Zee News: 'సోనీ'తో డీల్ ఫెయిల్ తర్వాత 'జీ' కీలక నిర్ణయం.. ఆ టీమ్‌ నుంచి సగం మందికి పింక్‌ స్లిప్స్

Zee Layoffs: ఉద్యోగుల తొలగింపుల విషయంలో ఆయా కంపెనీలు పోటీతత్వాన్ని ప్రదర్శిస్తున్నట్లు కనిపిస్తోంది. ఎందుకంటే ఒక సంస్థకు మించి మరోటి సిబ్బందిని ఇంటికి పంపించేందుకు విశ్వప్రయత్నాలు చేస్తున్నాయి. కాగా ఇప్పుడు మరో కంపెనీ తన ఉద్యోగులకు ఉద్వాసన పలికేందుకు సిద్ధమైంది.

గత కొంత కాలంగా నిరంతరం వార్తల్లో నిలుస్తున్న జీ ఎంటర్‌టైన్‌మెంట్ తన శ్రామిక శక్తికి బ్యాడ్ న్యూస్ చెప్పింది. బెంగళూరులోని టెక్ ఇన్నోవేషన్ సెంటర్‌ లోని టీమ్‌ నుంచి ఏకంగా 50 శాతం మందికి పింక్ స్లిప్ ఇవ్వనున్నట్లు స్పష్టం చేసింది. తద్వారా ఖర్చులు తగ్గించుకునేందుకు ప్రయత్నాలు మొదలుపెట్టింది.

సోనీతో విలీనం రద్దు తర్వాత జీ ఈ కీలక నిర్ణయం తీసుకుంది. వనరులను ఆప్టిమైజ్ చేయడానికి మరియు నిరంతరం వృద్ధిని పెంచడానికి అనుగుణంగా చర్యలు తీసుకున్నట్లు కంపెనీ CEO పునిత్ గోయెంకా ఒక పత్రికా ప్రకటనలో తెలిపారు. అయితే తొలగించిన ఉద్యోగుల సంఖ్యను మాత్రం కంపెనీ వెల్లడించలేదు.

కంటెంట్ సృష్టి, పంపిణీ మరియు మానిటైజేషన్ ప్రక్రియను మెరుగుపరచడమే ఇన్నోవేషన్ సెంటర్ లక్ష్యం అని గోయెంకా తెలిపారు. 'వీక్షకులకు గొప్ప ఆకర్షణీయమైన కంటెంట్‌ని అందించడంపై దృష్టిని కేంద్రీకరిస్తున్నాము. ప్రపంచవ్యాప్తంగా ఉన్న కోట్లాది మంది అంచనాలకు అనుగుణంగా కంపెనీని నిర్వహించాల్సిన బాధ్యత మాపై ఉంది. సృజనాత్మక విధానం మరియు సాంకేతిక పరిష్కారాలతో వారి హృదయాలను గెలుచుకోవడం కొనసాగిస్తాము' అని వివరించారు.