Zee deal: జెట్ స్పీడ్‌తో జీ షేర్ల బౌన్స్‌బ్యాక్.. 30 శాతం లోయర్ సర్క్యూట్ నుంచి ఏకంగా..

Zee shares: స్టాక్ మార్కెట్‌లో ఎప్పుడు ఏదైనా జరగొచ్చు. ఓరోజు భారీ నష్టాల్లో కుప్పకూలిన షేర్లు మరుసటి రోజు రాకెట్‌లా దూసుకుపోయిన దాఖలాలు అనేకం ఉన్నాయి. తాజాగా అటువంటి ఘటనే ఇవాళ మరోసారి రిపీట్ అయింది.

నిన్న మార్కెట్‌ సెషన్‌లో జీ ఎంటర్‌టైన్‌మెంట్ ఎంటర్‌ప్రైజెస్ షేర్లు 30 శాతం లోయర్ సర్క్యూట్‌కి చేరాయి. సోనీ పిక్చర్స్‌తో డీలి క్యాన్సిల్ కావడంతో స్టాక్ విలువ కుప్పకూలింది. కాగా ఇవాళ మధ్యాహ్నం 1.10 గంటకి అవే షేర్లు 8 శాతానికి పైగా ఎగబాకాయి. అయితే ఈ ఏడాది ప్రారంభం నుంచి జీ షేర్లు ఇప్పటివరకు దాదాపు 44 శాతం మేర క్షీణించడం గమనార్హం.

జీ ఎంటర్‌టైన్‌మెంట్ ఎంటర్‌ప్రైజెస్‌తో సోనీ పిక్చర్స్ తన 10 బిలియన్ డాలర్ల విలీన ఒప్పందాన్ని ముగించింది. అంతేకాకుండా నిబంధనల ఉల్లంఘన కారణంగా 90 మిలియన్ డాలర్ల టెర్మినేషన్ ఫీజు చెల్లించాలని కోరింది. ఈ మేరకు కల్వర్ మ్యాక్స్ ఎంటర్‌టైన్‌మెంట్ ప్రైవేట్ లిమిటెడ్(గతంలో సోనీ పిక్చర్స్) మరియు బంగ్లా ఎంటర్‌టైన్‌మెంట్‌ ప్రైవేట్ లిమిటెడ్ నుంచి ఈ మేరకు జీ నోటీసు అందుకుంది.

అయితే ముగింపు రుసుము కోసం సోనీ చేసిన క్లెయిమ్‌ను, ఆరోపించిన ఉల్లంఘనలను జీ ఎంటర్‌టైన్‌మెంట్ ఖండించింది. 'షేర్‌హోల్డర్ల ప్రయోజనాల దృష్ట్యా డీల్ పూర్తి చేసేందుకు జీ నిలకడగా కృషి చేసింది. విలీన సమయాన్ని పొడిగించే ఉద్దేశ్యంతో కల్వర్ మాక్స్ మరియు BEPLతో పలుమార్లు చర్చలు జరిపింది. అయితే దురదృష్టవశాత్తు అది కార్యరూపం దాల్చలేదు' అని జీ ఓ ప్రకటనలో తెలిపింది.