Zee Shares: కుప్పకూలిన జీ స్టాక్.. ఒక్కరోజే 30 శాతం క్రాష్.. ఇన్వెస్టర్లు ఏం చేయాలి..??

Zee Stock Crash: మీడియా దిగ్గజం జీ ఎంటర్ట్మెంట్ ఎంటర్ ప్రైజెస్ స్టాక్ అనుకున్నట్లుగానే నేడు కుప్పకూలింది. ఉదయం ఆరంభంలోనే 10 శాతానికి పైగా నష్టపోయిన స్టాక్ సాయంత్రానికి భారీ నష్టాల్లోకి కూరుకుపోయింది.

వివరాల్లోకి వెళితే అనేక లీగల్ కారణాల కారణంగా ముందుగా నిర్ణయించిన జీ-సోనీ మెర్జర్ డీల్ నిన్నటితో ముగిసిపోయింది. దీంతో ఈ ఒప్పందం నుంచి తప్పుకుంటున్నట్లు జీ యాజమాన్యం ప్రకటించింది. అయితే ఈ ప్రభావం ప్రస్తుతం సదరు కంపెనీలో పెట్టుటబడులు పెట్టిన ఇన్వెస్టర్లను ఆందోళనకు గురిచేస్తోంది. శుక్రవారం రూ.231.75 వద్ద ముగిసిన జీ స్టాక్ తాజా పరిణామాల కారణంగా నేడు సాయంత్రం 3 గంటల సమయానికి 32 శాతానికి పైగా నష్టపోయి రూ.156.20 వద్ద ట్రేడింగ్ కొనసాగిస్తోంది.

దీనికి తోడు మార్కెట్లోని ప్రముఖ బ్రోకరేజ్ కంపెనీలు జీ స్టాక్ పై తమ అంచనాలను తగ్గించటం ఇన్వెస్టర్లలో ఆందోళనలను రేకెత్తించింది. ప్రస్తుతం బ్రోకరేజీల లెక్కల ప్రకారం స్టాక్ ధర రూ.170 నుంచి రూ.200 మధ్యన ఉంటుందని వెల్లడైంది. దీంతో చాలా మంది పెట్టుబడిదారులు జీ షేర్లను విక్రయించేందుకు పోటీపడుతున్నారు. ఇదే క్రమంలో మార్కెట్లలో బేరిష్ సెంటిమెంట్లు కొనసాగుతున్నందున షేర్ ఊహించని పతనాన్ని నమోదు చేసింది.

మోతీలాల్ ఓస్వాల్ ప్రస్తుతం షేర్లపై న్యూట్రల్‌గా కొనసాగిస్తూ టార్గెట్ ధరను రూ.200గా కొనసాగిస్తోంది. ఇదే క్రమంలో సీఎల్ఎస్ఏ కంపెనీ షేర్లపై గతంలో ఇచ్చిన రూ.300 టార్గెట్ ధరను రూ.198కి తగ్గిస్తున్నట్లు ప్రకటించింది. అలాగే ఎంకే గ్లోబల్ షేర్లను విక్రయించాలను సూచిస్తూ టార్గెట్ ధరను రూ.175కి తగ్గించింది. జీ యజమాని పునీత్ గోయెంకాకు ఇబ్బందులు పెరుగుతున్నాయని తెలుస్తోంది. సెబీ విచారణలో రూ.1,000 కోట్ల వరకు స్వాహా చేసినట్లు వెల్లడైందని ఒక నివేదిక పేర్కొనటంతో ఆందోళనలు పెరుగుతున్నాయి. దీనికి తోడు జపాన్ సంస్థ సోనీతో డీల్ కుదరకపోవటంతో అగ్రిమెంట్ ప్రకారం జీ భారీగానే చెల్లించాల్సి ఉంటుందని తెలుస్తోంది.