్లే..

Zomato large fleet: కొత్త కొత్త సర్వీసులను ప్రవేశపెడుతూ ఆన్‌లైన్ ఫుడ్ డెలివరీ యాప్స్ నిరంతరం వార్తల్లో నిలుస్తున్నాయి. అయితే వాటిలో కొన్ని యూజర్ల ఆగ్రహానికి గురికాగా మరికొన్ని వినియోగదారుల అభిమానాన్ని చూరగొంటున్నాయి. తాజాగా జొమాటో ఇలాంటిదే ఓ కొత్త సేవను ప్రారంభించడానికి రెడీ అయింది.

భారతదేశంలో మొట్టమొదటిసారిగా 'లార్జ్ ఫ్లీట్ ఆర్డర్'ని ప్రారంభించినట్లు జోమాటో చీఫ్ ఎగ్జిక్యూటివ్ ఆఫీసర్ దీపిందర్ గోయల్ ప్రకటించారు. గరిష్ఠంగా 50 మందికి సరిపోయే విధంగా గ్రూప్ లేదా పార్టీ ఈవెంట్‌లకు ఆర్డర్ల సప్లై నిర్వహించనున్నట్లు వెల్లడించారు. ఈ విభాగం మొత్తం పూర్తిగా ఎలక్ట్రిక్ ఫ్లీట్ ని కలిగి ఉంటుందని తెలిపారు. ఈ మేరకు Xలో ఓ పోస్ట్ చేశారు.

ఇంతకుముందు ఈ తరహా పెద్ద ఆర్డర్‌లను పలువురు సాధారణ డెలివరీ భాగస్వాములు నిర్వహించేవారని గోయల్ గుర్తుచేశారు. అయితే కస్టమర్ అనుభవం సంస్థ ఆశించిన స్థాయిలో లేదన్నారు. అందుకే కొత్త వాహనాల ద్వారా ఈ తరహా పెద్ద ఆర్డర్లను డెలివరీ చేయాలని నిర్ణయించినట్లు చెప్పారు. వినియోగదారులు ఎదుర్కొంటున్న చాలా సమస్యలను ఇది పరిష్కరించగలదని భావిస్తున్నట్లు వెల్లడించారు.

'కూలింగ్ కంపార్ట్‌మెంట్‌లు మరియు ఎయిర్ కండీషన్‌తో కూడిన హాట్ బాక్స్‌లతో కూడిన వాహనాలు ఇప్పటికే అందుబాటులో ఉన్నాయి. మేము వాటికి మరిన్ని మెరుగులుదిద్దే ప్రక్రియలో ఉన్నాము. అనుకున్న విధంగా ప్రతి వాహనాన్ని మార్చాలని ప్రయత్నిస్తున్నాం. మా కమ్యూనిటీకి మెరుగైన సేవలు అందించే ప్రయత్నాల్లో ఇదొకటి' అని దీపిందర్ వివరించారు.