Zoho ఉద్యోగులకు షాక్.. జీతాలు పెంచలేమని తేల్చి చెప్పిన అధినేత శ్రీధర్ వెంబు.. కారణం ఏంటంటే..

Zoho Salary Hike News: ఆర్టిఫిషియల్ ఇంటెలిజెన్స్ (AI) మౌలిక సదుపాయాలకు విపరీతంగా పెరుగుతున్న ఖర్చులు, సాఫ్ట్‌వేర్ మార్కెట్‌లో వ్యయాల ఒత్తిడి కారణంగా ప్రముఖ సాఫ్ట్‌వేర్-యాజ్-ఎ-సర్వీస్ (SaaS) దిగ్గజం 'జోహో' (Zoho) సంచలన నిర్ణయం తీసుకుంది. 2026 సంవత్సరానికి గాను తమ ఉద్యోగులందరికీ వార్షిక జీతాల పెంపును (Appraisals/Increments) నిలిపివేస్తున్నట్లు కంపెనీ అధికారికంగా ప్రకటించింది.

ఈ విషయాన్ని జోహో సహ వ్యవస్థాపకుడు, చీఫ్ సైంటిస్ట్ శ్రీధర్ వెంబు మంగళవారం (అక్టోబర్ 13) సోషల్ మీడియా వేదిక 'X' ద్వారా వెల్లడించారు. పెరుగుతున్న ఏఐ వర్క్‌లోడ్‌లు, నాలుగు రెట్లు పెరిగిన సర్వర్లు, డేటా సెంటర్ల నిర్వహణ వ్యయాల వల్ల తీవ్ర ఆర్థిక ఒత్తిడి ఎదురవుతోందని ఆయన పేర్కొన్నారు. అయితే, సంస్థలో సామూహిక ఉద్యోగ తొలగింపులను (Layoffs) అడ్డుకోవడానికి తాము కష్టపడుతున్నామని.. ఖర్చులను తగ్గించుకోవడంలో భాగంగా మార్కెటింగ్ బడ్జెట్‌లను కోత విధించడమే కాకుండా గడిచిన 18 నెలలుగా కొత్త నియామకాలనే పూర్తిస్థాయిలో నిలిపివేశామని తెలిపారు.

గ్లోబల్ టెక్నాలజీ ప్రపంచంలో ఏఐ విప్లవం సాంప్రదాయ సాఫ్ట్‌వేర్ వ్యాపార నమూనాలకు తీవ్ర ముప్పుగా పరిణమిస్తోంది. దీనిని ఆర్థిక విశ్లేషకులు 'సాస్పోకలిప్స్' (SaaS-pocalypse) గా అభివర్ణిస్తున్నారు. ఈ పరిణామం భారతదేశపు 315 బిలియన్ డాలర్ల అతిపెద్ద ఐటీ సేవల పరిశ్రమపై తీవ్ర ఒత్తిడిని తెస్తోంది. టాటా కన్సల్టెన్సీ సర్వీసెస్ (TCS), విప్రో, ఇన్ఫోసిస్ మరియు కాగ్నిజెంట్ వంటి ఔట్‌సోర్సింగ్ దిగ్గజాలు తమ వ్యయాలను నియంత్రించుకోవడానికి, ఒప్పందాలను పునరాలోచించుకోవడానికి తీవ్రంగా శ్రమిస్తున్నాయి.

Also Read

బెంగళూరు మెట్రోలో రోజూ ప్రయాణించాలంటే రూ.70 వేల జీతం ఉండాలా.. సోషల్ మీడియాలో హాట్ డిబేట్ లెక్క ఇదిగో..

ఏఐ సాంకేతికత అందుబాటులోకి రావడంతో గ్లోబల్ క్లయింట్లు సైతం తమ పనులను బాహ్య సంస్థలకు ఇవ్వకుండా సొంతంగానే అంతర్గతంగా పూర్తి చేసుకుంటుండటం ఐటీ కంపెనీలకు పెద్ద దెబ్బగా మారింది. గ్లోబల్ విపణిలో నిలదొక్కుకోవడానికి రాబోయే 3 నుండి 5 సంవత్సరాలలో తమను తాము పునఃసృష్టించుకోవడం తప్ప మరో మార్గం లేదని వేంబు అభిప్రాయపడ్డారు.

ఇది కేవలం జోహోకే పరిమితమైన సమస్య కాదు. ఏఐ మౌలిక వసతుల నిర్మాణం కోసం భారీగా నిధులు మళ్లిస్తున్న టెక్ దిగ్గజాలు ఉద్యోగుల లేఆఫ్స్, వేతన కోతలను నిరంతరం అమలు చేస్తున్నాయి. 'ట్రూఅప్' (TrueUp) నివేదికల ప్రకారం.. 2026లో ఇప్పటివరకు టెక్ రంగంలో 644 కంపెనీలు రోజుకు సగటున 677 మంది చొప్పున మొత్తం 1,93,698 మంది ఉద్యోగులను తొలగించాయి. ఇది అంతకుముందు 2025లో నమోదైన 2,45,953 లేఆఫ్స్ రికార్డును మరింత ముమ్మరం చేస్తోంది. ఇటీవలే అమెజాన్ తన తాజా విడతలో 1,000 మంది ఉద్యోగులను తొలగించగా, ఎంటర్‌ప్రైజ్ దిగ్గజం ఒరాకిల్ ప్రపంచవ్యాప్తంగా 21,000 మందిని తగ్గించుకుంటోంది. ఇందులో దాదాపు సగం మంది భారతీయ ఉద్యోగులే కావడం గమనార్హం.

భారతీయ ఐటీ రంగాన్ని పరిశీలిస్తే.. కాగ్నిజెంట్ తన పునర్నిర్మాణంలో భాగంగా దాదాపు 4,000 మందిని (మొత్తం ఉద్యోగుల్లో 1%) సాగనంపగా, టీసీఎస్ (TCS) 12,000 కంటే ఎక్కువ మందిని తొలగించి ఏఐ యుగంలో లేఆఫ్స్ ప్రకటించిన తొలి భారతీయ ఐటీ దిగ్గజంగా నిలిచింది. ఒకప్పుడు లక్షలాది మందికి ఉద్యోగ అవకాశాలు కల్పించిన ఐటీ సేవల సంస్థల సాంప్రదాయ మాస్-హైరింగ్ (Mass Hiring) శకం ముగింపునకు చేరుకుందనడానికి ఈ పరిణామాలు బలమైన నిదర్శనంగా నిలుస్తున్నాయి.